اله الا الله محمد رسول الله يا الله على بابك ماخاب طلابك يا الله في حجاك ورجاك ايا جعلي من حييلي لقبيري ومن قبيري الى ان تلقاني رحمتك

انا عندي مويضيع كل ماطرى على بالي جتني غلقة وحنفشت كبدي ويطير عن هاجسي لذيذ الكرى وتخف شهوتي عن العيشة ابطرحه وبصره مايجوز لكم ابطرحه بين يديكم والله يستر ان ماصرت تحته بعد انا مابي جوايز ولا بي بطولات خذوهن كلهن بس ابقول اللي في خاطري ثم سووا بي ماتبون

ليش حنا مجتمع ذكوري

ليش ووشوله كل هالتفريق بين حنا يا العذارى الخوندات الرقيقات وبينكم يا هالرجاجيل اللي ثلاثة ارباعكم او جلكم مجرد سلنتح فقط لاغير ! لاتناظروني كذا ترى اللي فيني كافيني ايه وش ناقصنا ووش زودكم عنا !

ليش حنا خطانا مايندمح ! ليش إذا اخطت الوحدة فينا خلاص صارت من المغضوب عليهم عند المجتمع والا انتم ماشاء الله عليكم عند أرواحكم شعب الله المختار تلقى الواحد فيكم يسوي البلا والجلا ولا يلحقه من الناس منقود وان لحقه فهو مهوب مثل ماتنقدون على البنت , لانه في رايكم ان الرجال ناقل عيبه مانيب قايلة اياجعل عيبه للكلب اللي يعضه
سبحان الله كنكم تقولون ان الله من لمنا شديد العقاب ومن لمكم غفور رحيم وابعطيك بعض الامثلة اللي تدل على صدق كلامي مع اني الحمدلله ماجُرِبِ علي كذب قط

بعض من يسمي نفسه رجال تلقى عنده خربطة وخنبقة مع بعض البني وان كتب الله وخطب قالوا ايه اذا اعرس بيعقل ان شاء الله حتى لو البنت اللي بتاخذه درت عن سواياه فهالشي مايعتبر في نظرهم مبرر انها ترفضه لانه من باب طيش الشباب , لكن تعالوا شوفوا لو ان الدعوه معكوسه لو يدري الواحد ان اللي بياخذها قد كلمت ولد ولو مرة وحيدة ربها فهقوتي انها خلاص بتصير في عينيه مهيب كفو من يفكر في العرس عليها

وإلا عاد لو يعرس وتصهده مرته على جرمه المشؤوم فتعالوا شوفوا التبريرات والله انا اسف , انا ماكنت اقصد هالشي , هي اللي كانت ناشبة فيني بنت الحرام , ومن هالكلام اللي من ابو ريالين وان طرى عليها وطلبت الطلاق قالوا لها أهلها عاد شوفوني أقول أهلها ماقلت اهله : وشو له تتطلقين ! وشو له تهدمين بيتك ! ووش ذنب بزرانك ! وهذي نزوة من الرجال وإن شاء الله بيتعدل وبيصير رجال بس انتِ اصبري عليها شوي , لكن لو صار العكس والزوج هو اللي لقى مرته تكلم او مع احد في شات او مسنجر شوفوا وش بيسوي فيها ؟ زين ان كان وقفت على دبغها الين تعض الأرض وتسميعها من الكلام اللي تتمنى أن الأرض تنشق وتبلعها ولا صار اللي صار اما طلاقها فهذا مخلوص منه ولا فيه نقاش وان كانه راعي خير فهو يمكن مايشنع بها عند أهلها مع انه يمكن هو اللي متسبب في سواتها هذي اما مباشرة او غير مباشرة

طبعا اتمنى انكم ماتفهمون اني اشجع البنت او ابرر لها انها تسوي الغلط لا واللي نزل تبارك والانعام بس انا اقول ليش ذا التفرقة ! مع ان البنت والولد كلهم بشر وكلهم محاسبين ولو ترجعون لفتاوى ابن ابراهيم مانتمب لاقين ان الولد حسابه عند ربه اخف من البنت والبنت اشد من الولد في الخطا الواحد
وان كانكم تقرون قران فاكيد انكم تلقونهم سوا في العقاب (الزانية والزاني فاجلدوا كل واحد منهما مائة جلدة) (والسارق و السارقة فاقطعوا أيديهما جزاء بما كسبا)

وليش الواحد عادي يعرس على اجنبية اما البنت لو تقبل العرس من الاجنبي صارت في عيونكم مثل الخايبة , لا ووش حجة الواحد فيكم يقول انا اباخذ شامية اللي اذا شربت الما بان مجراه مع رقبتها , بالله عاد من فيكم اللي تفتح فيه العين ? ما اقول الا الله يرحم الحال على هالخشش , بالله وش يحس واحدكم به وهو يناظر خشته في المنظره ؟! انا اقول هالكلام مهوب اني ودي اخذ اجنبي لا, بسم الله علي بس اقول ليش هالتفرقة ؟!

اللي خلاني اقول الكلام هذا لانكم ذبحتونا فكل ماطق عود في حصاة قلتوا لنا (المرة ) ناقصة عقل ودين وان المرة ام سبع ... طيب ياللي مانيب قايلة دام ان حنا ناقصات عقل وراكم تنشبون في حلقونا ولاهوب مراكض ورانا في الاسواق وبس الا بعد حتى عند الإشارات ما افتكينا منكم ببلوتوثاتكم اللي رازين فيها ارقامك حتى لو تدق عليكم الوحدة بالغلط تنشبون فيها تقل قراد والله اني مرة دقيت على واحد بالغلط كرهني في عيشتي كل شوي داق علي الله الله يدق خشمه لعنبوه حتى في تالي الليل يتصل تحسبونه يوم مارديت عليه قال خلاص البنت هذي مهيب راعية هالكلام ! لا وربي صار الله يجزر عمره يرسل لي رسايل بالكوم والله اني امسحها بدون ما اقراها تعرفون ناقصة عقل واخاف اصدق خرطيه

ارجع واقول همانا ناقصات عقل وهمانا مدري وش بعد وراكم انتم اللي تنشبون فينا ! مع انه من المفترض ان حنا اللي لو نتعرض لكم ونراكض وراكم انكم انتم اللي تردونا وتعلمونا ان هذا غلط وخطأ وعيب وحرام فانتم اللي ماشاء الله عليكم والله يحرسكم باسمه وياقاكم تامة عقولكم لانه هذا هو التصرف الصحيح للي تام عقله مهوب تنشبون في اللي ناقص عقلها ثم الى منكم لعبتوا عليها حملتوها كامل المسؤلية صح كلامي والا انا غلطانه علموني تكفون لان عقلي ناقص ومحتاجه للي عقله تام علشان يعلمني

ابوقف الين هالنقطة وبس ماودي اكمل اخاف لياها تجيني جلطة من حر ما اونس والا الله من الشي اللي اشوفه وانا ساكته .