12-01-2009, 09:31 PM
|
|
|
توه ساكن
|
عندي اقتراح لكل عائلة سعودية تملك فتيات (جنس ناعم)؟؟!!!
السلام عليكم ورحمه الله وبركاته
تحية طيبة...
هذا اول موضوع لي في منتدى (اسرة الحارة) علما باني ما كنت من رواد هالمنتدى ولا ادخله لانه اول شي بناتي وفي نفس الوقت كنت افكر ان انظمة هالمنتدى ممنوع دخول الرجاجيل وبحكم ان حنا يا الرجاجيل نبي نخلي البنات ياخذون راحتهم وينزلون غطاويهم ويسولفون بهداوه لكن بعد ما شفت اخواني التماسيح (كما يقال عنهم)كل واحد راز له موضوع ويشارك قلت زين الحمد لله اثاري هالمنتدى فيه انفتاح وتقبل للراي والراي الاخر علما بانك في معظم الاحيان توجه موجه من الانتقادات من قبل الفتيات...
<<< يسمع بالانفتاح..
عموما ما ابي اطيل في طقطقتي على الكيبورد وابي انزل الموضوع دايركت من مخيخي على المنتدى بدون اي فلسفه عشان ما تملون وفي نفس الوقت ما تقول يا شينك لا صرت تميلح يا صاحب الموضوع...
الموضوع وما فيه/
انا الليلة كنت ماشي بسيارتي (ام بخ) <<< يا كذبه>>> سيارته ددسن ويمشي بالتفتفه وكنت افكر وافكر وافكر وافكر حتى انتهى التفكير ودخلت لي مواضيع لا نهاية لها...
المهم واشطح ذيك الشطحه اللي هي :
ليش ما يتم احضار (استقدام) بنات من تركيا ويكونون جميلات ويوضع كل بنت تركيه في كل منزل عائلة سعودية يملكون فتيات؟
بتقول ليش؟ وش الهدف؟
الهدف طال اعماركم ...كالتالي :
1- يتم نقل العدوى (الجمال التركي) من تلك البنت التركيه (الشقراء + المزيونة) الى البنت السعودية (الشينة + ام شوشه) وبهذا وخلال تلك الفترة تشوفون كل البنات السعودية متزوجات وما عاد في اي بنت سعودية عانس، بل تصير بنت سعودية جميلة ورومانسية وشقراء وعيونها عسيلة او زرق.
2- تبادل ثقافات... يعني تعلم البنت السعودية من هالبنت التركية، الطباع الزين واللغة التركية وفي نفس الوقت الرومانسية...
3-كل شايب/شاب سعودي بتشوفونهم مرابطين عند اهلهم 24 ساعة واتحداكم يتعدون البيت.. والمشكلة بعد بيصير هناك منافسه بين الشايب والشباب في كل منزل، وكل واحد يسوي فيها فيها خاصه عند هالبنت التركية... كود انها بس تعطيهم ضحكه.... وخبركم الشاب السعودي لو تعطيه نظره اي بنت ... قال ايه... خاقه معه... من زينك يا خالد الفيصل على غفله... :011: والشايب السعودي اتحداكم اذا قام يشتكي من الامراض اللي فيه :011:
انتهى
8
8
8
كل ما ذكر في الموضوع كنت افكر فيه وانا امشي بددسني حتى قمت اطرح على نفسي عدة اسئلة :
1- ليش السعوديين (شيبان + شباب + عجز + بنات ) خاقين مع الاتراك (شباب + بنات) من بعد الغزو الفضائي من قبل القنوات للمسلسلات التركية؟
2- هل بالفعل حنا منغلقين وينطبق علينا المثل القايل مع الخيل يا شقراء، فقبل سنتين كانت السياحة في تركيا من قبل السعودييين صفر على الشمال، والان السعودييين يملون تركيا؟
3- هل بالفعل ما في السعودية جمال رباني ام نحن نوهم انفسنا بان الاتراك اجمل منا في كل شي؟
اسئلة عديدة طرحتها على نفسي وما دريت الا الددسن يطفى بي عند البيت،وعلى طول قلت لازم انزل هالموضوع في المنتدى...
اتمنى انه يعجبكم... واذا ما اعجبكم قولوا بالمختصر(ليتك ساكت احسن لك)
تقبلوا تحياتي،،،
|
|
|
|