حارة المساطيل - عرض مشاركة واحدة - تعال ايها العضو لنسوي لقاء مع اسطورة العياره ( دعلج ) <- تسمع باللقاءات انت ووجهك؟!

27-04-2009, 01:46 PM

فليسكو

اقتباس:

السؤال الأول / عمر ابوراس قربت رجعته للسعوديه .. وش السواة يابو عادل تكفى دور لنا حل ..!!!

الحل سهل وانا اخوك !! اول شي انتم غيرتوا شقتكم الحين ومعد صار يدل الجديده وبكذا تكون افتكيت منه 50% والجوال اشوفك بعد غيرته وبكذا تكون تخلصت من 30% صار المجموع 80% انك ماراح تشوف وجهه وتفتك منه وبتقول لي العشرين في الميه كيف طيب ؟؟ بقول لك لاتقرب ماما نوره اللي في العليا وبكذا ماراح تقابله الا في الجنه كانك انت واياه من اهلها وهذي اشك فيها والعلم عند الله ههههههههههه

اقتباس:

السؤال الثاني / وش شعورك أول ماشفت الصنقلين (( وليد )) .. وخصوصاً يوم شفت شنبه الأصفر ..!!!

ههههههههههه شعوري لايوصف وما اقدر اعبر لك عنه في مليون سطر بس ابختصر عليك الموضوع وابقول لك اني يوم شفت موهند هاللي طايرين فيه العالم وصجه ولجه عليه ما اعجبني ولا استنكرت الموضوع ولا شفت فيه زود وكل هذا لاني شايف وليد واحرق كرت الرجال في عيوني

اقتباس:

السؤال الثالث / ليش دايم تحتقرني لأني ساكن في الخرج وانتم ساكنين في الرياض .. وخليتني أكره ابوي لأنه سكن في الخرج ووهقنا معاه .. وصرت اذا مر ابوي من قدامي أمد رجلي قدامه عشان أطيحه من زود الحقد عليه .. أرجوك واتوسل اليك وامبزيبول يابو عادل جاوبني ..!!!

لا لا لا كذا ابدري انك فاهمني غلط كل هالسنين من قال اني حاقرك عشانك من الخرج ؟؟ بالعكس انا حقرت الخرج عشانك فيها وبعدين لاتكره ابوك الله يصلحك والمفروض انك تحج عنه كل سنة اللي شقلك انت واهلك في السدرك البوقس حقته من جيزان للخرج وخلاكم تعرفون المرجله وتماشي وليد واشكاله والا بالله لو ابوك ماسوى هالخطوه الجريئه وتغرب فيك انت والقرود اخوانك كان وش وضعك الحين ؟؟؟ قااات وخياااس ووزره وتهريب زيود وتاليتها ابجي اخليك تنادي بنتي بالمكرفون من المتوسطه الخمسون للبنات ابوك الله يهديه يسمع بالهجره ويشوف الاخبار واجد وخاصه هروب المغاربه والجزائريين لاسبانيا وفرنسا وسوا في امها برزن بريك فيك انت واهلك واختار منطقه مدري وش يبي فيها الخرج للمعلوميه وقل لبوك انها منطقة نفي ولو يقدم على الحكومه انه رايح من نفسه عطوه شرهه سنويه ودفعوا له اجار بيتكم عشان مايرجع

اقتباس:

مع ان ماودي امدح دعلج .. خصوصاً إني أول ماشفته توقعته من طالبان وشكيت انه لابس لبس افغاني من تحت الثوب .. وبعدها سحبت على العيال الين حلفولي انه سعودي وجابولي بطاقة الأحوال حقته .. لكن يبقى ابو عادل مكسب لأي شخص يعرفه ..

ههههههههههههههههههههههههه كفيت ووفيت والله لايهينك يافليسكو ياعمري وياحياتي انت وسلم على موهند الخرج تكفى

الاملس
ههههههههههههههههه يالله حي ابو عبدالله
منور يابعدي واطيب الساعات والله قبل اشوفك هنا

اقتباس:

وين ساكن اول (( حارتكم))؟

اول ساكن في حي العليا بحي النخيل وملينا الحقيقه انا واهلي من هالحي البايخ ومشاكل المجاري والحفريات اللي فيه وقررنا ننتقل لمنفوحه جنب مسجد بندر

اقتباس:

وش علاقتك ببنات الجيران اول ؟

والله شف يابو عبدالله الكلام يطول في هالقضيه ولا ودي احوقها وتصير وحده منهم في الحاره مسجله معنا او زائرة ثم تقول دعلج فضح فيني بس الوكاد اني اذكر وحده منهن اسمها صالحه الله يستر عليها كانت تشبه النامي لاعب الهلال بس اجلف منه ومني ومنك ومن اي رجال تتخيله بالوجود وطبعاً كل هالجلافه يوم كان عمرها 9 سنوات وفيه اشاعة قوية تقول انها هي نفسها سعيد الصدعان راعي الطقاق والسواطير اذا تذكره لانهم اكتشفوا بعدين انها ذكر على جفاستها ولعانتها ياخي ذيك الانسانة الوحيدة اللي كسرت شي اسمه انوثه !! اي انوثه الا كسرت شي اسمة انسان كانت تصدمها السيارة وهي تمشي 80 وتقوم تنفض قميصها اللي مافيه سنتيمتر واحد نظيف ياخي اول مره اشوف قميص فيه دود واقسم بالله اني ما اذكر بحياتي شفت عليها نعال وكانت تطلع لابسة وواضح انها مسبحه غصبن عنها ومكدود شعرها وحافية الغريب اني اذكر صوت القزاز في الحيالة وهي توطي علية وهو يتهشش ولا عمرها قالت ااااي او انجرحت
الزبدة علاقتي فيها كان استغلال منها طبعاً لاني سديراوي وبزر ومسيكين وكانت هي الظهر حقي في الحاره وابن امه يلمسني <<< امحق ههههههههههه
الزبدة كانت مستغلتني اني اجدل لها شعرها على العتبه كل يوم وكانت من سعة الوجة تطق الباب واذا فتح ابوي قالت وين محمد واذا طلعت لفت براسها اللي اشوف القمل يمشي كبر الذباب وتقول اجدله اخلص << بنفخه واقعد اجدل فيه ياحبي لي وانا زي الكلب واذكر وشلون اروح اغسل يديني اول ما اخلص وكلها زيت والله ما انسى شكل المويه على يديني كني ماكل مفطح ومغسل بمويه وبس مايقعد الماء يتبقع على اليد
بالعربي يا املس يا وصخ يامفتح المواجع كنت المجدلجي لصالحة

اقتباس:

ها تلعب مصاقيل مع العيال او تلعب دبق مع البنات اول ؟

لعبت الثنتين بس اكثر شي كنت اعشقه لعبة الدبق لانها ماتجي الا بالبوبزه وانا شخص اقدر شكل البنت وهي تمشي وهي مبوبزه <<< يلعن ام جوك بعد

اقتباس:

اول حب لك كم كان عمرك ؟

في الشهر الاول من حياتي يوم بديت اميز الاشياء وكنت اذكر وقتها اني ما اتحمل فراق امي وحتى لو اشوفها تخض لي الديد اقعد اصيح ابي احضانها << الله من النصب بعد تتذكر وانت في المهاد اجل

اقتباس:

من تحب اكثر امك والا ابوك (( بزر ))

احب اكثر ((بزر)) <<< يحسبها من ضمن الخيارات منور يا الاملس والله لايهينك يابعدي وشكراً كثير

فسقان
هلا هلا يالله حي القاطع
وعاش من شافك والله

اقتباس:

السؤال الاول : هل لازالت عندك الرغبه نكمل التحدي اللي صار بينا في اول لقاء ؟

والله اني ما اذكر هالتحدي من كثر ماتحديت عالم وكسرت عيونهم لكن ماعندك مشكله اكمله وادري اني ما ادخل في تحدي الا فيه خساسه ودايم انا الفايز والمنتصر فلذلك ليش لا !! اتحداك واتحدى اللي جابوك بعد

اقتباس:

السؤال الثاني : هل انت معي ان الكتابه الساخره ما صارت مثل اول و لا صارت الناس تتقبل الوساخه زي اول ؟

شف وانا اخوك الساخره شي والوساخه شي ثاني فليش تدخل الثنتين على بعض الكتابة الساخره لازال كثير يحبها ويدورها ويستمتع فيها ... اما القذاره والوصاخة اللي تجي مكشوفة وبوقاحة فلو تجيب اكبر داشر في الكره الارضيه نقد على الكاتب

اقتباس:

السؤال الثالث : دعلج من الناس اللي تستخدم مفردات خاصه في بيئته , ماتشوف ان في هذا تحديد لنطاق متابعينه ؟

مدري يا فسقان تبيني مثلاً اكتب موضوع واحط فيه مثلاً " تؤبرني شو هالهياط كلو " !!
عشان يصير لي متابعين من لبنان واضرب المثال على كل البلدان الثانين ؟ يارجال ماهنا احسن من انك تكتب على طبيعتك وعلى شخصيتك وبيئتك ويكفيني اللي يقرون لي واللي فاهمين ثوارتي ودباشتي ويفكون الخط حقي ويوصلون لمعاني عباراتي ام النطاق وتوسعته فخله في اللي انت خابر وخلنا نشوف السؤال اللي عقبه قال ايش قال نطاق على تراب يرحم والديك << وراني حمقت عليك وقلبت كذا ههههههههههههه

اقتباس:

السؤال الرابع : كيف ينجح الكاتب في المنتديات ؟ و هل ترى ان الوضع الحالي يساعد اي شخص للنجاح او لازم مواصفات خاصه ؟

الذكي هو اللي ينجح يا فسفس << الله يلعنك حتى تدليعك وصخ زي وجهك لا جد الذكاء ينجح الكاتب ويوصله للقمه في اسرع وقت وخاصه اذا شغل مخه زين وماجاء على وجهه كله وعرف يصنع له خط سير خاص فيه ولون محد اشتغل فيه من قبل <<< اللون طبعاً مو من الالوان حقت التشكيله يا ثور اقصد في اللون يعني جو جديد وطريقه جديدة ويكون هو اللي مبتكرها ..وكثير كُتاب جدد طلعوا في النت ولازال يطلع الكثير والكثير وماشاء الله اشوفهم غطوا على كُتاب كثاااار كانوا قدام وماسكين الطاره في زمنهم والشغله ماتحتاج مواصفات خاصه وهالخرابيط الموضوع يبي فهم والمام باللي قاعد يصير ودراسة وخبرة قبل لايجي الواحد على عماها ويحوق الحابل بالنابل والخبره اقصد فيها انه يكون عارف اسلوب الكتابه وكيف توصيل الفكره بشكل ساخر غير جارح وبطريقة تجذب القارئ وتخليه هو وغيره ينتظرون موضوع جديد لنفس الكاتب

اقتباس:

السؤال الخامس : ما تعبت من سالفه خشمك و انه كبير الى متى و الناس ماعنده سالفه الا ان خشم دعلج كبير ؟ ليش ما تشوف لك شي ثاني كبير فيك علشان نذب عليه خخخخخخخ

والله اللي ظاهر للناس هالخشم ومن سوء حظي انه في وجهي بعد << بالله اجل تبي خشمك في ظهرك مثلاً وبعدين ان كانك شايف فيني شي كبير غير خشمي وحابسها بقلبك فالمساحة مفتوحة طلع اللي بخاطرك وفضفض ترى مسموح
مشكور يافسقان ونورت الحارة كلها بها الطله والله لايهينك

ماشي صح
يالله حي هالخشه وابقها وخلها لي ولاتحرمني اياها ابدن << أمه وهي امه مادعت كذا
الله يطول لي بعمرك يابو صح ولايهينك لا اول ولا تالي .. ويشهد الله انك من الناس اللي اعزهم واغليهم بقووووووه وما اقول هالحكي نفاق او رياء عشانك مدحتني ويشهد الله اني فرحت بوجودك وبحضورك يالغالي وياجعلك انت واهلك وجيرانكم وكل من يعز عليكم في جنات النعيم << قاعد اعزم انا استغفر الله العظيم
مشكووووور يابعدي والله لايهينك

تروبيكانا
يالله حيه وابقه ومشكووووور يابعدي على المقدمه اللطيفه << تذكرت خالتي

اقتباس:

س // ( 16-03-2003 ) ماذا يعني لك هذا التاريخ

اعتبره ميلاد جديد والمفروض دور كل سنه بها التاريخ اسوي حفلة عيد ميلاد في سدير واعزم القراوى وادري انهم بيفهمون غلط وبيفرشون في الزفلت واللي بيجيب جريش واللي بيجيب قرصان وبزرانهم بيشغلون الديره كلها بالشروخ والصجه وطقطقة البيبان يبون العيديه عاد عندك ناس هناك ماتصدق على الله

اقتباس:

س // لكل دولة عصر ذهبي تعرف بها , فالعصر الذهبي للدولة العباسية كانت بعهد أبو جعفر المنصور , والعصر الذهبي للدولة السعوديةالثالثة كانت بعهد الملك عبدالله فما هو العام الذهبي للمساطيل برأيك ؟

قسم بالله كني اراجع في كتاب التاريخ وبعد شوي ابخش القاعة اختبار شف ياحبيب قلبي انت صادق بمعلوماتك ولاحظ ان العصور الذهبية اللي تكلمت عنها انت بطلها يكون شخص واحد بس المساطيل عصره الذهبي الحين والجاي ان شاء الله وبطلها مو شخص واحد الكل في هالحاره هو البطل وهو اللي خلا المساطيل مطلي بالذهب ومتميز عن كل المواقع الثانية وانا اشوف المساطيل الحين في عامه الذهبي لا من ناحية التميز ولا من ناحية نوعية المواضيع واسلوب الموقع وسياسته ونوعية الاعضاء اللي فيه تختلف بعد عن المواقع الثانيه واقسم بالله ان هالحارة غيرررررر وبتبقى بإذن الله غيررر للأبد

اقتباس:

س // بما إن الاربعاء القادم الجنادرية ومثل ما تعرف ان الأجواء بتكون معجعجه كالعادة فهل تعدنا بأنك راح تنزل موضوع في الشلة يعدل الجو ويبهج جماهيرك وقرائك وتعطر هاللقاء الأسطوري به

هههههههههههههههههه راحت الجنادرية وراح عقبها 3 جنادريات وانا في هالمقابله والله اني مستحي في العيال وبس والله يلعن الظروف وابشر ان شاء الله الجنادرية الجاية لعام 1435 راح تشوف الموضوع في الشله مربوط في ظهري وسايقيني انا واياه للديوان وشطب ان قاله الله لان خبرك عقب اخر موضوع حق ساجدة آمين وهم مبصميني بالبصمة الحمراء

اقتباس:

س // بيت من قصيدة تردده دايم , أو بيت ودك تهديه لواحد ؟

بيت قديم بس احبه
خطاك انك تصدقني اذا قلت لك بنساك ... انا لو نسيت الحمد قلي وش اصلي به

اقتباس:

س // سؤال من اليوم أحاول أبعد عنه لكن شيطاني أشغلني , لذلك بأقوله على لسانه واعتبره هو اللي قايله
من هم اليوزرات النتيه اللي يعتبرهم دعلج أساتذته في العيارة ؟

كثيررررر وانا اخوك .. وفي واحد من الردود قلت كم يوزر وباقي كثرهم واكثر بعد ومشكور يابعدي على الحضور وعلى الرد وعلى كل حرف كتبته لي

كلمات
يالله حيه وابقه والله يا اسئلتك ناقص يجي مشرف مدرسة عندي ويراقبني عشان ما اغش او معي براشيم

اقتباس:

السؤال الاولاني :
لو طاح في يديك فانوس علاء الدين وطلع لك ذاك المارد الازرق وقال لك ( اطلوب واتمنى .. اختر ثلاث امنيات واحققها لك ) .. وش بتتطلب ؟

ياليتتتتتتتتتت بها الفانوس الحين !! واكيد راح اطلب وبدون تردد 1- نص مضبي من المكي 2- ببسي باااااارب 3- دراق فراولة <<<< لاتشره شف الساعة وازيدك من الشعر بيت اهلي في سدير وماكل هواء ويحلفون لو تشوف المطبخ ان تقول حشى لاعب فيه 40 جرذي مافيه الا خبز يابس ومقرم مع الاطراف وقراطيس جبن مثلث وقشر بيض مسلوق << اسهل الطبخات والا بالله في احد صاحي بيفوت المارد ؟؟

اقتباس:

السؤال الثاني :
هل حدث أن ....... من قبل ؟
- أحببت ( حب صدزي ) :

اقتباس:

- خالفت الانظمة المرورية ( وهل عوقبت على المخالفة أم سمعت تلك المقولة التي تتردد على مسامعنا كثيراً [ روح ولا عاد تعودها ] :

والله مره قطعت اشاره وقدام قسم الشرطه في سدير وماكنت ادري عنهم ومسكني العسكري وقال شف ياولد الناس قضية انك قاطع اشاره بالطقاق ومافرقت عندي بس قضية انك تقطعها قدام القسم وانا موقف بالجيب جنبك بعد في الاشاره ولاتعبرني فهذي معصي صار جنبي ولادريت عنه بعد من الفهاوه الزبدة وينزلني انا وكان معي خالي ويدخلونا القسم ويجلسونا وسوالف وانقلبت صداقة ابشرك واقسم بالله اننا متعشين على تيس مندي ذيك الليله كلنا حنا والمستلمين في القسم من عسكر وضحك وفله وفي الاخير لزم علينا واحد على الغداء واعتذرت ويالله فكيت عمري منه (( ياحبي لها السديراوية)) ويوم خلصنا وانا قاعد اغسل وبنمشي للرياض ويجي الرقيب ويمسكني عند الباب ويحط في يدي بدون لحد يشوف كنه ماد لي دراهم واخذ منه هاللي مده ولا ادري وشو ويوم ركبت السيارة لقيتها قسيمة قطع اشارة هههههههههههههههه نعنبو خيرك استح تونا قايمين من على التبسي حسبي الله عليك نعنبو خيركم حاطين لي تيس عزيمة ب 480 ريال اكثر من القسيمه نفسها وجاي تمد لي قسيمه خذت القسيمه وقلت ياولد اعتبر هالعشوه بقيمة هالورقه وكنك عازمه يا محمد وكبر راسك ورح لهلك وبالفعل توكلت على الله والحمدلله على كل حال

اقتباس:

- هربت من المنزل ( إما بسبب عنف أسري أو طيش شباب ) :

اي عنف اسري !!! وين حنا فيه يالاخو تصدق عاااد !! وين حقوق الانسان يومنا بزران ؟؟ حرام بالله ان يتلون الشايب مع رجليه على الدبغ اللي كان يجينا ياحبي له وياجعل الله يحفظه لنا ويخليه وقسم بالله جلدني جلللللللللد مايعلم به الا الله لو يمر احد ويشوفه وهو يلزخ فيني قال صبراً آل زامل مثل آل ياسر بس ماضرنا وهذاني طلعت رجال وملحوس بنفس الوقت ماقد انحشت ولا قد تعرضت لعنف في حياتي ابد ابد ابد لدرجة ان مره ابوي ذب المخده وطقت في راسي وجاء وقام يعتذر ساعة انه مو قاصدها ولا ارتاح الين قلت له خلاص مصدقك بابا <<<< مير كلمة بابا هي اللي اثبتت انك تسذوب وانك منتب كفو تقولها بحياتك

اقتباس:

- عانيت من طوارئ طبية ( وخشمك ما له دخل في السالفة ) :

لا ولله الحمد والشكر

اقتباس:

- كذبت كذبة شنيعة وسببت لك المشاكل ( وحبذا لو تذكر السالفة )

:
قل صدقت صدقة شنيعة

اقتباس:

- فزت بشيء عن طريق الحظ ( وماذا كان ) :

قلب حبيبتي <<< سوا فيها ابو الرومنسيه

اقتباس:

السؤال الثالث : ما ....... ؟
هو أعز وأهم ما تملك :

غشاء بكارتي <<< يحسبها للناس كلهم

اقتباس:

هي أسوأ أغنية سمعتها :

اص حبيبي اص للفنان بدر الحبيش على ما اعتقد

اقتباس:

هو أحسن ما حدث لك هذا الصباح :

رساله من امي وهي تقول صك الديمنو تراه يعلق لايفيض الخزان ويقطعون البلدية عنا المويه

اقتباس:

هو أول ما فكرت به عندما استيقظت هذا الصباح :

الدينمو

اقتباس:

هو أهم ما تذكره عن السنة الماضية :

امس ما اذكره تبيني اتذكر السنة اللي راحت ؟؟؟ خبل انت ولا تستهبل ؟

اقتباس:

هو أسوأ شعور في العالم :

ان تدري انك مريض بمرض خطير وماعندك رصيد اعمال عند ربك

اقتباس:

هو أروع شعور في العالم :

انك تدري انك مريض بمرض خطير ويصير عندك رصيد اعمال عند ربك
<< الحمار بيسوي ذيب بسم الله علينا وعليك وعلى السامع من الامراض الشينه والله يجعل العافية ثوبنا وثوبكم ان شاء الله

اقتباس:

ذا يوجد تحت سريرك :

لازم الاحراج يعني ؟ ياخوك ماعندي سرير كلها مطرحه من 12 سنة وانا ازقلب فيها من غرفه لغرفه لدرجة انك لو تطقها بيدك بقوه عجت الغرفة وقعد الغبار يوم كامل
مافيه شي تحت سريري وكل المجلات اللي كانت موجوده احرقتها وصليت ركعتين واستغفرت لربي << لاتصدقون وجع وقسم بالله منيب من اهلها

اقتباس:

هي الجهة التي تنام عليها :

على وجهي والدليل خشمي انا الانسان الوحيد اللي اقدر اقعد على منطقتين في جسمي طبعاً وحده معروفه مابي اكتبها وخشمي والصدق انام على الجهتين ولازم اتقلب شوي كذا وشوي كذا كني حبة دجاج على الفحم

اقتباس:

ذا يوجد على حائط غرفتك :

ضاطور لو تشوفه ان تطق الحق معي انه ضب ناقصه عكره بس بدال هالذنب الاملس الله ياخذه وبعدين حاقرني ولاطق لي خبر واجي اهشه بيدي واهوب عليه بالنعله وكل اللي يسويه يرمش بعيونه << الا الضاطور له رموش ؟

اقتباس:

أكثر ما يثير أعصابك :

الغلط

اقتباس:

الذي يبكيك :

الشي القوي مره

اقتباس:

الذي يضحك :

اي شي خالي من المصاله

اقتباس:

أتفه سؤال اضطررت أن تجاوبه ( غير أسألتي ) :

مابعد صادفت سؤال تأفه ابشرك

اقتباس:

هو حلمك الكبير :

اسمع احد يعيرني بيوم من الايام ب " الافنس " عشان خشمي صار صغير
واشكرك اخوي واعذرني طمرت بعض الاسئله لاني تعبت وراحت ام اللياقة
ومن جد مبسوط فيك وفي حضورك وفي اسألتك الجامدة
الله لايهينك يابعدي وماقصرت

الدفاية

اقتباس:

وايش مخبي كمان من جرائم الحيونات يامجرم ؟؟؟؟؟؟؟؟؟؟؟

هذا بعض من فيض وانا اخوتس وياما بتشوفين
مستحي اسولف عن العنز اللي شبينا فيها عشان نموت الحشرات اللي ناشبه في ديودها وكان حادثه ترى مو مقصوده جبنا الكبريت انا واخوي وشبينا في حشرة " القراد " وكان شعر العنز الله يهديها طويل << الحين هي السبب اجل المهم ويعلق الشعر وتشب وتنطلق ركض والضيان مولعة تحتها وحنا نركض وراها نبي نطفيها واشوى لحقنا عليها في الرمق الاخير يوم انحجرت في غرفة الغنم وقدرنا نطفيها وكان ديدها كله محترق ويصب ماء وجوايا وعقب 3 ايام ماتت موته طبيعيه وحتى لو ان ابوي لعن خيرنا وقال ان حنا السبب لو احنا السبب ماتت في نفس اللحظه << كل تبن بس

اقتباس:

برايفت دعلج
ايش دوك بريطاني ؟؟ لايكون قصدك ( دوق ) وخايف لاينادونك الكلب عقب الترجمه خخخخخخخخخخخخ

جعل الدوق يعض وجهتس قولي آمين انا اقصد بالدوك اللي هو الامير البريطاني واذا ينطق دوق فبطلنا خليني على وظيفتي اللي انا فيها ولو انها على بند الاجور راضي ولا اصير تسلب اخر عمري ومشكوره وانا اخوك على الرد والله لايهينك

الخدرعي

اقتباس:

آيام سوري على التأخير ...
دعلج ..فليسكو فسقان.....ياخي أسماء في قمة العيارة..وبصراحة العيارمن غيرهم..
معاد لهاا طعم..ياخي تحس أنهم دشيير من جد...هههههه وفاهمين أم اللكاعة..فسرلي
سبب هذا الانقطاع..يعني أستاجرتم أستراحة وسحبتم على المنتديات ولا وش السالفة..
ولا شفتوو العالم طايرين فييكم ..وصكيتوهاا ثقل:......نورني علمني فهمني ههههه

ههههههههههههههه اول شي حياك وانا اخوك وقضية الانقطاع اسبابها الاشغال وكثرة الارتباطات واكيد لابد ماتختلف الامور عند البعض منا .. اما سالفة شقة وسحبة على المنتديات فلا والله ماصارت بالعكس المنتديات لها مكانة عندي وعند غيري ومانستغني عنها ابد مهما انقطعنا بس انت خابر هذا توظف وهذاك تزوج وهذا عندة شوي ظروف وهذا انتقل لمكان وهذاك سافر و و و و
بس صدقني " لابد أم سُحب ان تفارق وتظهر اشعة ام سمش من جديد " << جيزاني بيتميلح بمثل

روبرت دينيرو

اقتباس:

السوال أستاذ دعلج::
(هل لديك نية الاتجاه لكتابة مسلسلات كوميدية ؟وهل سترفض إذا اتاك عرض كتابة مسلسل ؟)

ليه لا ؟؟ وماراح ارفض لو يجيني عرض اكتب كلمات اغنية غربية بعد

اقتباس:

(اتمنى ان اراك كاتب كبير كوميدي من أجل ان نتخلص من مصالة عامر الحمود وحرمته
أيضا نتخلص من الكتاب الذين هم با الاصح نصف عقل من احترامي الشديد .)

شكرا ووجهة نظرك ما اقدر اقول فيها شي بخصوص بعض الكُتاب والمخرجين
ومشكور اخوي وماقصرت بها الطله ولك مني اطيب الاماني لك بالتوفيق

هكس

اقتباس:

حاولت استصيغ الوضع واتخيل فرحته مااااش ماقدرت
اصلا لو رجعنا للموضوع فوق وناظرنا الحقير نكهة الديزل ذا اللي مسوي برىءءءء وهو احد اهم اسباب ضياع ذا السبهه دعلج
لعب فيه بالتريييييش .. من جد البلد مليان مشاكل
انا لاتعليق بصراحة
هو صحيح انك محسوب علي خوي بس اعذرني ما اقدر اسئل والا اعلق اكثر من كذا خصوصا اني الفترة اللي راحت كنت امر ببعض الظروف فخلني بعيد ياوصخ لاني وربي باجيب العيد

هههههههههههههههههههههههههههههههههههههههههههه
هههههههههههههههههههههههههههههههههههههههههه
قطع الله وجهك على هالمداخله الوصخه والقذره يا خسيس
وبعدين انا داري وش حارق رزك ووش قاهرك ومخليك ماتواطني بعيشتك
رضيت ولا انرضيت هاني وولف سحب البساط من تحتك وحطك فوق شوك كل الوقت تحكحك في عمرك كنك من ربع حسن بلونه
لله درك يا هاني وولف وعسى الله يجيب ايامك يوم انك خليت هكس ماضي واشغلت العالم فيك وفي قدراتك والله يلعنها من ساعة يا هاني اللي صرت فيها صديق لك وخليت هكس يكرهني ههههههههههههه
مشكور ابو عذاب ونورت بها الطله وحتى لو هالطله شين مثل وجهك بس ماعليه عزيز وغالي ومقدر وضعك وضعفك والا كان علوم

الحب اللي كان

اقتباس:

اثرك طلعتا خالي وانا مدري

ههههههههههههه والله الشرف لي ياولد اختي بس اثبت هالحكي ؟؟ هل في فخذك الايسر حبة خال كبر القبون ؟؟ اذا ايه تعال بالاحضان

اقتباس:

وش يعني لك ملعب الجنوبيه منول ايام الردميات

والله ياخوك مدري وش هالملعب ماتدري يالواحد انت تلعب قيم ولا تطعس اول مره اشوف ملعب الحارس مايشوف باب الحارس الثاني لانه ورى جرف ماتدري الا وهالجمه جايينك من فوق جبل يركضون ووراهم العجه بس كانت ايام

اقتباس:

طيب شفتا النزله الي ونت طالع من الجنوبيه اذا جاء مطر تمتلي وتتفايض ..
الصدق قد شفت واحد يصيد ضفادع عندها ويوم شفت صورتك ذكرتك يالخايب ..
فإذن ماذا تعني لك هوايه صيد الضفادع منول

ههههههههههههههه ياخي شكلي مكشوف وحتى اللي بالطيارة وعلى ارتفاع 35 الف قدم لو بيطل مع الدريشة بيشوف ظهري وانا جنب المنقع من كبري وهالهواية مشغله بالي ومخليتني الحين افرررررك في يديني ودي اصيدك

اقتباس:

طيب وش رآيك ف المعشبه وهل تتوقع لها مستقبل باهر .. خصوصا انها تربط الوشم .. بسدير ..يعني تتوقع تصير فيها جمرك وكذا ..
وتقبل ودي ... سعد

المعشبه على كلام جدي يقول انه هو و3 شيبان معه مكتشفين البترول قبل العالم كلهم يقول بس ماكنا ندري وشو يقول شي اسود نطلعه من الارض وقلنا يمكن انه زيت وصرنا ناخذه في قوارير ونعطيه الحريم يدهنون به روسهن الجهل ضيع مستقبل جدي ومستقبل احفاذه والا كان الحين تطلع الدوله اسمها المملكه العربية الزاملية << اقول الفقها لايعلقونك برجليك ويطلعون البترول اللي قد دهنت به جدتك راسها من بطنك
مشكور اخوي سعد والله لايهينك ونورت يابعدي

اعتذر عن التأخير لظروف خارجة عن الإرادة
ويشهد الله مستحي فيكم وفي مشرفين الشلة
اسف اسف للجميع...

لي عودة ان شاء الله بس هالمره قريب ان شاء الله