حارة المساطيل - عرض مشاركة واحدة

29-06-2009, 04:27 AM

مدخل { ..
بين زاوية منفرجة وزاوية حادة وزاوية قائمة
مبنية من أضلع مختلفة الأطوال يتكون المثلث المتكافئ
الأبناء ( التلاميذ ) & الأباء & المعلمون
أصبح الأن للأسف مثلث غير متكافئ

* ~ كلمات .. صيغ .. عبارات // تمر مرور الكرام على أسماع البعض من المعلمون والأباء وتظل عالقة بذاكرة الأبناء والتلاميذ ..
- أنتَ فاشل & وأنتِ غبية >> لِما لا أعرف توصف البنت بالغباء والولد بالفشل ؟ ما علينا ندخل بالموضوع

لو أخذنا التعليم من بدايته فى المرحلة الأبتدائية ..
الأم مثلاً بتعمل الواجب مع أبنها فرضاً بتعمل واجب الحساب والولد ما بيحب الحساب بيحب العربى وشاطر بالعربى بس مش شاطر بالحساب .. !
تقعد تقوله أنت فاشل ولا هتنفع فى أى حاجة مع انه شاطر فى ماده العربى وممكن جداً يكون أديب كبير أو شاعر .. وتلاقيها كل ما حد يزورها الولد دا مش هينفع ما بيعرفش حاجة فى الحساب ..
وتبدأ بهذه العبارات القصيرة والتى تراها عابرة وتتردد على أسماع إبنها ترسم لأبنها أو بنتها قالب من الفشل وتضعه فيه .. ويبدأ الولد يشوف نفسه شخصية فاشلة ومهزوزة ثقته بنفسه وأحياناً البعض منهم ما بيحاول أنه يعمل حاجة لآنه عارف انه فاشل وبشهادة أمه .. هذا بالأضافة أنها بتجعل من إبنها شخصية جبانه دائماً واثق من فشلة

* تيجى الأبله بتاع المدرسة المعلمة الجليلة الفاضلة تتطلع الولد على السبورة اللى ما عرف يحل مثلاً مسألة من مسائل الحساب..!
أو يكتب جملة كاملة بالعربى وتخلى الفصل كله يتفرج عليه وهى بتعاقبة .. وتنعته بالفاشل وتقارنه بأصدقائه اللى معاه بالفصل والعيال طبعاً بتضحك عليه والولد بتحطم جواه حاجات كتير وبنكسر من جواه جداً
مع أنه الولد شاطر برياضة معينه وله أستعداد لتعلمها وله ميول أخرى ومواهب بس للأسف الأبله ما عندها فرصة تكتشف أو حتى تفكر مجرد تفكير أنه بتحطم طفل صغير ورجل المستقبل
ولكن الأبله عاوزة تشعر بالسيطرة على الفصل وتخلى كل الطلاب يجيبوا بمادتها اعلى الدرجات بالغصب والعصبية وقهر التلاميذ

دا طبعاً بيحطم الأطفال تحطيم ويقتل حتى جواهم أى حلم أو أمنية ويسد الطريق الأمال فى حياتهم

* ~ من المواقف اللى قهرتنى فى الحياة الفترة اللى فاتت ودفعتنى لكتابة هذا الموضوع ..

[ 1 ] صديقة ليا تشتكى من إبنها ومستواه فى التعليم قدام إبنها
لو تشوفوا نظرات الولد لمامته اللى هو لم يتعدى ال 4 سنوات تحطيم تحطيم

[ 2 ] المدرسة فى مدرسة محمد إبن خالتى اللى عنده 6 سنين كتبه لها فااااااااااااااااااااااشل بالبونت العريض بكراسته ..
فى حين أنه محمد والله العظيم الله أكبر عليه معدل ذكائه عالى ونبيه جداً وكل درجاته النهائيات بس على شان حل مسألة غلط والأبله أتعصبت منه .. وهو راجع يبكى من المدرسة كنت عاوزة أروح أخنق الأبلة الحقيقة لآنها تفتقر للأسلوب التربوى فى التعامل مع عصب الأمة القادم المستقبل

[ 3 ] كنت عند قريبة ليا برده وكانت تحل مع إبنها الواجب وهى بمنتهى العصبية .. وأقول لها هدى نفسك تقولى دا واد غبى .. وهاتك زعيق ووتقوله يابنى أرحمنى حرام عليك اللى بتعمله فيا دا .. عاوزة اقولها حرام عليكى أرحميه أنت
المهم قلت لها قومى الله يكرمك اعملى لنا حاجة نشربها على ما أحل معاه الواجب ..
تقولى وهى ماشية الواد مش نافع >> ببقى عاوزة أحدفها باللى قدامى بس بتكون مشيت
والولد بالهداوه والله العظيم بيعمل كل حاجة وتمام التمام

[ 4 ] أم بتقولى الولد بيكسر كل اللعب بتاعته مش عارفة أيه العنف دا ؟
وبدأت تخبى منه اللعب وتطلع له لعبه لعبه .. [ عاملة ناصحة ] الهم أكثر شى بيجذب الولد اللعب المتحركة عربيه أو قطار .. يكسر اللعب .. ولما سألته مامته ليه بتكسر لعبك قال لها عاوزة أعرف بتمشى إزاى .. الله والله ولد ذكى وله مستقبل
قلت عنف إية الله يهديكى دا حب أستطلاع ليدرك العالم من حوليه ودا شئ يفرح
المهم المدام دية بالذات عمله نفسها دكتورة ورئيسة قسم فى كل شئ وتقول عليا هابلة ما هعرف أربى عيل

* للأسف فى بعض الأمهات تحطم الأبناء بس بعدم فهمها لميولهم ورغباتهم .. أو نقدر نقول أنه أفكارهم لم تتوافق .. ولا ننكر أنه هنا بتكون أفكار الأبناء أعلى مستوى ممن حولها من أباء ومعلمون .. فعجز الأباء والمعلمون عن فهمها فهاجموها

من المواقف اللى أسعدتنى جداً كنت قاعدة مع مدرسة فى مدرسة إبتدائى والحق لم أراها من قبل تقابلنا فى عزاء والدة صديقة لنا { الله يرحمك ياطنط أميرة } المهم تقولى أكتشفت انه فى ولد عندها بالمدرسة يعمل شى أشبه بالأختراعات وهو الله أكبر 9 سنوات .. ويفاجئ المدرسين .. فلما سألته الأبله قالها انه مامته لما تيجى على باله فكرة كويسة تساعده أنه ينفذها لذلك الولد الله أكبر عليه .. هى تُجزم أنه هيكون مخترع لا محال ..

أقسم بالله اللى شفته تحطيم تحطيم تحطيم للأطفال وطموحاتهم وأحلامهم >> مقهورة

* من الجهه الأخر لما العيال تكبر
حالياً فى بعض الأحيان نشوف الأباء ما يعطوا فرصة لأبنائهم أنهم يختاروا أى مجال يحبوه أو يدرسوه .. على سبيل المثال الأم مثلاً عاوزة بنتها دكتورة أو مهندسة والأب عاوز ابنه ظابط وطيار ومحارب و.... و... كل أب وأم عاوزين أبنائهم اللى هما تقريباً فشلوا فى تحقيقه .. ولو الأبن أو البنت ما لاقوا نفسهم بهذا المجال يبقى الولد فاشل والبنت غبية ..

للأسف عندنا تعصب للرأى وفهذا المجال بالذات فرض وسيطرة من قبل بعض الأباء والمعلمون على الأبناء والتلاميذ ..!
فبأيدى هذين الضلعين إما إقامة الضلع الثالث أو تحطيمة

وفى الحين أنه هذين الضلعين لو تكاتفوا لإقامة الضلع الثالث سيقوم بزاوية قائمة
رائعة الجمال ومثيرة ..

- فقط على الأباء محاولة أإتشاف مواطن المواهب عند أبنائهم وتعزيزها وتقويمها
ولا نحقر أبداً أى قصور فى المواطن الأخرى لآننا بشر ومستحيل نلاقى شخص متفوق فى شتى المجالات .

- إعطاء فكرة لأنفسنا بأننا نُخطئ وليس كل ما نراه صحيحاً فهو صحيح
وتقبل الرأى الأخر .. حتى لو كان من أطفال .. لآن الطفل لا يدرك أنه مجرد طفل
ولا يدرك صغره .. لكنه كائن مفعم بالأفكار والحيوية والطموح فلا نقتلها دون أن نراها

- أتمنى اللى عنده مواقف تحطيم أو مواقف بناء لعصب الأمة القادم يسدحها
حتى نحاول أننا نستفيد من أخطأ الغير كى نتعلم كيف نعامل أبنائنا فى المستقبل القريب

{ ..مخرج ..
الأسرة