حارة المساطيل - عرض مشاركة واحدة - تعال ايها العضو لنسوي لقاء مع اسطورة العياره ( دعلج ) <- تسمع باللقاءات انت ووجهك؟!

28-03-2009, 03:09 PM

مسهم بالخير جميع

خير وش تناظر ؟

اقتباس:

يا شين هذرتكم لاصارت على غير سنع
برب
ولي باك

ورى الاخلاق قافلة ؟ ياخي اذا ضبطت نفسيتك هاللي كنها نفسة وحده ماتصلي وعندها بكره اختبار نهائي وزودن على كل ذا ضرسها يوجعها فتعال والا خلك على بربك تكفى

الباشا
يالله حي شايبي الغالي

اقتباس:

كنك مستخف دمك يالثور؟ قاعدين يلعبون عليك والا انت ما اثقل من دمك الا طميّه
يا اخ دعلج انا عندي سوال واحد . وش بينك وبين ابوعاذر؟

توك تدري اني مستخف دمي أيه تكفى علمهم بمصالتي اجل وشضنك داخلين النت عشانه ؟؟ مو عشان نستخف دمنا ونضحك ونفلها ؟؟ والا تبيني اقابل كرشتك اللي كنها طرف خزان الغاز اللي يجي في الاسوار يالبى سرك يابو عبدالله احس اذا تجمع فيه قطن تدخل معلاق عشان يطول وتسحبه كنك تطلع عش عصافير من مثعاب بيت طين
وابو عاذر كل اللي بيني وبينه اني ابسوي خير وابوديه لخالي يقراء عليه بعد ماقابلته عندك لانك انت واياه مرضى وبدال ما اقعد ازقلبكم من شيخ لشيخ قلت في نفسي اعالج ابو عاذر وان شفنا القراية جابت فيه طب خذتك عقبه لان شيلتك مهيب سهلة كني واحد بيحمل عفش وبيروح للشرقية

اقتباس:

وش رايك؟ ترى سوالي البسيط على شان ادفك وتنجح وترى عليه 90 درجه
انا ماني معجب فيك واكره واوصخ ما اشوف انت بس جاي لا يقولون وراه
ما شارك لا يكون دعلج مفشله ومزعله يا نجس ما انسى توصيفك لي وانا اصلي
الله ياربي توقف نمو خشمه القبيح

لبى قلبك انت ودرجاتك بس وبالنسبة لإعجابك فيني وكرهك لي ماتفرق عندي لاني من عرفتك وانا ادري ان حبي من طرف واحد وبالنسبه للوصف يومك تصلي فأ ابنصحك من اليوم وطالع صل وانت جالس لانه يجوز لك يابو عبدالله والاسلام دين يسر وانا اخوك فديتك يابو عبدالله والله لايهينك على هالطله يابعد روحي انت

ترحآل
حي الله ترحال ومنوره والله

اقتباس:

دعلج سوعآلين فغط....
أذكرلنآ عيآرآت مسميهآ بالجوآل لأخويآك أو أقآربك مع ذكر السبب ..

هههههههههههههههه سؤال رهيب الحقيقة
طيب ابعطيك من الاعضاء مثلاً
نكهة : الصوص والسبب عشانه مايفصل الا ثياب قماش اصفر وعلى جرمه وحجمه طالع كنه فرخ صوص
عضو : الرشيق والسبب انه ماخذ جائزة اجمل جسم شرقي عربي << ضنك انا صادق؟
الحقيقة اني مسمي عضو في جوالي " الوارم " والسبب انتس ماتدرين هل هو سمين او على سبب هاللي فيه ونصيحه لعضو انه يجلد اللي بين فخوذة مكان الاحتكاك لان هالمنطقة بتتسرطن ان ما استعجل بعلاجها لانها جو ملعون والدين للبكتيريا لدرجة انه اذا فوحش بسرعة تشوفين البكتيريا كبر الخنافس يركضن ويدخلن تحت السفوط
نجي للقرايب :
اخوي : مخزنه " البوم " لان عليه عيون بارزه وماباقي في الراس الا ربعها لدرجة انه اذا صاح ماتنزل دموعة على الخدود مثلنا !! تصير تنقط على طول على الارض كنك جالسه جمب مكيف صحراوي ويخر مع وسطه مسكين هالولد كل ماجاء يعطس لازم يمسك عيونه بيدينه لايطيحن
ابوي : براد بيت لان ابوي يشبة لبراد بيت بس الفرق اللون شوي يختلف تعرفين لون اهل سدير اقرب ماله جلد طبلون سيارة مقابله الشمس 14 سنه وماتحركت محترق وكله متفزر وبرضو لون الشعر يختلف شوي والشفايف والعيون جايات غير شوي << بالله وشبقي يشبة لبراد
امي : ماما <<< يعععععععع تخيلي تذكرت مره ابتميلح عند واحد من اخوياي واحط السماعة على السبيكر واحنا في السيارة واقسم بالله ماجاكم الا الصدق وابسوي قدام خويي اننا طبقة هاي وننادي بعض بها المسميات مع اني ماسك به خط البديعة ولا فيه امل اصير اسمي امي ماما لو تتكلم العنز الزبدة دقيت على البيت وردت امي وقلت لها هلا ماما !! قال من انت ؟؟؟ << قسم ما الومها قلت انا ميمي ولدك صكتها بوجهي وقسم بالله المشكله ابرقعها قدام خويي وقلت الارسال زفت ياخي ومدري متى هالاتصالات بتضبط وتصير سنعة وابربر عليه واني مقهور من وضع البلد وانا قاعد ادق مره ثانيه والعرق يصب من جبهتي توقعتها الله يهديها تمشي الموضوع وتقول طيب مايخالف يوم رجعت وقلت لها مره ثانيه : هاااي ماما سوري فصل الخط !! قالت لا مافصل ياوليدي انا اللي صاكته في وجهك يالعفن عشان تعدل اثمك وتحتسي زين وماما ذي منهي ومن متى تقولها وانا امك ؟؟ ياحبي لتس يا اميمتي ماتفشلت ابد ترى وبيجي يوم واقول لتس ماما وتقولين لبيه دودي ان تسانها مهيب في الدنيا ففي الجنه ان شاء الله قايلها قايلها ان قاله الله

اقتباس:

ليش نفتقد بشبآبنآ في جده خفة الدم والأسلوب العيآري الي تميز به شبآب نجد خآصة .. ؟!يآخي يآمصلهم وربي ان رميت عليه أتفه ذبه قآلك (بلا بشكلك ) وسوى تسذا >>
فمآ هو السبب من وجهة نضرك يآسعيدآن المسآطيل ...؟
هذآ وصلى الله وبآرك .. الخ

والله شوفي يالاجودية لاتصيرين قاسية على شباب جدة وبالعكس انا لي ربع كثار من اهل جدة واشوفهم خفاف طينة لدرجة لاتوصف واجلس واتشقق ضحك معهم الين اقول آمين واذا احد قد قال لك بلا في شكلك فصدقيني يمكن انك جايته وهو قافله وماله خلق وبالنسبة للعيارة فأ اكيد لكل منطقة عوايدها وطبايعها وهذي اشياء خلقها المكان في الشيبان وتوارثوها الاجيال من بعدهم لانهم ينقلون سوالف شيبانهم ويمشون على نفس النهج والاسلوب وبنفس الوقت لو جبتي نجداوي وتحديداً سديراوي قروي وخليتيه يقول اندررر ياواد كان تحوم تسبدك من نطقه لها وودتس تتفلين بوجهه وتسمرين شوكة الكعب في دمجته لانها بتطلع ماصله منه وماتضبط معه ابد
ومشكورة يا ارتحآل ونورتي والله المكان وبيّض الله وجهك على حضورك

عسجديه

اقتباس:

وثانيا/ كل التحايا العاطره والمعطره والمبخره بالعود الأزرق الهندي اللي تجلس ريحته تعشش بخشمك أسبوع من جودته والمزركشه بلمبات العيد القديمه اللي كانو يعلقونها ع الشوارع أيام العيد وتجلس تشر ولع طف ليما تعورك جبهتك وانت تناظرها بسماحة مفتي العياره العام الشيخ / دعلج أطال الله عمره ( والله ماعندك ذوق عقب ذا الترحيب إن سهجت مداخلتي ‏ )‏

ههههههههههههههههههههههههههههههههههههههه
يالله حي عسجديه ومنوره والله المكان كله ومشكوره على هالمداخله وعلى البخور الطيب وعلى اللمبات اللي تخيلتها وقمت اشوف الوانها في اطراف عيوني وعشت الجو واشكرك جزيل الشكر وماقصرتي والله << ماسهجناك

اقتباس:

مساك الله بالخير يادعلج شخبارك بشرنا عنك وشلون صحتك عساك في نعمه و زود يارب
طبعن أنا ماأعرف أرتب حتسي بس بأقول اللي براسي والله يكون بعونك إذا وصلت لردي
نبدأ بفاصله / دعلج أنت واحدن فوق التميز ومايحتاج أمدحك زود يكفي إنك دعلج

الله يمسيك بالف خير ويسلم قليبك يا عسجديه وانا بخير وصحه وعافيه ماتبي الا شكر ولله الحمد وحياك يا عسجديه ومو لازم ترتيب وخرابيط يازين الشي اذا جاء من الدمجه على طول وانا اخوتس والله يرفع قدرتس وشانتس على هالكلام والمدح الطيب

اقتباس:

سؤال / أدري العياره والإحتراف فيها من أهم أسباب تميز دعلج لكن ماأهم أسباب التميز من وجهة نظرك بصفه عامه و أكيد عندك أسباب أخرى لتميزك ياليت تذكرها

شوفي يابنيتي << عاش ام الدور مافيه احد يقول عن نفسه متميز او يشوف نفسه انه محترف وكذا هذا معناته غرور وشوفة نفس وودك توطى اللي يجي يتميلح ويقعد يريّش بنفسه وجعلني منيب من اهلها ان شاء الله وانا والعياذ بالله من كلمة انا بنظري وفهمي المتواضع واللي على قدي للتميز لدى الكُتاب اللي اقرا لهم هو حبك الموضوع وترابطه من اول حرف لاخر حرف وكيف انه يقدر يشد القارئ ويخليه مركز من بداية الموضوع الين اخره وهو مشدود يبي يعرف وش بيصير والفنان بتصوري هو من يحبك موضوعه من كل الجهات سوا من فكره وسيناريو واخراج ونهاية لازم اللي يقراء يوصل لنتيجه في النهاية مرضية للوقت اللي قضاه وهو يقراء ويحس ان الموضوع وصل لمخه وتفسر بشكل واضح ونهاية مقنعه وفوق هذا كلة اختيار المفردات والتميز بالجديد وعدم التأثر بفلان وعلان ويكون لكل واحد خطير سير واحد لايملكه احد سواه وبس

اقتباس:

وسؤال ثاني / وش يعني دعلج ؟ وليش إخترت هالإسم بالذات لخوض غمار عالم النت ؟

سبق وجاوبت على هالسؤال من قبل مدري بنفس هالمقابله او غيرها بس لعيونك بجاوب عليه وبكل مصداقية شوفي يابنت ابوك انا رجالن شعري ناعم ولله الحمد بس اذا سبحت وقف كنه شوك قنفذ (دعلج) << هماك مكذبن على واحد في اول المقابله وقايل ان يوزرك نوع من انواع الورد النادر وراك جبت العيد الزبدة !! اني ذاك اليوم شفت شكلي وانا محلق راسي وشعري على 1 سم وموقف وصاير كني قنفذ مقابلن داب وكاش وضحكت وغسلت في المغسلة ومشيت وبعد ماطحت في النت وجيت اسجل يوزر قمت افكر وش اسمي روحي وتذكرت المنظر وقسم بالله وسميت نفسي بدعلج وهذي هي الحكاية

اقتباس:

فاصله 2 / ياخي فيه بيننا ناس واجد يجهلون إستخدام النت سواء كانو شباب أو فتيات وبناء على تفكيرهم وطريقة إستخدامهم و نظرتهم لعالم النت قد يحكمون على غيرهم بأحكام باطله إما بتزمت أو بإنحلال

طيب بشري امك <<<< توهق مايعرف يرد على هالكلام الصعب
ماعليك من احد والعاقل خصيم نفسه وانا اخوتس ولو بنتابع وش يقول فلان وعلان معد في الناس احدن عاقل ونظيف ابد محدن يسلم من لسان الناس وللاسف اصبح القذف والاتهام شي سهل ينقال على اتفه سبب ويفسر على ادنى حركة وحتى لو كانت عفويه واثق الخطى يمشي رافعن خشمه وانا اخوتس ودعي المريضين يبربرون الين تنبح حلوقهم

اقتباس:

السؤال / بأي طريقه يستخدم دعلج النت و هل سبق و قالك أحد بالذات في بداياتك ( يامصلك أو ياثقل دمك ) عمدا و من جد و وش كان شعورك حزتها و هل سبق أيضا و تلاقطت بالحتسي مع إلكترون نتي وتأزمت نفسيتك وحلفت ما عاد تدخل النت عقبها سواء زمان أو الحين

بطريقة الدي اس ال << ياشين القراوى اذا تحجروا استخدامي للنت وانا اخوتس في المنتدى وبس ومالي بغيره شي الا تصفح مواقع ابحث عن شي معين او شغله مهمه ووقت الفضوه اليوتيوب ورسايل الايميل وبالنسبه لكلمة يا مصلك او ياثقل دمك ما اخفيك محدن يسلم منها ولازم تنقال محدن يقطع نقعة ماء على رجلية وانا اخوتس وماتربص رجليه وشعوري عادي وروحي رياضيه واطلق من روح التايب نفسه وبالنسبه للتلاقط ولله الحمد مابعمري تقابعت مع مخلوق في النت ولا انزل نفسي لها الامور ابد اللي ينفع لي يقعد معي واللي مايجوز لي كنه البنر عندي

اقتباس:

سؤال ثاني / وش يعني عالم النت بالنسبه لدعلج وهل تقحمه في حياتك العامه أم أن النت شي معزول عن حياتك و تعيش كل منها بأدق تفاصيله بمعزل عن الآخر ؟

لا والله كل واحدن حاطه في بيت يعني ما اقحمت شي على شي وكل شي لحالة وله عالمة ووقته وطقوسه ما احب ادخل هذا على ذاك ولا ذاك على هذا ولا ذوليك على هذولي ولا ذولي على ذوليك <<< وبس

اقتباس:

سؤال ثالث/ هل ضروري ان البنت إذا دخلت النت تكون رومنسيه ودلوعه ومدري وشو والا بتلقى من التهزئ مالله به عليم إذا صارت وسيعة صدر وتاخذ النت بكبره من باب الوناسه < واضح إنها متهزئه لين قالت العيد بكره

لا مو ضروري وبالعكس يامصل بنات التميلح والدلع والياي واكبر دليل شوفي هالحونشية البنات اللي بالمساطيل ياشيخه فيه بنات اخشن من بهجت الاباصيري بكبره D وفيه اجلف من مخاوي الترنج وصدقيني حلو الوحده تطلق العنان وتصير تسنها ولد بين العيال وتفلها وتاكل تبن مع المسلمين ان كلوه ودايم اللي كذا تسلم من الغزل والمحارش لان ابو التميلح يشوف نفسه مع شنب وهو يكلمها وخاصة اذا قال لها ممكن لحظة ياقلبو !! وردت عليه وقالت له خير يابو !! عسى ماشر شارب شي ؟؟؟ ولا ماقد جتك تفاله تمشي الف على عينك ؟؟ ساعتها يذل وينحاش ويقول هذي وينها ووين الرومنسية

اقتباس:

فاصله 3 / إنتشرت ظاهرة الشعر والإستشعار في الآونه الأخيره وصار كل من يفك قوطي تونه يسوي نفسه شاعر ويكتب قصيد ويصارخ ويسوي حركات بعيونه المهم سمع الأخ زعيم التنسيم بهذا الشي و يتفلت علينا بعلوم عسى الله يجيرك بس مايمر قدامه واحد إلا يمسكه ويسوي معه محاوره حتى القطوه اللي تمشي ع الجدار بأنصاص الليول ماسلمت منه

زعيم شخص مسكين ومريض بالانفصام وعسى الله يشفيه بس ومايقاس عليه شي ولاهوب كفو اني اعطيه حيز من موضوعي واتكلم حتى عن امراضه بس كل اللي ابقوله لزعيم بن هذال العتيبي اعقل وخلك رجال والشعر له ناسه وتعلم كيف تمشي ضيوفك اذا جوك ابرك لك من نظم قصايد كنها خشتك
زعيم يالبى كل الزعماء العرب <<< خير جد هالانسان غيررر واحبه من قلب الله ياخذه وهو شاعر بعيونه بدون لايحكي تحسين انك تقرين في وجهه 6 ابيات مقيوله في الحمار

اقتباس:

السؤال/ هل زعيم التنسيم من وجهة نظرك يوم يسوي نفسه شاعر صاحي ولا أهبل ؟

كلمة شاعر بكبرها ماتجي عليه عشان يصير صاحي ولا اهبل وبدون كلمة شاعر اقدر اسمية الصحيّح لانه مع الخيل يا شقرا ان ابتسمتي ابتسم وان تعبرتي بتسى معتس وهذا اكيد من فداغته وطيب قلبه ياحبي له وقسم بالله

اقتباس:

وما رأيك في المحاورات اللي صارت الشهر الماضي بينه وبين سلطان وتريلة شوق من ناحية الجمهره هل كانت فكره جيده لكسر الروتين ولا شكلك مادريت عنها أصلا
ومارأيك في عسجديه هل ترى أنها كانت تسوي شي صائب بالموضوع أم إنها ودك ترقد ولا عاد تطب موضوع ابد ‏ جاوب بكل صراحه لألفعك بالطاسه

الكذب خيبة وانا اخوتس والله ماحضرتها ولا ادري وش صار فيها من مقابع بس اذكر البنر قريته مره وانا مستعجل وكنت ناوي ابجي وامخمخ على هالحجازي المتنجد بس مالله كتبه اما رايي فيك يا عسجديه فوالله شهادتي فيتس مجروحة وماراح اوفيك حقك وحتى لو ماحضرت هالموضوع خبري فيتس من مبطي مميزه وبطله والله يستر عليك

اقتباس:

فاصله 4 / قبل العام رحت أنت والسيد القزم إلى مقر فندق تصوير ( بيني وبينك ) الجزء الأول وصورتوا هناك حسن عسيري وفايز المالكي في لقاء حصري للمساطيل
سؤال / وش رايك في هذا الثنائي من ناحية الفكاهه وخفة الدم بماإنك عيار من الدرجه الأولى ؟
سؤال ثاني / قلتوا لنا حزتها إن فايز المالكي يبي يسجل بالمنتدى ومن يومها لين الحين ماشفنا أحد ليش ماجاء الرجال ؟ هل كان يتهرب منكم و قط سالفة التسجيل ثم سحب عليكم ؟

ههههههههههههههههههههههههههههه الله يرجك
والله فايز وحسن من وجهة نظري اللي تخصني انا ومو مقياس لإبداعهم من عدمة عند الكل وتعتبر وجهة نظر شخصية فا اشوفهم الحقيقة من المبدعين خاصه في السنوات الاخيرة وحتى لو كان لي ملاحظات فا احتفظ بها لنفسي لانها ماتلغي كل شي جميل يقدمونه وهذا رايي الشخصي ولحد ينط في حلقي كلن ورايه

اقتباس:

فاصله أخيره / أنا إذا ابي أتعامل مع شخص في حدود النت بالذات ( لأن هذا محور حديثنا ) سواء كان عضو أو عضوه أنرفزه بالأول وأتعمد أرفع ضغطه بمصالتي فإذا كان يرد بأريحيه وسعة صدر حطيته في رأس قائمة الأعضاء اللي يمونون ويستحقون الإهتمام و التعامل معهم بدون تكلف وإذا كان سريع الإشتعال شطبت عليه نهائي
السؤال / إذا تبي تعرف أخلاق أي شخص قبل تعاشره وكنت ناوي تصاحبه أو تبي تتعرف على أي شخص وشهو من لحيه وش تسوي بطريقتك الخاصه

شرحك سرا يا عسجديه طريقتك احياناً استعملها واكتشفت من وراها ناس يستاهلون فعلاً كل المحبه والتقدير على شراحة صدورهم وتحملهم وتعاملهم الخالي من الحساسية والبرستيجات والخنبقه اللي مالها سنع ولازالت علاقتي فيهم لحد اليوم .. والشخص اللي يشدني او يعجبني اسلوبه دائماً من خلال موضوع او رد !! تلقيني داخل ملفه الشخصي وقاعد اقراء له كل شي سوا مواضيع وردود وافهم شخصيته من كتاباته وكيف هو رهيب او حمقي وينفع انك تدخل معه يالواحد وتمزح معه وتتجرئ عليه ولا تخليه من بعيد لبعيد

اقتباس:

وأخيرا أشكرك من أعماق أعماقي لأنك تحملت أسئلتي اللي بصراحه مدري وش ابي وانا أكتبها بس لازم تجاوب وبصراحه بحته لاهنت
وعسى الله يوفقك وانااختك ويخلي لك عيالك ويصلحهم ويرزقك برهم

الشكر لله وانا اخوتس ثم لتس واذا ماتحملناك من نتحمل ياوخيتي عزيزه وغاليه والله ولاهنتي وجزاك الله الف خير على دعواتك والله يرزقك بما دعيتي لي به

مجنون

اقتباس:

ياهلا والله بالشيخ دعلج
تو مانورت الشلة
يعلم الله إني اغليك رغم إني ماأعرفك شخصياً لكن مجرد ماأشوف يوزرك يجيني إحساس صعب اوصفه يعني احس نبضي يزيد واطرافي ترتعش ( وركّز لي على الأطراف لاهنت )

هلا ومرحبا ومليون هلا بك والله يا مجنون
والنور نوركم والله جميع والا انا كني لمبة حمام جايها موية ومحترقه والله يرفع قدرك ويخليك لعينن ترجيك على هالمشاعر الفياضه مع اني خايف من ارتعاشك ومدري وش سنع هالارتعاش بعد لكن كوده جني فيك ولا يصير اللي في بالي

اقتباس:

ماأطول عليك ياغناتي وتفضل الأسئلة :
1- مارأيك بمقولة أن الشلة مدنّسة للأخلاق ؟

هذا جاهل مع احترامي لمه وابوه الشلة منبع الاخلاق وانا قاعد اقترح اننا نفتح دورات (مو مياه) للاعضاء عشان نزيد من اخلاقهم ونوسع مفاهيمهم للحياة بصورة واضحه وممزوجه بالادب والحياء اللي ينبع من كل قلم بالشله << ايه طيب
ياخي الشلة زيها زي اي قسم ولا فيها شي يدنس الاخلاق بالعكس والله ما اشوف شي يستاهل ان الواحد يعتبرها زي مالفظ اخيك في الله القائل ماقلت بالعربي قل له ينطم بس وياكل تبن كبر وجهه ولايكثر

اقتباس:

2- طال عمرك أنا لاجيت اكتب موضوع بالشلة، أثناء الكتابة أحس إني مانيب بسيط وعيّار من الدرجة الأولى ، بس مجرد ماأرعص أيقونة إضافة موضوع وأقرأ موضوعي أحس بكمية مصالة غير طبيعية ، ألا يخالجك هذا الشعور أحيانا ، وش تقول بينك وبين نفسك يوم تقرا موضوع لك ؟

اسمع وانا اخوك !! عود نفسك انك ماتحكم على نفسك بنفسك ولاتحرص انك تقراء وش كتبت لاني قد سويتها مره وحاولت اراجع حلي << وين شطحت يالاخو تراه موضوع مو اختبار المهم اني يوم راجعت الموضوع واقعد اعدل فيه واقصص منه الين حوم كبدي وحذفت امه كله عشان كذا اطلق لمخك العنان وافتح الموضوع وخربط باللي براسك بعد ماتفهم الاعضاء وش يحبون وكيف المواضيع اللي تشدهم والاسلوب الناجح وعقبها اضف الموضوع وخل تقيمك لنفسك عن طريق ارائهم وتعليقهم وانتقادهم لك وشوي شوي بتلقى نفسك من المميزين المبدعين

اقتباس:

3- من هو برأيك أفضل ممثل كوميدي: سعودي - خليجي - عربي ؟

للأسف السعودي في الاخير لاننا من عرفنا تمثيلهم وهم يعيدون شريط واحد واسلوب واحد وشخصيات وحده وحركات وحده اللهم اللي يختلف الكلام اللي ينقال هالسنة يختلف السنه اللي عقبها طيب ليش كذا والى متى ؟؟؟ خلونا واقعيين شوي هذا مثلاً عندك مسلسل مرايا يتكرر كل سنة بس الشخصيات تختلف والفكره تختلف والاداء يختلف رغم ان البطل واحد مو اللي يختلف النص والشخصيه وحده زي ربعنا
الخليجي مبدعين الحقيقة واخص بكلامي الكويت مع ان رصيدهم في الاونه الاخيرة بدء يخلص ومعد صرنا نشوف الإبداع اللي تعودنا عليه بس يضلون الافضل
عربي ما اقول لك مافيه !! فيه ناس فطاحله واساتذة في الخبال والكوميديا بس برضو ينعدون على الاصبع

اقتباس:

4- هل لك محاولات شعرية ، ومنهو الشاعر اللي تحب شعره ؟

سبق وجاوبت على هالسؤال حول المحاولة الوحيدة اللي كانت لي وعدل عليها المقرشع وفي الاخير طلعت قصيدة جديده ليس لي فيها ولا بيت واحد وهذا طبعاً بعد التعديل
بالعربي فاااااااشل والشعار اللي احب شعرهم كثار ولو ابقعد اعد ابوجع راسك وراسي وراس اللي يقراء

اقتباس:

5- فريقك المفضل؟
وسلامتك
وأعتذر إن كانت الأسئلة مكررة

طبعاً الهلال
والله يسلمك ويخليك وماقصرت على الحضور والمشاركه معنا
ولاتعتذر وانا اخوك واطيب الساعات والله وكرر بيديك ورجليك يابعدي

الكسندر

اقتباس:

هلا وغلااااااااااااااا بدعلج
الله حييييه
سؤالي واحد فقط
ماذا يعني لك حديث الرسول <<<ترى مو متاكد هو حديث ولا مقوله
((كثرة الضحك تميت القلب))

هلا بك حبيبي ومنور والله
وبالنسبة للحديث اللي حطيته فمدري عن مدى صحته ولا ودي اتكلم واعلق على كلام الرسول اللهم وصلي وسلم عليه ان كان الحديث صحيح
فا اعذرني يابعدي

اقتباس:

لان انا بس اقرا لفلسكوووووووو
وبس اضحك لما اقرا قصصه لين حسيت اني بموت من الضحك
قالي واحد من خوايي
ياخي بطل من قصص فلسكوو ذا والله يبي يموتك من الضحك
فانت وش رايك ؟
وتقبل تحياتي
اخوك الكسندر

هههههههههههههههههههه مو لحالك اللي تضحك كلنا نضحك الين نهرب مويه من قوة الضحك ومواضيع فليسكو زي الكوكائين ماتقدر تبطلها لو يدخلونك اهلك للامل بسم الله عليك 9 شهور والضحك وانا اخوك يقولون تقوي عضلة القلب فا اضحك بيدينك ورجلينك الين تحس ان الهواء يدخل مع كل مكان فيك وشكرا لك وماقصرت على حضورك يابعدي ومنور والله

مدغدغة البعارين

اقتباس:

مو مصصدقه عويناااتي
دعلج هنيا !!
بصراحه انا من اشد المتابعات لمواضيعك العياريه اتحفتنا برووعة ماكتبته
حاليا مابوه ولاسوعال
اذا جاء في بالي رجعت <_ فيك فيك هالبثره :>
بس ماحبيت امر مرور الكرام
فمان الله

لا صدقي وانا اخوتس دعلج هنا بلحمة وخشمة
ويشرفني انك من المعجبات ومشكوره وماقصرتي
وحياك يالغالية وياهلا بك بي وقت

شقيرين

اقتباس:

حي ذا العين والله .. دعلج ماراح امدح وازيد اللي قبلي ماقصروا لكن عندي لك سؤال واحد :
دعلج انت كاتب فيك ميزه غير عن الكتاب الكبار وبحسب رأيي تخليك تبوبز على
هرم العيارة الا وهي انك تكتب بأكثر من نمط وماترتبط بكركتر معين اكثر الكتاب خلاص
يمسك له درب ويصير يحبك كل مواضيعه حوله ولو ينزلها بيوزر ثاني عرفنا انه لفلان
هل انت تتعمد هالشئ ؟ او انك تاكل تبن وتجاوب <- باين انه توهق بالسؤال
ونتمنى لك حياة هائنة بين اقرانك في الروض الاخضر

حي الله شقيرين ومنور ياجدي
واشكرك على رايك فيني وشهادة الحقيقة اعتز فيها وكلام يفرح قلبي اذا فعلاً انت وغيرك قاعدين تشوفون اني انوع ومواضيعي مو متقاربه لبعض لان كان هذا هدفي من البداية وكنت اسعى لها الشي واحرص اني ما اتكلم كل مره في موضوع له علاقة باللي قلبه دائماُ في كل موضوع ابي اكتبه اراجع كل المواضيع واشوف هل كتبت شي حول هالموضوع ولا لا واحرص اني اطلع بشي جديد وادعي الله انه يجوز للاعضاء ولكل من يقراء لي لاني والله ولاشي بدون رايهم وتعليقهم ومشاركتهم لي والكاتب ولا شي بدون راي الاعضاء وملاحظاتهم والله يقدرني واقدم كل شي يعجبهم ويبعدني عن المصالة اللي احسها حاجرتني في زاوية وكاثره من تالي فيني
ومشكور يابعدي على هالكلام الكبير وعلى حضورك الغالي على قلبي

MnNoO

اقتباس:

هههههههههههههههههههههههههههههههههههههههههههههههههه ههههه دعلج تستحي
توني أدري انك تستحي ..
والله معاك حق جاك تريش فضيع ..
وتستاهله كله والله ..
عرفت عندك كثير من النبذه .. ويكفيني ,
الله يدوم عليك محبت الناس لك ..
وليتك ترجع وتكتب زي قبل ..
لقبلك الطاهر \\

ايه وراه ما استحي بعد وش زودي عن العالم
ومشكوره وماقصرتي والله يسعدك ياشيخه ويوفقك وان شاء الله بنرجع واحنا اساساً مارحنا اللهم غبنا شويات وبتلقينا مسنترين 24 ساعة ان شاء الله
ماقصرتي يالغاليه والله لايهينك

ابو ثبت

اقتباس:

يالله تحيي دعلج اللي نسمع فيه ولانشوفه
ماعندي اسئله
دوك وردة حبنا
الا صحيح سمعت انك ماتقدر تسوق السياره لان خشمك يصقع الدرقسون

ههههههههههههههه الله يحييك ابو ثبت ومنور ياجدي
وهالاشاعة كانت قديمة وانا اخوك بس عالجنا المشكله وزالت ابشرك
دركسون موتري يختلف عن السيارات خليناه ارضي طال عمرك كنه دركسونات سيارات القيم يعني تحت دقني مباشرة وقزازة قدام فيه ارتداد بينها وبين خشمي متر وطبعاُ المسافة ماخذناها من الكبوت الخارجي لا لا خذنها من داخل السيارة لدرجة ان مراتب ورى مالها مواطي رجلين واللي يركب ورى يبوبز وتعال تكفى شف اهلي وانا موديهم لمشوار مبوبزين كنهم عرابجه على عتبة بقالة ومشكور يابعدي على هالطله الحلوه وشكرا

نوفيت

اقتباس:

مااعرف اسال بس بحاول ..
هل ترتبط العياره بقله الادب ..؟

شوفي ياوخيتي قبل كل شي مسيك بالخير والله يحييك ومنوره والله يانوفيت
وبالنسبه لسؤالك فا العيارة مو مرتبطه بقلة الادب ومو لازم تقل ادبك عشان تطلع عيار وعليك الكلام العيارة فيها تجاوزات وفيها حرية شوي اكثر من غيرها لان العيارة ماتحلى الا اذا كان فيها شوي هبال وكلام مبهم وتلميح وليس بتصريح والفنان اللي يوصل هالشي بدون لايفصخ الحياء ويقل ادبه للأخر مثلي انا اعتبر قليل ادب ولست بعيار واستهال جلد عند مسجد عتيقه عقب صلاة جمعة لاني ما استحي ولا انتخي وحيوان ويبيلي كف << شفيه قلب على روحه ذا الحين
مشكوره يانوفيت على تسجيل الحضور والله لايحرمنا هالخشيشه

nun

اقتباس:

والله مدري من انت يابن الاجواد
لكن ان كنت ولد فلك هالقلب وان كانك بنت فخذي هذي لان هالايام كاثره الكفشات والابتزازات ومابي ينقال عني شي والله السمعة مهمه واهل سدير لو يدرون اني سائل عن قيمة بكت الدخان بكم وانا ماشريته ولا اتتن حكموا علي بالقصاص والرجم فما بالك لو تصيرين بنت وقاعد اعطيتس قلوب بعد
مشكور يابعدي على كل حال

لي عودة للبقية ان قالة الله