البارحة جا طاري الناس ياحمود= ومرخى هجوسي طاري الناس شدّه
سولف بهم عندي من الناس مقرود= ياليت ربي لد هرجه ولدّه
سولف برمش وعين واردوف ونهود=ولحق المقفي عن هواهن وردّه
أرص روحي لايسولف بهم زود= لكن حد القلب ياحمود حدّه
وقلبٍ ورى بابٍ له سنين مردود=فكه من سبوقه بهرجه وهدّه
على الذي راح بمواثيق وعهود=شيٍ درى به بس خدي وخدّه
إليا تنفس قلت يامسك ياعود= حطيت زندي تحت راسه مخدّه
والياحكى كنه يقسّم على عود=واليا ضحك غنيت (عطني المودّه)
أهايق براسي على دعجه السود= واذكر دفا صدره واعوّد واشدّه
همست باكر سفرتي ياأخضر العود= وابطيت ماجا من وليفي مردّه
أثره شرق في عبرته وووه ياكود= شوفة وليفك والعباير تهدّه
ما من ورى توبة طريح الهوى فود= يطويه هاجوس والآخر يمدّه
وبدلت قولة تبت والله فلا اعود= بيارب سقني له ويارب ردّه
بيّحت سدّي والسبب هرج مقرود= ياليت ربي لد هرجه ولدّه

اقتباس: والله زمان عن الخيمة واهلها ... خلاص ما عاد فيه صبر !!! منزل قصيده منزّل

نورت الخيمه بحضورك يامهندس ..

صحيت كلك يامبدع