آيات فيها منبع الحسن آيات = محلى دلعها والسحر في هدبها
ومحلى عبارات التغلي وبالذات= يومٍ تلوم و آه محلى عتبها
يومٍ تلاقينا غدى بي تنهات=والكبد كن عقاب مني نهبها
صارت حياتي بين وجدٍ وعبرات=يا ويل قلبي وين أبلقى عربها
بين المحاني تشتعل نار ويلات = سبحان من سوا الجمال ووهبها
عيونها تذبح ولو كان بسكات=وان كان مت فموتتي من سببها
صعبه وكلٍ يطلب الود لا جات= ومن بد خلق الله خفوقي كسبها
قلبي عشقها بين كل الجميلات =ويكفي سواي من البشر ما عجبها
فزت بجمال وفزت باحلى الشريفات =اللي بها يضرب مثل من أدبها
أحبها حبٍ على القلب قد بات =يشعل بوسطه ضو ناشف حطبها
نهيت قلبي عن هوى الزين مرات=ولا سمع مني وراسه ركبها
منهو يلومه في هوى زينة الذات=اللي طغى فوق الرهايف سهبها
من أجلها ترخص جميع الملذات=قلت الصبر والنفس عشقي غلبها
ومن اجلها قلت القصيده بأبيات=الصدر" آت" وعجزها كان "ابها "