حارة المساطيل - عرض مشاركة واحدة - باب ما جاء في النفخ و التنسيم من عجايب الحريم .. ( على بلاطة )

04-07-2009, 04:00 PM

الجزء الثاني

بعد ما طلعنا من الكباريه و روسنا مفلّقه بكل متسان مشيت أنا وجكيّر وعلى وجيهنا ملامح البئس والضياع ..الشايب مهددنا لو رجعنا للديره وما عدلنا و جيهنا بيضحي فينا بعيد الأضحى الجاي .. حنا ماشين بالشارع لبنان و نفكّر وشلون نكمّل باقي فلوس العمليه إلا وأشوف بريدز مصدّي جنب بقالة ابو شوراب .. واخذ البريدز وأناقز وأصايح بصوت عالي " لقيتها لقيتها يا جكيّر " وش لقيتي انتي ووجهتس !! .. ياجكيّر ماسمعتي عن ذاك البريدز اللي يدعكونه ويطلع منه واحد ضخم شين الملامح بس مهوب اشين منّا ، تعالي بس ادعكه ونشوف وش يطلع فيه .. المهم ادعكه المره الاولى ولا يطلع شي ثمن ادعكه مره ثانيه ويطلع واحد كبير ويقول شبيك لبيك المارد وائل بين يديك <- مارد لبناني ، وأنا اللي مااصدق على الله واطلب منه مليونين و ستمية أرض ابي املكها واممم ... ما أمداني اكمل إلا و يقوم المارد يتفل بوجهي ويرجع للبريدز ..

ما جمعنا فلوس تكفي فقررنا نروح للدكتور ونشرح له الوضع على بلاطه كوده يراعينا بالسعر ، وافق الدكتور وقال بشرط إنه يجرب فينا حقن وآلات جديده في عالم التجميل يعني وجيهنا بتصير فيران تجارب بالمستشفى .. دربينا روسنا ووافقنا ..
سألنا الدكتور : مثل مين تبون نخلّي وجيهكم ..؟ ، وقام يخيرنا بين نانسي واليسا وهيفاء وهبي .. ، لالا يادكتور والله ما عندك نظر وش ذا الاشكال اللي مطلعهن لنا قلنا له بصوت واحد ( نبي مثل وجه منيره بنت عمتي حصة أطلق وحده بالحاره وما بقى أحد ما خطبها )

طلعت صورة منيره للدكتور وقلت له : شف يا دكتور ابي حجم براطمي مثل حجم برطم منيره ابي اذا جيت احط روج يخلص الروج من مره وحده .
جوتسره تتحلطم : ما ذبحني الا حبة الخال بنص الخد مقيوسة صح مهيب مثل ذا الحبة بطرف خشمي كنها نخرور ..

دخلنا غرفة العمليات على طول واستمرت العملية مدة عشر ساعات ، عشر ساعات تحفير و ترميم وترصيص..

طلعنا من العمليه وما بقى مكان بجسمي إلا و هم لافّينه .. الغريب إننا طالبين التعديل بمنطقة الوجه بس لكن الظاهر إن هالدكتور قام يجرّب الالات بكل المناطق ،

طلب منّا الدكتور ما نفك الشاش والجبس مدة اسبوع كامل .. طلعنا من المستشفى و حجزنا للسعودية على طول .. و حنا بالطيارة دقينا <-- الله من النصب على خطابة ثانية و رتبنا معها موعد بنفس اليوم اللي بنفك فيه الجبس و الشاش و المسامير .
وصلنا البيت .. امي شالت الجرايد اللي على المراية .. و فارشتن أسرّتنا مفرش فيه قلوب .. و أبوي مسفهل ..
هالاسبوع كان أطلق اسبوع عشته بحياتي أنا و جكيّر .. كان كله حلوم و تخيلات

و جاء يوم فك الشاش أنا و جكيّر متقابلات بنص الغرفة .. و قافلات الباب .. امي و ابوي على اعصابهم واقفين عند الباب ، ابوي يدعي .. و أمي تقول آمين

و فجأه ...

يغشى علينا من الضحك مرة وحده ..!

جكير اصبري اصبري بجيب العطور والارواج بصفهن على لحيتس اللي كنها كومدينه

جوكرة : بسم الله بسم الله .. سكنهم مساكنهم ..
يللللللعن بليستس وين الخشم اللي يقول عنه الدكتور بيخليه سلة جح مدري سلة سيف .. أنا ما أشوف خشم ما أشوف إلا مقفا دجاجه بنص وجهتس ، وإلا جبهتس حدّث ولا حرج أنا أتوقع ياكسرة من يوم ورايح بيجون عيال الجيران يفحطون بالسياكل بجبهتس هاللي كنها ملعب كرة قدم وإلا عظة البراطم تقل وحده فيها بواسير وإلا بتنزل ركّاب ومعيين ينزلون

شوفي خشتس بالمرايه بس أنا أول مره أشوف عيون و خشم متقاطين بالمكان .. تبين الصدز انتي الظاهر لو شافتس فيثاغورس كان غير قانون المثلث و عاد الدراسة على وجهتس ... الا تعالي وش يقرب لتس مثلث برمودا ، ما فيه أزين من العزوبية .. وشوله يا جوكرة نعرس ..! حنا لازم نقطع نسلنا كله ، مفروض لو نشوف أحد يقرب لنا نثوّر فيه قبل يعرس ..!
دخلوا علينا امي و الشايب و عيونهم تطلع منها شرار ..

الشايب : الله يقلعكم يا بنات الذين مسفركن ودافع دم قلبي .. وماهمني حتسي الناس يوم قالوا لي وشلون تخليهن يروحن لحالهن واخرتها تطلعن شيف أكثر من أول ..
الله يسامحني يومني خليتكن تغيرن خلقة ربي آآه قلبي قلبي .. ابوووي لااااا اصبر خل نتفاهم بالاول .. الله لا يسامحكن اااه ... ومات ..

أمي جاها شلل نصفي وبعدين قامت بعد شوي وقالت امزح معكم يا بناتي ماودي نقلبها مسلسل كويتي ..

عشنا حياة فقر بعد وفاة الوالد .. قطعوا علينا الضمان والتبرعات من بعد ماشافوا وجيهنا بالغلط وحنا طالعين نكب الزباله انطردنا من البيت ورحنا للصحراء وصرنا نلبس براقع ونرعي غنم و صاروا الحيوانات أصدقائنا (كيف الحال بثر )

The End (اخس )

[أدري إننا بنفوز فاللي وده يبارك من هالحين ماعندنا مشكلة]

الأحداث من الخيال ولا تمت للواقع بصله ولا ثوم