الموضوع يحتوي في طياته على البعض من الذبات لكنه القصه من الواقع وليست من الخيال
في عام من السنين الماضيه والعصور السحيقه مبطي حصلت احداث هذه القصه
في العام 1991م حصل فيه التغير الفيسيولوجي للمتسلقي بلهفه 
لكن سنرجع للوراء سنه فقط
سأحكي لكم احداث يوم من الايام وهو روتين يومي يجسد لكم حياتي
صحيت الساعة 6:45ص قمت امغط عيوني الي كنها مدخل بطاقة الصراف
غسلت وجهي ورحت للوالده_الله يطول بعمره_ وجلست اتقهوى معه امي بشكلها المعهود الذي لم يتغير منذ اول يوم رأيتها
لافه الغدفه على راسه لابسه قميص روز مره اخضر ومره ازرق و خاتم في اصبعه البنصر من يدها اليمنى وله فص اصفر فوق يحلفون انه قبة الصخرة موب فص من كبره
وانا امضغ احد التمرات المقدمه امامي الي من نوع سكري
وأتابع مع امي السلام الملكي رغم اني لا انا ولا امي نود ان نتابع لكن اذا غيرنا القناة وين نروح
قالت امي وين انشاءالله اليوم بتروح قلت لها وانا كلي احباط ياحوبيلتس بس ياأوميمتي
وين بروح يعني اكيد بروح لسوق الخضرة ادور لي شحنة جح(بطيخ) او جرو(شمام) او أي شي يستسيغه الانسان وسعره رخيص اشتريه وابيعه عند اقرب تقاطع
امي الله يرزقك الرزق الحلال ويبعد عنك عيال الشر والشرير>>>الشر معروف بس الشرير وشو؟ 
شغلت الددسن وهي موديل 88 ديكور كحلي بدون مكيف ومركب جواعد على المراتب 
شاريه من عرق جبيني بسوق الخضره
المغزى شغلت الموتر بعد التشغيل ارفع راسي الى المرأة العاكسه وارى وجهي فاقول اللهم لك الحمد اني حي عشان اشوف وجهي كل يوم....
هذبت شنبي المنتفش باصبعي الابهام والسبابه وادق الريوس
وانا اسوق بالطريق امر بجوار محل السباكه الذي يمتلكه جارنا فاضرب لوه بوري فيرفع يده مرحبا ويقول بينه وبين نفسه الله يخلف على ابوك
اشب زقارة على الريق من نوع مالبورو احمر واضع البكت بين المثلث والديكور ليتكمن الاخرون من رؤيته
الاشاره الاولى اقف فيها يوميا و يقف بجواري زوج عمتي ويهنئني يوميا على نشاطي
لان لوه ولد يحوم التسبد ينام اذا قامو الناس ويقوم اذا نامواالناس صاير كنه سحا (خفاش)
بعد مااتجاوز الاشاره اشغل المسجل صوت عبدالله السالم يغرد في ارجاء الددسن المعموره اغنية عطني عهد وانا امتثل لك واصافيك ولا ترا مابيننا ماله اساس
اصل لسوق الخضره فابتسم لهذا واحيي ذاك واسوي حركه باصبعي موب زينه لدلال قد لعب علي
ادور بين اكوام الجح والجرو بحثا عن الطيب المتنبي...قصدي بحثا عن الطيب الرخيص
اجد مبتغاي ثم احمله واذهب الى تقاطع يمر فيه من هب ودب والتقاطع ذا ملئ بالسيارات التي تغص بحمولتها من جح او فصفص (مكسرات) او ثياب مستعمله
فاقف بينها واحيي جميع المتواجدون الا واحد له اكثر من ثلاث سنين يبسط معنا ولا مره فطرنا
انتضر زبائني كما ينتضرهم الاخرون... و ينتهي يومي بغياب شمسه وقد بعت اغلب الكوم
فاخذ ماتبقى منه اهديه على جيراننا مع ان اغلب جيراننا عمومتي بس يالله
اروح للبيت اغير ملابسي اجلس مع الوالد حيث انه له قهوة كل مغرب فاتقهوى معه واسأله عن اخبار المعدات<<الله اكبر عاد يالمعدات شيول وقلابي بس
لاكن.....
في يوم من الايام واثناء جلوسي مع ابوي دار الحوار التالي
الا وهو
-ابوي: متسلقي ورا ماتكمل دراستك وتاخذ شهاده وتتوضف مثل الناس 
-انا:والله اذا على الوضيفه هذا شي خالصين منه انت تعرف اني اكره اني الزم روحي بدوام>>ظامن الوضيفه
(((((الى الحين الوضع FREE)))))
-ابوي: بتكمل دراستك غصب عليك انت الى الحين بعطله ؟ عطلنا بالصيف ورحت تشتغل بالجح والى هاليوم وانت معطل لك اكثر من ثلاث سنين
-:انا يابوي خل موضوع الدراسه.... اذا الناس كلهم درسوا وتوضفوا من يبي يجيب لنا جح وبردقان وخضره
لازم يصير ناس متوضفين وناس يكرفون كرف الحمير عشان راحة المتوضفين
ابوي سوى حركه بيده ومعناها كش مالت عليك
نزلت الطاقيه من راسي وجلست احك شوشتي
والحك هذا مثل الهندل حق المكاين الاولات احك واحك واحك ثم يشتغل مخي طبعا ماتطلع الفكره على طول يبي لي نصف ساعة ساكت ويطلع مني اصوات مثل صوت المودم اذا شبكته دايل اب
جت فكره براسي وهي من نوع "جينيوس" أي عبقري
قلت افتح محل خضار وفواكه بحارتنا بما ان السوق لازم تروح له بالسياره اذا فتحت المحل يبي يتعيجزون الشيبان انهم يروحون للسوق فياخذون من عندي
بعت الددسن العظيمه واشتريت ددسن قديمه جدا عشان اوفر فلوس للمحل
بعد شهرين تم الافتتاح >>>موب كله من فلوس الددسن تسلفت ضعفهن اربع مرات
اول يوم : يافتاح ياعليم يارزاق ياكريم
ياريان احمر يارياااان ياريان احمر يارياااااااااااااان
اول زبون شايب من نفس المقاطعه الي انا ساكن فيها بس موب نفس الحاره
-انا يالله حيوه ياهلا والله 
-هو: بكم الكوسه>>>وجهه بارد
-انا: ب12 السطل الكبير
-هو: الله اكبر وشو لوه الغلا عند ابوسليمان بالسوق ب11 السطل
-انا: الريال ذا فرق المسافه عن السوق
-هو: لا السوق توي جاي منه وشاري مقاضي البيت مير( لكن) قلت ابمر اشوف وشو هالمحل الجديد
-انا: ايه تسذا اجل ياخال موترك يدحدر الحقه لا يصدم الجدار.... صدّقن الدبشه وراح يركض للموتر ولا رجع
بعد مرور 3 ساعات
انا حاطن يدي على خدي وانتظر زبون يدخل بالغلط
يالله حيوه هلا والله امر ياخال
-الشايب: بكم الطماط
- انا: بخمس طعش
-الشايب: اعوذ بالله نهابه تسرق الناس انت عند ابوصالح بالسوق باربع طعش ونص 
- انا: ياخال شايف انت السوق وزحمة السوق والاشارات الي قبل السوق...و
- الشايب : لاماهنا زحمه مير انت مبعد عن الناس تبي زود ريالين تسرقهن من الي مايعرفون
- انا: ياخال الحق على كفر موترك ينسم رح للبنشر قبل يقضي همن تبلش ماحولك احد
- الشايب:؟؟؟؟؟>>>>راح يركض الصتيمه
-يدخل عمي يحمل الجمس
-انا : الحساب ياعم
-عمي: هو بين الاقارب حساب
يضحك ويروح محمل باكثر من ميه وخمسين ريال هو ووجه وجه الحراثه
يدخل خالي يحمل موتره
انا بكل براءه : الحساب ياخال
-خالي: خذ الحساب من ابوك لاني جايب له امس سطول تمر ولا حاسب عنهن
بعد مرور شهر
عرفت جميع شبوك الغنم الي حولنا لاني كل ليله اروح اعطيهم الخضره الي مابعته>>>ايقالي بايع شي
ساءت سمعتي بين اقاربي وذوي وعشيرتي الاقربون وقد قيل عني كل ماهو مقزز
قيل...انني طمااع
قيل...انني احجر البزران بالمحل
قيل...انني ابيع خضره فاسده
مع العلم اني من يوم افتح المحل اخذ مكسب ريال او ريال ونص بالسطل
مع العلم انه ماقد دخل علي ولا بزر...اصغر واحد دخل علي عمره يكتب حروف وارقام من كبره
مع العلم ان الخضرة اجيبه طازجه يوميا والفواتير موجوده الى الحين عندي
واغلق محل المتسلقي بلهفة للخضار والفواكه
جلست بالبيت يومين محبط وعلي ديون الى راسي او ارفع من راسي بشوي
اجار المحل و قيمه 80% من الخضره الي كنت اشتريها ولا ابيعها و فواتير كهرب و الفلوس الي تسلفته عشان افتح المحل
التفت لليمين فأرى طفايه سجائر قد عثا عليها الغبار لاني لم اجلس بالبيت مرتاحا كي ادخن>>>يلعن اوم الدشره يدخن بالبيت
اقرب الطفايه واشوف وراه ريموت التلفزيون
جبت الطفايه والريموت واشغل القناة الاولى
الساعه سبع المغرب اشغل القناة الاولى
مسلسل بدوي جواهر والشيخ حمد الي بالبر معهم جموس جدد على وقتهن
اتابع المسلسل وانا فكري موب مع المسلسل ابد
من غير شعور فريت على القناة الثانيه
واشوف برنامج في البر في البحر وعلى الماء>>>>ياقدمي
لكن فيه شي شد انتباهي بشده
الا وهي وحده مع المنظمين او الحكام طخمااا بمعنى الكلمه
انا يوم شفته بدا قلبي يقربع كنه غساله ام عمود
ومادري وش الي مسكت معي الا بروح اشوفه على الطبيعه
وانتظر لين انتهى البرنامج ويجيبون المونتاج والاخراج ومادري ايش اهم شي سجلت أي كتابه بالانقليزي طلعت لي بالشاشه
ثم نمت وانا اهوجس بها الحرمه
واشرقت الشمس...
-امي: قم ياوليدي لا تتاخر على السوق
- انا: مانيب رايح سكرت المحل
-امي: ايه اجل نم واذ صحيت اسألك وش السالفه>>> غريبه عجوز وتصبر عن السواليف
قمت وقلت لامي عن كل شي
-امي : طيب وش بتسوي
- انا : والله شوفت عينتس عساني فداهاا ماباليد حيله غير اني اروح لاي ديره وابدا من جديد
- امي : هقوك ان الامور تنضبط
- انا: ايه وش دعوا الامور ماضبطت هنا عشان اخوتس الصرم وعمومتي الفاغرين جيدين بالتحميل و انسي انهم يطلعون ريال
-امي : يجي ابوك وقل لوه كل السالفه اغديه(يمكن) يعاونك ولا يشوف له صرفه
- انا : يصير خير ان شاء الله
جا ابوي بيتقهوى قهوته المعهوده كل صبح قبل يروح للشغل
انا منزل راسي والعب باصابعي بالفرشه ومركي وجهي الكبير علي يدي اليسرى وشاخص الانظار واسمع تجغم ابوي للقهوه كنه يشرب حبيبات موب قهوه على التجغم
- ابوي: عسى ماشر ياوليدي
- -انا : والله الشر بعينه وعلمه
- ابوي : افا وش السالفه
- انا: والله المحل و و و...............
نظر الي ابي نظرة المحنك الذي اكل منه الزمان ورماه لانه يابس
وقال : ياوليدي لو انت من مبطي طالع عن هالارض ثم لامنك تواسيت وزانت الامور تجي وتضرب اطنابك هنا 
قلت في نفسي هذا الي ابيه قلت لابوي يالله هات دريهماتك واروح استرزق
بعد جهد جهيد وعناد ومطاوعه اقرضني ابي مبلغ ثلاثين الف ريال كلهن مربوطات بسير مغاط
وحاطهن بكيسه سودا مكتوب عليها " اهلا وسهلا" " نتشرف بزيارتكم"
اخذت الفلوس وانا اكتم ضحكه خفيه قلت جايك يالطخماااا 
اليوم بالجوازات بكره بالخطوط حاجز على فرنساا بعد يومين اجهز الشنطه وامي تدعيلي يالله ترزقه وتبعد عنه عيال الشر والشرير
التفت على امي واقول قولي وداعا للدجه فمع المتسلقي للخضار انتم الاغنى
وانا اقول بنفسي ايه هين خضار ان ماسويت بلبله بفرنسااا عشان هالطخما ماكون المتسلقي
الركاب المتجهون الى فرنسا على الرحله 4873 يتوجهون للبوابه رقم 4 وشكرا
على المسافر المتسلقي بلهفه بن حمد التوجه الى مكتب الامن
المطار زحمه ومكيفات وقزاز وانا ادربي دميجتي رايح لمكتب الامن
دخلت المكتب وسألوني سبب السفر لحالي وان الامر مشككو فيه قلت لهم لا كل شي على مايرام واني بروح اجيب جح من فرنسااا
حسوا ان الثوب مابه احد ومشوني
في باريس
شهييييييق .... زفييييييييييير شهيييييييييييييق ................. زفيييييييييير
يازينتس يادار خلي
وانا في صالة الوافدين انظر ذات اليمين والشمال بحاحثا عمن يمكنه مساعدتي
فاذا بي المح من بعيد وجها عربي الملامح وقد بانت الابتسامه على محياه
في هذا الوقت انا اقدم قدما وارجع الاخرى >>>يعني مفوحج
مترددا محتارا بالخطوة التاليه..... وصل الي وقال السلام عليكم
انا من الفرحه تعنقطت بوه
ودار بيننا حوار وقد حذف للاختصار
وعلم ماذا اريد ومالذي اتى بي الى هنا واكرمني بشقته المتواضعه
في صباح اليوم التالي رحت اتمشى بالمدينه وبأسواقها واعرض على كل من رأيت الورقه التي كتبتها من البرنامج لعلي اجد من يدلني على بيت فاتنتي
وللاختصار وعدم الاحراج
بعد يومين من سؤال هذا وذاك اهتديت إلى الاستوديو الذي تعمل فيه فاتنتي وعلمت ان اسمها كاترين
وحجزت موعد لمقابلتهاااا ولكني لم أرها بعد
في الليل لم انم اتقلب يمينا وشمالا حتى تسحلت جنوبي من التقلب افكر بفاتنتي كاترين
هل سأعجبهااا هل هي متزوجه هل هي ترغب بشريك في شقتهاا>>>طموح الولد
ولم يقطع تفكيري الا الصباح بصخبه وازعاجه
هممت الى المغسله وغسلت وجهي وحلقت دقني الي ماينبت منه الا الكنادر
افطرت من ما لذ وطاب من التوست المحمص والجبن الفاخر في شقه زميل الغفله
ها أنا ذا اهب من الكرسي مستعجل الخطى الى استوديو فاتنتي كاترين
ادخل الى الاستوديو برفقتي مترجم قد سعى به زميل الغفله صحيح انه مترجم بس يبي له مترجم مايعرف وش اقول البهيمه
طرقت الباب فاذا بصوتها من الداخل يقول كامييين والمترجم يقول تراها تقول ادخل. ناظرت المترجم بعين حارة مفادها وش قالو لك اني حمار ماعرف كاميين >>>ايه
دخلت فاذا بي اجد عاملة النظافه تنظف المكتب وكانت كبيرة السن قد التوى مرفقيها مع مرور السنين
فقلت لها اين كاترين....
قال لي المترجم هي كاترين
- قلت لوه انا اقول اسألها منب اسألك انت
- المترجم : ايه وهي جاوبت تقول انا كاترين
- انا : ابي مقدمة البرنامج
المترجم يرطن شوي
- المترجم : تقول انها هي مقدمة البرنامج
فأخرجت مجموعه صور قد اخذتها من اشرطة فيديو
فقالت انا هي التي بالصور والصور هذي قبل اكثر من خمس طعش عام
- انا : اوما عاد انتي كاثرين شوفي وجهتس يبيله كوي ولا الحبوب الي بالخشم صاير كنه عظم ضومنه
المترجم يرطن معه ويقول تراه يذب عليك وانا اسودت الدنيا بوجهي
واقول بنفسي الله لايحللك يالقناة الثانيه يامعذبة قلوب الحيارى
ورجعت للسعوديه
لقيت ابوي سدد الديون الي علي بعد ما اكلوا وجهه الديانه ومن يومه وهو ماسك عصا يحترين ادخل بس
واكلت لي كم محطه بالعقال وصار في مؤخرتي شعار الاولومبياد
وها انا ذا قد بدأت من الصفر حتى من قوة الصفر مامعي ولا حق الدخان
وبديت انقل بالسوق بعربيه واحمل للسيارات و سددت ديوني و الان عندي راس مال يجيب لي ددسن88 بدون جواعد
مايستفاد
اكثر الاقارب مايحاسبك اذا جا لمحلك ويحسب انك مكتفي او من باب الميانه
بنظر الناس السعودي ليس أهلا للعمل لانه يسرق ويغيب ويسوي كل شي بشع بينما البنقال يعثون بالارض فساد ومازال اغلب السعوديين يفضل العامل الاجنبي على السعودي
عندما يبدأ السعودي من الصفر فلا يثنيه شي عن عزيمته>>>الا اذا شاف طخما فان العزيمه تروح ملح
القناة الثانيه تجيب برامج قد مضى عليها من السنين ما مضى
اشتغل حمال بالسوق واكون نفسي احسن من ان انتظر مصروفي اليومي من البابا
الددسن ال88 احسن موتر
واعذروني على كثرة الحوارات لكن القصه تستلزم تسذا