السلام عليكم ورحمه الله وبركاته جميعا .. كل عام وانتم بخير .. ومبارك عليكم الشهر .. وعيدكم مبارك .. وعيدكم الاضحى الجاي مبارك .. وهابي فالنتاين .. وهابي ميل .. ووش علومكم ووش اخباركم .. !! ؟

انتهينا من فاصل علوم المرجله وماشابهها اللي الله ماعطاني فيها ولا اعرف لها ابد ونجي الحين للخنبقه والخثرقه

طبعا الكل عارف ان قسم ( شلة الحاره ) من الاقسام المهمه في هذا المنتدى .. صحيح ان جميع الاقسام مهمه .. لكن
هذا القسم هو منبع المساطيل وعصب الحاره .. وطبعا هالقسم مثل ما حنا عارفين من زمان انه يعتمد على المواضيع اللي يكتبها العضو ب ( اسلوب عياره ) سواء كان الموضوع اجتماعي او نقد بناء لموضوع معين .. او موضوع خيالي .. وطبعا كل هالثلاث انواع لابد ان تكوون ممزوجه باسلوب عياره واضح .. لان بكل بساطه ان صار الموضوع ( اجتماعي ) مثلا وكان خالي من العياره والخبال ... يكون مكانه مجلس الحاره .. او اذا كان الموضوع المطروح ( نقد لموضوع معين ) وخالي من العياره والخبال .. مكانه فرضا ( دكه الحوار ) وهلم جرى (( ترا ماكتبت الدستور الا عشان هلم جرى ويالله لقيت لها مكان ))

فياليت اللي بيكتب موضوع في هالقسم انه يكون عارف هالشي من البدايه .. ولازم يعرف كذا نقطه عشان يكتمل موضوعه ويكون سليم وفي المكان السليم وعشان مايروح للقراشيع .. او لغيره

** النقطه الاولى : محد يمطرس ويحوق ويكتب اشياء تمس العقيده ( مجرد تذكير فقط ولا انا عارف انكم منتوب مسوينها )

** النقطه الثانيه : المواضيع السياسيه البحته مانبيها لان لها اماكن محدده .. لاكن مثلا تبي تكتب موضوع عن لبنان واسرائيل بطريقه ساخره مايمنع ذلك .. بس فكنا من السياسيه الداخليه مانبي نتلحط ونقعد ناكل خبز وعدس !!

** النقطه الثالثه والاهم : المواضيع ( المنقوله ) تروح على طووووول للقراشيع بدون نقاش .. لاننا نقدر وبكل بساطه نروح نقراها في مواقع ثانيه .. او توصلنا على الايميل ونقراها فليش تبثرنا وتنزل لنا موضوع منقول .. وغير كذا حنا منتدى مانبي اشياء منقوله بتكتب شي من راسك وتحاول تبدع حياك الله وصدقني بتلقى من يدعمك

** النقطه الرابعه : مواضيع من نمونه ( احلى نكته ) ( واطلق موقف في العالم ) ومن هالمواضيع صدقوني تحرق قيمه الشخص ككاتب .. وتخليه مثله مثل الباقين في المنتديات الثانيه .. وحنا مانبي هالشي لا للمنتدى هذا ولا للكاتب نفسه عشان مايحرق نفسه بنفسه .. اذا كنت جديد خذ لك لفه على المواضيع المثبته شف طريقتهم واسلوبهم وعقبها نزل موضوع عليه الكلام

** النقطه الخامسه : بالنسبه لنا كمشرفين مايفرق عندنا الشخص اذا كان عدد ردوده ( 1 ) او عدد ردوده ( 3000 ) الاهم الموضوع ومحتواه وبالتالي مايفرق عندنا ( مراقب ) او ( مشرف ) او ( مسير او عضو بقراطيسه ) او ( من كبار الشخصيات ) الخ الخ الخ .. الاهم عندنا هو الكاتب نفسه ومواضيعه وردوده .. لان بالمواضيع والردود هي اللي تخلينا نحكم على الشخص

** النقطه السادسه : أكثر من موضوع بنفس الفترة لايجوز لايجوز لايجوز في دستور الشلة المعظم .. وشوله العجلة ؟ عط فرصه لموضوعك الاول يتنفس وياخذ نصيبه من الردود والمتابعة .. والجديد لاحق عليه محناب مقفلين باب الشلة ابد


** نقطه مهمه جدا :
وهي في حاله الردود .. تخيل انك جالس تكتب موضوع مده اربع ساعات او يوم او يومين .. ونزلت الموضوع وجا واحد ورد عليك برد وكتب لك (( هههههههههه موضوع حلو يعطيك العافيه )) او كتب ( ههههههههه ياحليلك ) ماتلاحظون ان فيها تحطيم لكاتب الموضوع ... !! حط نفسك في مكانه وبتعرف انه تحطيم او لا
لذلك الردود اللي يردون فيها الاشخاص بقصد زياده عدد ردودهم مالها سنع ... لان الجزء اللي يحلي الموضوع ردود الاخيرين .. وصدقوني مثل ما فيه ناس تتابع مواضيع .. ففيه ناس تحب تقرا تعليقات الاخرين وردودهم وكثيرين من هالنوع فأتمنى ان تكون الردود بنفس قوة الموضوع

** الردود التي مضمونها الحجز " فقط " ممنوعه منعا باتا ,, بس اللي رد نص رد وجاه ظرف طارئ وحب انه يرد ويكمل رده بعدين لامانع بساللي يرد (( للحجز فقط )) ممنوعه منعا باتا ..
* ويحق للمشرف نتفها ..




نقطه ( ياكثر نقاطي ) : اللي يتميلح ولا يتوب من كثر مواضيعه الماصله بناخذ موضوعه وبنثبته وبنقعد نذب عليه الين يتوب ويجيب لنا موضوع زي الناس

انتهت تقريبا النقاط المهمه واللي كانت براسي .. وصدقوني الان تقريبا في مرحله لتطوير هذا القسم والتطوير هذا ماراح يجي من المشرفين لحالهم .. لازم مننا كلنا .. واكل العنب حبه حبه ...

وترقبوا المزيد من المفاجأت