حارة المساطيل - عرض مشاركة واحدة - مد لي يدك . . .اقطعها !!!! <<<< حمود ومحيميد بالداخل

03-07-2009, 10:43 PM

هلا زياد نورت المحلي ياراقل

ذكرت في مقالك أعلاه ان للواسطه دور كبير في مستوى المنتخب وانا مانيب معك لا جملةً ولا تفصيلاً والسبب أن إذا كان العيب في لاعب او لاعبين ممكن تشوف الخلل في خاناتهم وباقي الفريق شغال صح ولكن المشكله هنا أن المنتخب ككل يعاني وخلني اسرد لك آخر إنجازات قامو يتغنون فيها المطبلين لأصحاب الكراسي ووش هي بنظرة واحد محايد

* تأهلنا لنهائي آسيا ولو بحثنا في مستوى المنتخب الي اسماه المراهق المرهف بمنتخب الأحلام آنذاك انه منتخب ركيك وضعيف جداً ولكن سبحانه الي مهد لهم الطريق للنهائي .. تأهلنا من المجموعه بكتم الأنفاس وبفوز بشق الأنفس على اندنوسيا في آخر الدقايق والبحرين كانت الطعم السهل .. واوزبكستان والله إلى الآن اقول في نفسي وشلون فزنا عليهم الظاهر إذا كاني عديت صح اربع عوارض وغير الهجمات المحققه لهم ولكن ربك حامي شباكنا .. مالعبنا صح إلا ضد اليابان والعراق كشف مستوانا الحقيقي !!

* إنجاز إيران .. وهو في الحقيقه اسميه دعاء الوالدين للاعبين المنتخب والفوز جاء من ربك .. الإمارات وفي ارضنا فزنا عليها بحب الخشوم وبتشغيل اغاني عشان تحمس اللاعبين داخل الملعب !!

مشكلة المنتخب اعتبرها مشكلة لاعبين مع إن هالوقت عندنا لاعبين مهارياً ممكن يتفوقون على بعض الأجيال القديمه ولكن المشكله هنا في اللياقه البدنيه والذهنيه للاعب وفوقها بنيته الجسمانيه .. الآن اللاعب السعودي الي هو في الأصل يعتبر فرد من مجتمعنا الي كل مال افراده يصغرون حجمياً وعما قريب بنغطي على حقين شرق آسيا بمسألة الأجسام .. فالغذاء عندنا مضروب خنقول بدايةً من التسعينات .. ثقافة اللاعب من يوم هو صغير سهر إلين مايطلع الصبح ثمن اصفقها نومه لنص العصريه وقم وكل لك أكله اي كلام ثمن تعشى لك في بوفيه !! وهالشيء تشوفه بالتحديد في اهم مراحل الشخص عندنا بين ال 15 وال 22 وهي مرحلة النمو لهالشخص والجسم يبي له اكل صحي وفوقها نوم زي الآوادم .. ارجع لمباريات زمان وشف بنية اللاعب السعودي أقل شيء تشوفه جبر ويحرث لك الملعب ياترى ليه لأن شكل المجتمع في ذاك الوقت كان يختلف فماكان فيه دشوش يسهرون عليها لآخر الليالي وماتجيك الساعه 12 إلا الشوارع فاضيه ..الآن اللاعبين عندنا عظمتين تتحرك في الملعب والمجهود مضروب فماعاد فيه حرث للملعب وكل واحد يتحرك في خانته ويالله !!

طبعاً الي ذكرته فوق مهوب سبب رئيسي اللهم إنه سبب من عدة اسباب تزاوجت وفرّخت لنا هالمنتخب الي تشوفه حالياً او عشان اكون اكثر دقه فرخت لنا شكل اللاعب السعودي حالياً !! والأسباب الآخرى يطول فيها الحديث ومنها الأكاديميات الي تطرقت لها في مقالك ومنها وجود ناس لا يمتون للرياضه بصله يقودون دفتها ومنها التخطيط القصير او المستعجل وأهم شيء فيها كلها ثقافتنا الحاليه الي ماتعرف الإنظباطيه ولا استغلال الوقت ولا اتقان العمل .. الخ

نجي الآن لأسئلتك النقاشيه يبو نقاش أنت

-هل تتوقع باننا سنتاهل كاس العالم 2010؟

عطفاً على انها اربع مباريات فكل شيء جائز ممكن تسلك مثل ماسلكت معنا في اوقات كثيره ونتأهل ولكن عن جداره مااتوقع .. فالقدر ابعدك عن استراليا واليابان ويقولك تكفى تأهل ومع ذلك خيبت أمله .. كأمنيه شخصيه لا أتمنى تأهل المنتخب لأنه بالعربي مايستاهل !!

- ماهي الطريقة المثلى للمنافسه والتمثيل المشرف في حال تاهلنا؟
حالياً مافيه أي طريقه تخليك تشرف قدام منتخبات عالميه كوريا الشماليه وماكل تبن قدامها تبي تشرف قدام اسبانيا او الأرجنتين !!

- من ترشح ان يكون مكان هالكرسيين اللي فوق؟

هو مفروض يكون بالأساس كرسيين بس كثرو الله لا يكثرهم وصارو يستحدثون مناصب لهم .. ارشح واحد قد عض العشب الأخضر ونام مع خالد مسعد في غرفه وحده اثناء المعسكر وفاهم الكفت كله بشرط إن المخ يكون مخ اداري مهوب يصير واحد مايعرف يقول غير آآآ < مهوب يقصد ماجد

- وش رايك فيني؟

بطل يابطل

في الأخير خني ألص لك اقتباس من مقالة اليوم فيها تزبيد مبطن وهذا الآن يعتبر انه صحفي انتحاري !!

اقتباس:

اما الاغرب من ذلك كله فهو بعض الصحفيين عندما أخذوا يحملون الحظ عدم الفوز على كوريا الشمالية، وكيف أن (هذا الحظ) عاند المنتخب السعودي، ثم لا يلبثوا ان يصفوا الحراسة بالمتواضعة، وخط الدفاع بالمهزوز، وخط الوسط بالبطيء، والهجوم بعدم التركيز، كيف يعاندنا الحظ ونحن نعاني من كل هذه المشكلات مجتمعة؟

صدقوني العلة ليست في بيسيرو أو اللاعبين وحدهم، انما في أطراف أخرى يجب أن تخرج وان تتحمل مسؤوليتها بكل شجاعة بعيدا عن وضع المدرب أو اللاعب أو الإداري كبش فداء، وإذا ما مارسنا هذه الادوار فإننا في نهاية الأمر سنظل ندور في حلقة مفرغة، ونفس التبريرات التي قلناها في إخفاقات مضت، أصبحنا نعيدها بعد مواجهة كوريا الشمالية، وربما نكررها في مناسبات مقبلة، مالم يتحلَ كل طرف بالشجاعة ويعلن تحمل مسؤوليته في عدم التأهل المباشر للمونديال

بيض الله وجهك يامان