حارة المساطيل - عرض مشاركة واحدة - باب ما جاء في النفخ و التنسيم من عجايب الحريم .. ( على بلاطة )

04-07-2009, 03:59 PM

.

.

.

الجزء الأول

المكان : غرفة النوم ، الساعه خمس إلا نص .

جوكره تحادث نفسها :

يالله إلى متى وانا قبيحه ، إلى متى و انا كل ما شافني قطو يمشي فوق جدار الحوش نط للبيت الثاني من الروعه ، إلى متى و أنا السبب في كوابيس ورعان الديره ..! ، حتى المعرس ماجاء من قبح وجهي .. الله ياخذ وجهي و يعطيني بداله مثل وجه منيره بنت عمتي حصّه ، ولو إن وجهها موب زين مرّه كانه وجه مريم نور أول ماتقوم من النوم بس ولو ماشي سوقها والحين أعرست وخلّفت عشرين صبي وهي توها ما وصلت سن الثلاثين <- والله لو إنها أرنب ؟

كسرة ( تفتح درج الكومدينه وتطلّع صورة الوالد ) .

أنا أموت و أعرف ليه يا يمّه ليه أعرستي على هالآدمي ذا مب آدمي ذا دريل هدم حياتنا .. مالقيتي إلا ابوي تعرسين عليه ، من وين بيجينا الملح وذا شكل أبوي .! أنا أموت و أعرف يومنتس شفتي ابوي الشوفه الشرعيه وش اعجبتس فيه وخلاتس تقولين موافدزه كل هذا عشان تعرسين ما همتس يجيونتس بنات ويقعدون بحلقتس و مايعرسن ..

جكيّر تدرين وش امنيتي بالحياة .. ؟ ، أمنيتي إني اقوم من النوم و انطل بطانيتي الوردية المنقّشه بقلوب حمر ، و أطمر ع المراية و شعري يهفهف وراي بالهوا <-- ماوكلي؟ ، همن ابدا اتمقل وجهي و جمالي .. تذكرين آخر مرة شفت وجهي بالمراية؟ اغمى علي يوم(ن) كامل ..! و صحيت من باتسر لقيتكم مغطين المراية بقصدير !

إييييه بس مالنا إلا الخطّابه ( أم حسين ) هي اللي بتحل مشكلة العنوسه ، و منين نجيب رقم هالخطابه ..! ما تدرين ذاك اليوم وأبوي يعبي السياره بنزين إلا المح الرقم ملزق بورقه على جدار المحطّه وأنا اللي أنقشه عشان اليوم الأسود عارفه إن مستقبلنا رايح فيها من طلعت على الدنيا و شفت وجه الوالد بغرفة الولاده

.

.

- الخطّابه و الشوفه الشرعيه :

وأنا اللّي ما أصدّق على الله و آخذ الرقم وأدق على الخطابه أم حسين ..

أنا : الوو ..

الخطابه أم حسين : الوو نعم من معي

أنا : معك جوكرة اللعب .. انتي الخطابه أم حسين اللي تجمعين راسين بالحلال

الخطابه أم حسين : إيه أنا أجمع راسين بالحلال وبغاية السريه إن بغيتي نرسل المعرس بملف اخضر علاقي ممكن نسويها لتس عشان نحافظ على السريه التامه .. بس كل اللي عليك ترسلين لي مواصفاتتس كامله ومواصفات المعرس اللي تبينوه وصورة من بطاقة العايله وشهادة حسن سيره و سلوك .

أنا : والله لو إني بقدم عندكم على وظيفه ..!

الخطابه ام حسين : نعم !!

اقول ابشري ابشري باتسر برسلتس صورتي وصورة اختي والمواصفات محنب متشرطين اللي يجي من الله حيّاه الله ولو تبين تاخذين المهر و المؤخر والصداق كلّه موافدزين بس اهم شي نطلع من صندقة العنوسه ونسافر ماليزيا ونصير نركب قدام بالسياره ..!

سكرت التلفون .. ورحت استعد أنا وكسرة عود للتصوير .. قبل لا نروح جلسنا نحط مكياج ونبربس بوجيهنا .. ماكان عندنا كريم أساس يخفي السبع طعشر ألف عيب الموجود فينا .. جبنا دقيق ابيض وكبيناه بوجيهنا .. ما بقى لون ظل ماحطيناه بعيونّا .. أصفر واخضر واحمر وما خلق الله .. ولا بقى روج ماحطيناه في براطمنا .. كل هذا عشان نخفي ملامح وجيهنا الشينه ونصير أحلى حريم الديره
صورنا بعد ما صورنا القبح والشين مازال موجود .. اللي يشوف صورتي يقول هذه زكيه زكريه مسوية ريجيم .. و كسرة طالعه كانها بنت فيفي العبده .. قلت يابنت والله مالك إلا صور منيره ناخذ صورتين وحده ملوّنه ، و الثانيه ملونه بابيض و اسود ونرسلها للخطّابه ولا من شاف ولا من درى ..

من اليوم الثاني و بدى مفعول الخطّابه يشتغل .. إلا ويدق التلفون و قلوبنا تدق معه .. انا و كسرة مسكنا يدين بعض وجلسنا ندور ونصايح نقول مع بعض :

هيه هيه المعرس وصل .. ويا منيره روحي قطعي بصل ..
ام حسين الخطابه العسل .. شعارها بالخطبه اتصل نصل ..

<- الدبش قاعدين يغنون ومخلين التلفون يرن ، مير أشوى جت الوالده وردت وطلعت حرمه عجوز يقالها ام خالد تبي تخطب لولدها الكبير والصغير ، وافقت الوالده موافقه مبدأيه وحددت موعد الشوفه الشرعيه بدون تردد لأن الوالد حالف عليها يمين إنها ما ترد أي حرمه تتصل تخطب حتى لو إنّها مروجة حشيش وعيالها مدمنين مخدرات ..!

كسرة : شوفي إنتي لتس الكبير و انا لي الصغير

أنا : على كيفتس هو .! منهي اللي مكلمة الخطابة ؟!!

كسرة و منين لتس الرقم انتي و هالفيونكة اللي فوق راستس ، ارفعي هالراس وجع من ثقل هالفيونكة راستس متدودل على قدام

ترن ترن طن طن ترن طن .. صوت الجرس يعلن عن وصول أم خالد وعيالها ( حتى الجرس صوته شين )

طمرت الوالده تفتح الباب .. و ليتها ما فتحته

طلعت أم خالد : ( عجوز مخضرمة ما فيها إلا ضروس .. يعني أول مرة بحياتي اشوف طقم اسنان يمشي و يحتسي بلحاله .. دخلت تسبقها ريحة البصل الظاهر شابت(ن) ع الغدا و جاية.. و راها تفخين يدربون روسهم خالد ، و الدحمي )

أم خالد تحتسي مع امي ويتناقشون وش لهم ووش عليهم ووش هي شروطنا و عيال ام خالد كل واحد قاضب( ن) بيده صورة لمنيرة ، واحد معه الصورة الابيض و الاسود .. و الثاني معه الصورة الملونه .. و كل واحد حالفن ع الثاني ما يشوف مرته < -- جت من ربي و الا كان كفشونا من أولها

و أخيراً جت اللحظة الحاسمة .. كسرة تشد الفيونكة صح و تدخل مع الباب ، امي ع السجادة تدعي .. و ابوي له يومين معتكف بالمسجد أول مره يعتكف بحياته وأنا مغمضه عيوني .. البيت في حالة استنفار ..

صرخة مدوية في البيت .. خالد عظ ثوبة و حط رجله ..

فتحت عيوني و اتذكر ان التسلبة الجربا كسرة ما تسبحت لها شهر

أم خالد تنغز الدحمي .. قوه يا وليدي " دي عايلة واطية ونصابه وهاتوا الفلوس اللي عليكوا " اخس يالعجوز الشمطا ..

طلعوا من البيت ، وأنا الحقهم : غش غش ما جاء دوري .. ما وعيت إلا و شحاطة العجوز أم خالد ماشيه 180 و تصك بجبهتي ..

ام خالد وكالة رويتر الحارة ، نشرت عننا الأتساذيب و الشائعات و اتهمتنا بالنصب و التلاعب و دخّلت الخطابة ام حسين بالسالفة و انها مشتركتن معنا بالعملية الارهابية عشان نسرق عيالها منها ..
الله اكبر ياذا العيال ، لو يعطوني اياهم ببلاش ما خذتهم <-- الجملة الاخيرة مهيب من قلب ترا

الخطابه أم حسين كانت عايشه على الله وعلى هالفليسات اللي تجيها من تزويج الناس .. لكن من بعد ما تعاملت معنا وسوقها طايح معاد أحد يدق عليها ولاعاد صارت تشرب ميرندا ..

مر ت الأيام على هذه الحاله .. كل ماجاء أحد يشوفنا شوفه شرعيه إمّا إنّه ينحاش وإلا تجيه عقده نفسيه من العرس ويكره الحريم لأنه يحسبهن كلهن شكل واحد ( شكلنا ) ، الوالد زهق وطفش من هالحاله إلى درجه إنه راح يكتب على باب بيتنا ( خذ وحده و الاخرى مجاناً ) وبرضوا مافيه فايده ، سمعتنا صارت بالحضيض وكلن درى إننا شيون و ماننفع للعرس ..

بعد مرور شهر .. قرر الوالد يسفّرنا لبنان عشان نسوي عملية تجميل ونعدّل و جيهنا و نغدي زيون كود احد يعرس علينا لو مسيار

سافرنا لبنان وأخذنا على طريقنا الخطابه أم حسين رأفه بحالها .. حنّا نسوي عملية تجميل .. وهي تشتغل وتجمع فلوس عشان توكّل عيالها إذا رجعنا للديره .. أول ما وصلنا مطار لبنان ورحنا ناخذ شنطنا إلا ونشوف هيفا وهبي ..سلمنا عليها ووحنا فاكين الكشره ثنين في واحد متر .. وطلبنا منها تعلّمنا عن اسم دكتور حرّيف عمليات تجميل بحكم خبرتها السابقه .. واعطتنا اسم دكتور و توجهنا للمستشفى مباشرة ودخلنا عند الطبيب وارتاع من وجيهنا .. قال وجيهكم يبيلها آلات خاصه مُكلّفه نستوردها من الخارج .. أنا أول مره تمر علي وجيه بهذا القبح .. أول مره اشوف سر طالع في الوجه ..!
تكلفة العمليه حوالي 15000 والوالد ما عطانا إلا خمسة آلاف ..!

كسرة و جوكرة قرروا يشتغلون في لبنان عشان يجمعون فلوس العمليه .. كسرة اشتغلت جليسة اطفال عند عائلة راقيه وبس تتمقل في معاملتهم وقصرهم .. كل يوم مشلّحه لها شي تحسب محد يدري عنها ما تدري إن القصر مزود بكاميرات مراقبه فما كان مصيرها إلا أن انطردت من القصر ، جوكرة اللعب قدمت على وظيفه قرسونه عند كباريه بالغلط تحسبه مطعم على نياتها هههههههههه ، من يوم اشتغلت بالكباريه وهي كل يوم مسويه مشكله وجايبه العيد ، كل ما شافت رقّاصة ترقص ، تركت شغلها مع الزباين وراحت تلقط الفلوس من تحتها ماشافت خير ، وإذا شافت أحد موب صاحي و معبي الطاسه قامت تنصحه ، لدرجه واحد من الزباين قالها وش جاب عزتي بحجابي عندنا بالكباريه
كثرة الشكاوي على الجوكره وما كان مصيرها إلا مثل مصير أختها كسرة وانطردت من الكباريه .. أما الخطابه ام حسين حبّها السيكورتي اللي يشتغل في المستشفى وسحبت علينا . .

انتهى الجزء الاول والحين جيبوا معاكم توكس وببسي وتابعوا معنا الجزء الثاني