حارة المساطيل - عرض مشاركة واحدة - تعال ايها العضو لنسوي لقاء مع اسطورة العياره ( دعلج ) <- تسمع باللقاءات انت ووجهك؟!

07-04-2009, 02:34 PM

! إِنقِلِيزَةُ !

اقتباس:

ارحب مسّه بالرضا .
وش كان لقاء الاوربت معك عنه ؟

مسيك بالخير والله ولقاء اوربت كانوا يسألوني عن المنتديات الشعبية وعن حارة المساطيل وعن تخريج الكُتاب من المنتديات واشياء كثيره نسيتها وفي الاخير خلونا نسوي طبق اليوم وكان قبابيط بالبشاميل وبعدها قضبوني الباب

اقتباس:

هل انت مع/ضد الذب الجامد على شخصٍ ماتمون عليه ؟
شكراً ، فيمآن الله .

شف وانا اخوك سؤالك هذا جيد وحساس بنفس الوقت انا مدري عن غيري بس ابتكلم عن نفسي .. الذب الجامد زي ماتسميه واللي هو المونه والمزح القوي دائماً مايكون الا مع الناس اللي اشوفهم يتحملون المزح وصدورهم وسيعة وحتى لو ما اعرفه شخصياً ولا بيني وبينه اي احتكاك في المنتدى يعني لما اجي لواحد القاه والله فالها ووسيع صدر ويتقبل اي شي تلقاني ما اثمن كلامي واحوقها وعارف في قرارة نفسي انه ماراح يشيل بنفسه شي ولا راح يزعل لان شخصيته واضحه لكن اني اجي لواحد هادي ومؤدب ولاهوب واضح هو ديك ولا دجاجه وكافن خيره شره واجي واطب فيه بدون مناسبة واقعد انكت واستخف دمي على حسابة لاااا والله هذي ما اسويها ابد
مشكور يابعدي ومنور ولاهنت

ورااان

اقتباس:

بس الصدق ودي اقابل امك واسألها كم سؤال عن طفولتك باين انك ابثر من خلق ربي

هههههههههههههههههههه ابريحك وابجاوب عنها انا محطوط في قفص في مدخل البيت زي القفوص اللي موجوده في المحطات اللي يحطون فيها قرود الين دخلت المدرسة وزياده على القفص مطقوق بكلبشة في رجليني ام حديده مدوره عشان لو قدرت اطلع يمديهم يلحقون علي في نص الطريق قبل لا اجيب العيد فيهم اجل بالله واحد عمره 6 سنين فاك تلفزيون بيصلحه وهو يشتغل ميه الميه يوم رجع ابوي لقاها قطع وماعرف يرجعه ودق على الشركة عشان يجون يصلحونه ومن ثوارتي مافصلت فيش الكهرب يعني بايعها للنعله وبغيت اكون مثل الفيوز اللي يمرر كهرب وينفصل مع النص

اقتباس:

السؤال.. وش سالفة لقاء اوربت؟؟؟ صدق فيه لقاء والا ينصب نكهه ؟؟ طيب لقاء عن ايش؟؟>>اخاف اني اعرفك وانا مدري..

الا صدق فيه لقاء ونكهة ماينصب نكهة يبتز وبس وكان اللقاء حول القضايا السياسية في المملكة وعن الخطه الديناميكانيكيه بمنظور دعلج للسنوات الميه القادمة << طراها الاداره اداره والسياسة سياسة يابنت الحلال اللقاء كان عن المنتديات الشعبية وكثرتها وعن المساطيل ونبذة وتعريف عنه وعن اقسامه ونوعية مواضيعه وعن الكُتاب في عالم النت والاسلوب العامي البحت في خضم ذلك << ياشين ختم الشي
ولاتخافين ما اعرفك ولاتعرفيني واساساً كل عائلتنا 3 عوايل بس في المملكه كلها وباقي اقاربي في تركيا << ياشين اللي بيتلزق في الزيون بالقوه

اقتباس:

السؤال الثاني ... انت من الخرج؟؟؟

ياحوووول !! قولي من العفجه بعد بدينا في الاتهامات والاشاعات << مهوب عاقل دعلج الكاسر انا من سدير ياخاله والخرج ماقد شفتها الا 3 مرات في حياتي ويالبى الخرج واهل الخرج
مشكوره اخت وراان وحياك والله لايهينك وماقصرتي والله

star top

اقتباس:

طيب انا ما اعرفه خخ
المهم بما انك مشهور على قولتهم ومهنا مثلك بالسخريه
ليه ماتفتح مدونه لك وتجمع مواضيعك ! اللي كتبتها سابقاً
منها تعرف قيمتك عند الناس وتعرف الزوار كم يجونك !
بالتوفيق

يالله حي ستار وتشرفت انا بمعرفتك وبعدين لانيب مشهور ولاهم يحزنون بس ماسكه مع العيال يريشون بي ويتفخون راسي والا ماحولك احد وبالنسبه للمدونه وهالخرابيط والله مالي فيها وعساني ارد على المواضيع واكتبها عشان اروح ازبرقها واجمعها وقيمتي عند الناس وانا اخوك شفتها في الاعضاء اللي حولي واللي في منتداي وهذولي راس المال وابشرك ولله الحمد منيب احرص على هالامور واللي يحبونك بيجونك لو تكتب على جدار مقبره والله يوفقنا واياك يالغالي

اقتباس:

انا للاسف من كثره الماصلين بالفتره الثلاث سنوات الاخيره
بديت ما اهتم للمواضيع الساخره

لولا وجود الماصلين ماعرفت المبدعين والمميزين فديت الماصلين انا وقسم بالله اني احبهم واللي اشوف نفسي منهم وصايرن اردى منهم بعد ويزي بعض الهطف منهم اللي تلعن ثواه وتفشله وبعد ربع ساعة تلقاء له موضوع ثاني
مشكور يابعدي وماقصرت ومنور والله لايهينك يالغالي

فهد تبن الوايلي

هههههههههههههههههههههههه ياخي انت نذل وبس
الحين وقفتك جنبي صارت تفشل ؟؟ ماعليه ابمشيها لك لاني احبك ومقدر اسفل بك وانت تؤم روحي ونصفي الاخر

اقتباس:

ابو عادل قبل اي شي ينطبق عليه المثل اللي يقول الحي يحييك .. ياطيب قلبه وياكثر ماني اغليه مراجل .. وخفة دم وطيب راس .. وجعل من جابه الجنه ..

ماجورين يافهد ماجورين << مسوي يشكرك بالشرقاويه
يالبى قلبك يافهد وبس وهذا بعض ماعندك يابعدهم انت وجعل من جابوك للفردوس وانت معهم والسامعين والمسلمين كلهم وعيال عمتي نوره بعد < خير !

اقتباس:

والله اني ناسي متى اول مره قابلته فيها بس لو ان فيها خير مانسيتها ماعلينا منها

هههههههههههههههههههههههههههههههه
هههههههههههههههههههههههههههههههههه ياخي كلب وماتصمل على الطيب ابد مايمديك ترفع الواحد فوق الا وتلزخ به ياجعلي الزخ عليك واغملك الين ينعشونك في اللحظات الاخيره وماتقوم الا بتنفس صناعي مني

اقتباس:

اذكر مره كانوا العيال عندي في الشرقية
- دعلج - نكهة - الساري - خالد السوق - وجلسنا نسولف ونتقهوى وعزمت مجموعة شعراء من حقين شاعر المليون ومن بينهم المذيع القطري محمد المري .. ابو عادل ماجاب العيد وبس الا خلانا نعيد حق اربع سنين جايه من الضحك وخوينا القطري مات من الضحك طبعاً ( سوالف ما تنقال ولا السؤال اللي سأله ابو عادل للقطري ) من باب اني خايف من الكلبشه بعدها بإسبوع كلمني المري وقالي وش رايك نعطي دعلج برنامج اذاعي لمدة ساعه يخنبق فيه براحته قلت له ماينفع ياخي دعلج انسان سوقي وألفاظه بتقفل الاذاعه كلها ماهوب تلغي برنامج

هههههههههههههههههههههههههههههههه بالله يافهد لاتشبهني ولاتقعد تحطني في موقف محرج وتبين للاعضاء اني داشر <<< لا حشااااااك يا دعلج السبيل ياخي مشكلتي الشفافية وان اللي بقلبي على لساني وصدقني والله اني ناسي سؤالي بس الوكاد انه سؤال منطقي وحجر لخويك المري وخلاه يحسبها في راسه ويقتنع فيني ويدروني عشان اصير مثل اميرة الفضل في إذاعة قطر

اقتباس:

ومره كان نكهة ودعلج لحالهم عندي في الشرقية ايام رمضان ورحنا نفطر عند فيصل اليامي ماحد افطر فينا ابد من الضحك الخبل ذا خلانا نقوم وحنا ماصعنا الجوع هو يسولف وياكل وحنا نضحك وين نقدر ناكل والخبل ذا معنا بقولكم ذبه قالها لنا ..
فيصل الله يكثر خيره .. ماد سفره لها اول مالها اخر ودعلج لعن خير الصحون تعرفون صايم ومسافر وطايح في اكل ينقال عليه اكل قام قال :
تدرون ودي اطلع كرشتي واكب الاكل اللي فيها ( زي المكنسه الكهربائية اذا جيت تنظفها ) وارجع اكل مره ثانيه ابي اجرب اكلات غير اللي كليتها بس بطني مليان ههههههههههههههههههه الله ياخذك يا تبن ويفكني منك

ههههههههههههههههههههههههه الله يلعنكم ماصارات مقابله صارت كب عفش وفضايح ياخوك وش اسوي بالله عليك يافهد ؟؟؟ احد وده يشبع من ذيك السفره ؟؟ لاتلومني من عرفت شي اسمه رمضان وانا ما اعرف الا لقيمات وسمبوسه وكاس توت وان تطورنا ومسكت تميلح مع اخواتي الله يصلحهن بس صلحوا بيتزا في البيت ماودك تشوف شكلها ودك تطفي النور وتاكلها وليت لها طعم كنك تاكل قراطيس ياخي اول مره اشوف بيتزا تنوكل بملعقه مايعه وكنك مربص تميسه في مرقة طماط ودي اقول لخواتي لعد يتحمسن ويخلونا على هاللقيمات اللي لحد اليوم مابعد شفت وحده فيهن دائرية كلهن متطعجات وفيهن زوائد يابسه تشق اللهات والا السمبوسه عاد ماودك اسولف فيها ابد ياخي اذا عضيتها مع الزاوية حقت المثلث طشر الزيت مع الزاويتين الثانيات ورشن على اللي جنبي من يمين ويسار كنها رشاشات مويه حقت كبوت جمس ياخي قمنا نلف سمط على ارقابنا عشان مانمتلي زيوت وحنا ناكل وماتسمع الا جغجغه وازعاج مع الحركه ياخي صرنا نحط على السماط كرتون اسبرين وكل واحد ياخذ له حبتين خوفاً من الجلطه من كثر هالزيوت وتلومني يوم اجي واشوف سماط فيصل ؟ ياخي ولا شي قد شفته في حياتي من اللي على سماطهم ياخي حتى لقيماتهم غير لونها ابيض ومدورات كنهن بنقات تنس ترى قبل لا نسمي قمت المس في اللقيمات والسمبوسه حقتهم احسبها بلاستيك واشكال كذا مو للاكل الزبدة ان ذاك السماط ابموت وانا مانسيته ويمكن انسى اهلي وفطورهم المخيس والحارة حقتنا وانساك بكبرك ولا انساه

اقتباس:

بس بجد .. هو والقزم .. اذا فيه حد ينقاله ( رب اخ لم تلده امك ) فهم ورب البيت اخواني وهذا الامر مايعني اني موافق تنحط صورتي جنب صورة البعير شيلوها بليز <---
كيف بليز بس يابو عادل

الله مير يعافيك يا فهد ويسلم قلبك وانت والله ونعم الرجل ومايحتاج اقعد اريش فيك عشان مايقولون يوم مدحه رد المدح بمدح انت تعرف اللي لك بالقلب وكل تبن عاد وضف وجهك انت وبليزك الماصله

صيته عتريس

اقتباس:

اخر الزمان ؟؟ ... يومنهم يسوون مع ذا الزلابة ابو فنخرتن تقل بارجة حربية ع خشته ... لا ومكشخينه فوتوشوب وبرابيسن مدري وشي ..
وش فهمه ذا بالفوتو .. حده .. بخاخ ملون ع شرشف .. ووكنها كثيرتن في حقه ..

انا وش يحوم تسبدي في اهل سدير؟ ؟ الا انهم يغارون ويحسدون غيرهم والا وش حارق رز هالعبده ؟ نعنبو شيطانتس المفروض تبزين بولد ديرتس وتفتخرين ان فيه ثور من ثيران سدير قدر يسوى له تصميم ويجرى معه مقابله زيي كلامتس كله منطقي ومعتس في مشاعرتس المقهوره اني هنا والا المفروض اني في محطة فيحا العتش انافس البانهم ولبنتهم وابيع على طرف المحطه زبدة امي نوره في تنك بس ربك كريم ومايضيع احد وهذي دعوات امي تالي الليل << والله لو انك في مجلس الشورى الحين

اقتباس:

سؤالي : ياخي وش تحس فيه يالشايب المقطن .. وانت رابطن وزره ع رقبتك يازعمي كرفته .. ومتروبع تحك ساقك وتجاوب ع اسئله المقابله
مته تتفكنا من حومت ذا التسبد ذي <<<الا انا الي باسئلتس انتي من اي قمقم طلعتيلنا منه

احس بالسعادة وانا اشوفتس منقهره ومحترقة وغايره مني يالهامه ومني فاكتس ابد ابقعد ارد وابمخمخ بالقطاره ودامي محومن تسبدك فماراح اخلص هالمقابله ابد
وما اقول الا يمال العافية اللي تلخم بوجهتس والصحة اللي ترض جسمك << ماوده يدعي عليتس ومشكوره ولاهنتي يا بنتي بلادي

بلو دايمون

اقتباس:

أول ماعرفت المساطيل في 2006 كنت أشوف هاليوزر دعلج وكنت أحسب الدال من دكتور
وأقول دكتور علج قلت يمكن متأثر من الصحاف وكذا .. ماعجبني بالبدايه صدفه دريت انك دعلج .. سؤالي وش معنى اسمك اللي حطك بالبلاك لست
واللي طلعت منها صدفه ؟؟

هههههههههههههههههههههههههههههههههه
هههههههههههههههههههههههههههههههههههه
ههههههههههههههههههههههههه والله ياضحكت على دكتور علج الين دمعت عيوني يا بلو وحسبي الله عليك كانك خليتي الشاهي يطلع مع خشمي واذاني وتدمع عيوني به اجل علج والصحاف دعلج هو القنفذ وسبب التسميه ذكرته في احد الردود وبعدين اي بلاك لست ؟؟ ما اذكر اني دخلت البلاك لست ابد ولله الحمد

اقتباس:

السؤال الثاني ليه فاتح فمك بالصورة .. لاقطينها وانت تعشى مثلن ؟؟
ان بغيت لاتجاوب ترا محد بيزعل <<

لا ابجاوب وشوله ما اجاوب وبعدين سؤالك هذا لاتسأليني انا اسألي اللي لقط الصوره لي وماعرف يختار الوقت اللي ابلع فيه ريقي يعني واحد في مقابله تبينه صاك اثمه ؟؟ وعلى طاري العشاء الله يقلعك قمت اشم ريحة الغدا واشتهيته ومشكوره يابلو دايمون وماقصرتي لا على الحضور ولا على الديك والبندق الف شكر لك اختي

محارش

اقتباس:

متى نشوف ترقية للمنتدى بالإصدار الأخير ؟

قريب ان شاء الله
ومشكور ياعم

زنقل هانم

اقتباس:

السلام عليكم ..
يالله حي دعلج
للأسف ماعندي سؤآل مابقي سؤآل ماسألوه ؛

عليكم السلام ورحمة الله وبركاتة
والله يحييك ويبقيك يازنقل والساعة المباركة والله
ولاتتأسفين وانا اخوك وحضورك يكفي

اقتباس:

ولكن !
انا لسى ماكملت سنة بالمساطيل ولكن ولله الحمد علاقتي بأهلها من أحلى مايكون ووقت جلستي بالمساطيل فريته من المتحف للقراشيع والمواضيع القديمة وعلى بداياته ..
عرفت دعلج من خلال قرايتي لمواضيعه وردوده وكلام طيبين القلب الأعضاء عنه
ماأذكر اني احتكيت فيك وحتى يمكن مامر عليك يوزري بس اتشرف يكون لي بصمة في اللقاء وسجلني مُتابعة لك ولقلمك المُميّز من قبل
كُل من خلف ( شلة الحارة ) الشُكر لكُم لايكفي

عقبال 100 سنه معنا بالمساطيل ان شاء الله يازنقل ونشوفتس يالله تفكين الخط ودائماً الانسان الطيب والمحترم والخلوق تكون علاقته بمن حوله من احلى مايكون فلا تستغربين علاقتك في اللي حولك وانتي انسانة محترمه ونعرفك بالطيب والاخلاق العاليه
ويشرفني انك عرفتيني من مواضيعي اللي زي خشتي واللي تفشل ويوزرك معروف ومايحتاج تعريف وما اقول الا الله يستر عليك ويوفقك دنيا واخره وبس
والشرف لي والله يا زنقل وبيّض الله وجهك على كل حرف قلتيه ومشكوره ولاهنتي

برطوم

اقتباس:

بس حبيت اسلم عليك يالقطوع

هههههههههههههه هلا بالقديم المغبر المعفن ياخي انا القطوع ؟؟ ياخي والله انك ماتستحي وجاي ترمي بلاك وخطاك على غيرك ياخي من عرفنا الدنيا وحنا خامرين بها المساطيل وانت اللي قطعت وانطفت اخبارك وجاي بكل بجاحه تقول قطوع ؟؟ صدق يبيلك كف يدير وجهك الين تفتر رقبتك 5 لفات وياحبي لك يا برطوم وياجعلي ما اعدم هالخشة قل آمين

~CANDLE~

اقتباس:

تقول لي أمي من حصّل شي يستآهله , واعتقد انك تستآهل هاللي جاك وزود , أما باللي عرفته عنك ’ من موضوع لك وردود على الأعضاء إنك الله يحفظك , السمعة والذكر الطيّب , اتوقع لك موضوع رحلة اندونيسيا او مدري انا رديت عليك والا مدري مين
دعني أخاطب مخيخك الأيسر حاوي العلم .. وهذا الذي يدعم منتديات المساطيل بشكل تقني وفنّي .. ماعلاقتك بهذه البرآمج :
Realplayer
photoshop
frontpage

اول شي الله يخلي لك اميمتك ويحفظها ان شاء الله واشكرك يالغالي على كلامك الطيب وبنفس الوقت اتحيسب الله عليك كانك ناوي تحرجني قدام الملا بسؤالك الاخير والعفن واللي جاب لي مغص عموماً علاقتي في هاللي ذكرتهن اني كل ماضغطت ابدء ورجت للبرامج القاهن في الصفه اللي تطلع لي

اقتباس:

برنامج 99 مدري شلون جا على بالي بس من جد أبي أعرف رايك فيه من ناحيتين [ الجد + الاستهبال ]

برنامج جميل وفيه اكشن وفكرته جريئة وجديدة ويكفي انه كسر الروتين الغبي حق برامج قنواتنا البايخه دايم استمتع بها البرنامج

اقتباس:

لغات البرمجة
وهل لك شهادات فيها أم خبرة ذاتية [ تجارب و و ]

لغات البرمجه تاركها لهلها ولا لي فيها اي علاقة ولا حتى من الرضاع

اقتباس:

وما رأيك بالمجالات التالية + ورايك بمن يخوضها + نصيحتك للمقبلين على مجال منهن :
الكتابة بنوعيها التوعوية - الثقافية - و الساخره
التصميم الالكتروني [ الجرافكس ]
التصوير
الهندسة
الطب
الإعلام

والله رايي زينه مره << ياشين مقابلات القراوى
ونصيحتي ان الواحد اذا اختار منهن شي انه يخلص ويقدم كل ماعنده ويحاول يرضي معجبينه ومتابعينه بالشي اللي يليق فيهم ومايتسرع ويحرق كرته اما الهندسة والطب والإعلام فهذي تختلف وتحتاج لكفاح وصبر وجلد وعزيمة للوصول للغاية مهما كان الطريق وعراً <<< بالله كيف وانا كذا ؟

اقتباس:

ولو معك 10 آلاف ريال وش تسوي فيهن
أكيد ماتعرفني ولا اعرفك , ويمكن مالي ردود لمواضيعك بس اني اقرالك مايصادفني بالمواضيع , واخذت لي فكرة طيّبه عنك ,
بحفظ الله ورعآيته ..

لو معي 10 الاف ريال حطيتها بالرصيد الين تجي الاجازة ونزلت لك صور رحلتي وتعرف وقتها وش سويت بكل ريال فيها وحتى لو ما اعرفك يالغالي تشرفت بمعرفتك هنا والساعة المباركة والله يابعدي ولاهنت

قرطوع

اقتباس:

يا إن هالمتصفّح رد أعضاء كانت تزخر بهم الحاره .. كله علشان أبو خشم
دعلج وش تحس به وانت تحقق هالإنجاز .. ؟

والله احس بسعادة لاتوصف وانا اخوك ويكفي اني شفت اسماء عزيزه على قلبي واحبهم وفاقدهم بها الموضوع

اقتباس:

سؤالي الوحيد بعد السؤال اللي سبقه ، موضوع كتبه دعلج .. وشاف ان الموضوع أخذ من حقة .. لا تقول لي كل مواضيعك لاني ادري .. لكن اطرح لنا موضوع تحس في داخلك
أنه مايستاهل كل ماقيل فيه .. وأن شهرته واعجاب الناس فيه كانت لأن الكاتب هو دعلج
وموضوع آخر .. ندمت انك كتبته .. لا تقول كل مواضيعك لأني أدري ان كلها سامجه
وندمان عليها بس اطرح لنا موضوع واحد وعبر لنا عن ندمك عن طرحه وسبب هالندم
ولا تقول لنا لأنه سامج .. لأننا ندري .. إلخ

طيب تصدق بالله اللي ابقوله ؟؟؟ والله ما اذكر ولاتعتقد انه غرور او ثقه في مواضيعي لااااااااااااا وقسم بالله بالعكس انا اشوفهن كلهن سامجه وماصله بس مشكلتي وقسم بالله ذاكرتي 1 ميقا ومستخدم نصها بعد وادري فيه مواضيع لي مااااصله وبقوه مره بس يمكن اليوزر له دور كون انه اصبح في عيون بعض الاعضاء مميز بعض الشي ولو اني اشوف هالتميز ماله دخل وغلطانين بس الاكيد ان فيه مواضيع قلت بنفسي استعجلت فيها بس والله مذكرها والحمدلله عدت على خير وشي شال شي
ومشكور يا قرطوع ومنور يابعدي وتسلم يالغالي ولاهنت << والله منتب كفو ورده انت واجد عليك امد لك فحال تلقح به نخلكم ووجهك العفن

كبك أحمر

اقتباس:

دعلووجي ... ..
أنا من نعومه أصباعي وانا مترقب ومتلهف ومتعطش لمواضيعك .. بس أنت الله يهديك موتني من العطش وعشقته بالخامس ... ولا بصيت في المرايه .. عشان تشوف الأعضاء وهي تصاارخ وتزااعق وهي تقوول تعااااال ..... << ولا ما يحتاج تنفخ راسك زوود

هههههههههههههههههههههههههه ياخي شفت ترفيع وترييش ومهايط بس زي كذا ماشفت ارفق علي وش خليت لمايكل جاسكون ؟ لعد تنفخ زود لان جنوب راسي تطعجت ولو ينوشني دبوس انفجرت

اقتباس:

وأنا مالي مواضيع ولا لي مشاركات ... لأني أول ما سجلت كتبت (نقلت موضوع) ولا كنت داري عن الوضع ... وسحبووه للتشليح ...
وعقبه كتبت موضووع وتحطمت من راعي الديوان ومدري منهو ....
ومنذ ذالك اليوم تهشمت مجاديفي .... وتكسرن ....

تستاهل والا وشوله الطفاقه وانا اخوك ؟ الواحد مايصير عجل ويبي يدهر من اول دقيقة يتفعل فيها يوزره وانا اخوك الركادة زينه والواحد لازم يصبر ويحوق بالمنتدى ويقراء الدساتير < جمع دستور ويعرف الاعضاء ووش يحبون ووش يكرهون ويشوف المواضيع المميزه والمثبته ويبحر في عقلية الكاتب ويشوف من اين تؤكل الكتف ثم يمخمخ على موضوع يكون افضل من الموجود واللي شافه كله وبنفس الاسلوب المحبوب والناجح عند الجميع ثم يجي يرز وجهه بها الموضوع وهو واثق من التميز

اقتباس:

بس سبق وقد مرت علي خشتك... بس مدري وين فيه ؟؟ << ترا والله أني صادق مهوب شفتك في بقاله ولا مطعم .. لا لا ..... شايفك في مزرعه يعني أنت معزووم أو شي زي كذا.... بس مدري متى ومدري وش جابك برضووه

والله ياقربه وترى انا دايمن من مزرعة لمزرعة كني فني غطاسات ومهيب بعيدة اني مقابلك لان خطك ولونه مهوب غريب علي << ياشين الاستذهان الغبي

اقتباس:

س،/ وش معك سياره . . . ؟ < ودي ادري هو انت ولا لا

حراثه << طراها اني دايم في مزارع

اقتباس:

س/ كم تقعد وأنت تكتب الموضووع ...؟ موضوع العياره طبعاً

والله يالغالي مافيه وقت محدد بس عادتن من نص ساعة لساعة بالكثير حسب المخ ومطاوعة لي بالاسترسال
ومشكور يابعدي على الحضور والرد والله لايهينك

مشغوول

اقتباس:

بريد المساطيل إختفى ليه الإهمال و التقصير و التطنيش ؟

ما اختفى يابن الحلال بس قاعدين نرقم الصناديق وبيرجع كل شي زي اول واحسن

اقتباس:

- ماهي الفائده من ظهور يوزراتنا بالمتواجدين للزوار او الاعضاء ؟

الفائده عشان الواحد يعرف من فيه ومن مافيه واذا مضايقك هالشي نقشع امه ولاتزعل كم مشغوول عندنا

اقتباس:

- ليش تنفيذ إقتراحات الأعضاء سلبي من ناحية الإدارة ؟ مثال : الأيقونات

من يقوله ؟؟؟ لاتقعد تفتي الله يصلحك مع بطنك اغلب التطورات والاقتراحات واللي وصل له المساطيل من اقتراحات أعضائه

اقتباس:

- متى نشوف جوال المساطيل ؟ >>

بدون تعليق وخل كل شي بوقته

اقتباس:

- حارة المساطيل . . كم تعطيها مبلغ بمحتواها و بأعضائها و بفعالياتها ؟ بأمانه

والله وبدون نفاق ولا مهايط ولا مبلغ بالدنيا يكفي قيمتها لا بالمحتوى ولا بالاعضاء ولا بالفعاليات منتدى المساطيل كنوز الدنيا كلها ماتكفي قيمه له

اقتباس:

- متى نشوف الحاره تستضيف مشاهير مثل اللاعبين او الفنانيين او الشعراء او الإعلاميين ؟

لاتستعجل هذا انا الحين بداية الخير وبعدي يجون السلاتيح اللي قلت عنهم << تخيل اني صادق ومغرور كذا قسم بالله ان انحذف انا ومقابلتي من فوق طويق قسم بالله استهبل لاتحوم كبودكم وربي منيب كذا وبعدين وانا اخوك ماقلنا لا مانبي نقابل اذا لك علاقة بنانسي عجرم او هيفاء وهبي او اليسا جبهم نقابلهن ونقشع صورة هالحاشي اللي فوق في البنر ونحطهن بدالي

اقتباس:

- وش السالفة اللي ضيقت خاطرك بالحاره و تحسفت عليها و اتضح لك انك مغشوش ( مغشوش بالسالفه )

مافيه ولا سالفة انغشيت فيها بالحارة وبالعكس ماعمري انضربت في الحارة وانغشيت يابعدي ابد

اقتباس:

- وين اختفوا الطيور المهاجره ؟ ماذا تعني لك عبارة : مر من هنا ؟

والله الطيور لها جنحان وتروح وتجي على هواها والمساطيل وكر للصقور ومتى ماجاء الصقر وكره فيه اما الغربان والرخوم مالهن عش عندنا تلقاهن على اسلاك الكهرب وعلى روس الاثل وعبارة مر من هنا اعتبرها عبارة تعكس مرض نفسي شنيع وش اللي مر من هنا !! طيب واذا مر الله ياخذ عمره من هنا وش صار ؟؟ نعبد الشارع اللي مر معه ولا نقدسه ونكتب ان فلان مر من هنا ؟؟ ياخي النقص والامراض ماراح تنتهي ابد الا بنهاية الزمان
ومشكور يالغالي على حضورك وحياك في وقت

دلة كابتشينو

اقتباس:

يالله تحيي دعلج .. وتبقيه ..
وش اقول ماشاء الله الاعضاء ماخلوا شي ..
حبيت ارحب واقول لك اتمنى نشوف تواجدك كثير في المنتدى ..
لو طرا علي سؤال برجع ان شاء الله

الله يحييك ويبقيك يالغالي والساعة المباركة والله
ولاتقول شي ياجدي حضورك لحاله الف شي
ويامرحبا فيك انت وان شاء الله مالك الا طيبة الخاطر وبتشبع مني ان شاء الله وبتمل
ومنور يالغالي الموضوع كله وحياك ولاهنت يابعدي

لي عوده للباقين ان شاء الله