ياقصيدي لاتخاف ان عشت بكفوف الغزاة = الذهب والبصمه اللي فيه لا لا لا تضاها
يالله اصرخ ياقصيدي مثل ضبح العاديات= حالف اني لا اذوّب سُكره زايد حلاها
ياجزيله بالحسن يامنتهى ملئ الصفات = يافنون الدلعنه يا ملوّنه في محتواها
انثري قطرة ندى ياوردتي تدب الحياة = بالفياض اللي بصدري تنتظر موعد دواها
وازفري عطر(ن) يسل العمر من غمد الشتات = جمعيني من سنيني وانزعيني من غثاها
دكي بحسنك دروبي لين مايبقى حصاة = ودي امشي بخطوت(ن) ما تنزف جروحي معاها
اقتلي زرع الظلام وشعللي كل الجهات = سفلي بالكايدات ونشّفي فورة دماها
خطي بوصفك بدايات التحدي للرواة = من قصيدي فيك كن حروبهم دقت رحاها
واتركي خصرك على جدار الهوى يبقى ثبات = برسم ديار الفقر والحسن في عالي سماها
انتي اسباب التخثر في شرايين البنات = وانتي مثل العاصفه تجتاح من زل بهواها
وانتي اسباب التصادم في طريق الامنيات = من يشوفك كل غاياته تحت رجله وطاها
ياجمال الكون دمي صار لك نهر الفرات = والسنين تصيح يا اخذيني انا كلي فداها
والبشر تطلب كتابي شرح فن التضحيات = بس تكفين المؤلف ينتظر منك صداها