شاه وجه الأرض وإرتاب الضمير ولاح بارق جور = وإهتز عرش الصبر وإغتيل الكلام وناحت الورقا
بعْد , مالمشرق تراخت لثمته وسال منه النور = على قبور الوقت وحطام الزمن ومصافح الغرقا
وبان جيد الضيم وخضاب السنين الممحل الممطور = قبْل عين الوجد لا تسقي الوصال وتشرب الفرقا
أثْر بارحة السهر حبلى مصاب ومشأمة ودبور = بعد ما غصن الخفوق المعتري بغيمها استسقا
خاب ظن اللي يظن إن الليالي تجبر المكسور = دام أنا أشوف الخلي يسعد بها واللا خلي يشقا
ايه والعبره لحن عزْف الشعور ونغمة المقهور = والعين آلة وجْد بيدين الحزن تستنزف الزرقا
على مقام الياس ما يبكي السماء والبرزخ المعمور = بأرْواح غايات الصدور اللي على متن الأمل ترقا
ايه والدنيا نعَش والوقت فوقه والطموح قبور = والحاضر , الماضي سوى كالآت والأيام كالورقا
تطير مع سرب الهجوس اللي تخيل الحايله وتخور = تحْت راية , قلة الحيلة , وفقر الحظ , والفرقا
ليت تنفع ليت لا من قلتها يا ذنبي المغفور = وآقول ليت الضيق ما يبقى بنا أو ليت ما نبقا
و علّ تنفع علّ لا من قلتها يا حلمي المنثور = في درْب تبّانة سماء وجْه الطهر وإن سمّيتْ طرقا
طرقاً تغنيها فرآشات الصَبَا في قلبي المآسور = لها سلام الخافق اللي كل ما رحب بها يبقا
منْ بزوغ الفجْر لا منْه انبلج و عانق الديجور = وصافح رسوم الدمْع وأطلال الجروح وخصلة العنقا
لين الظلام يكفكف دموع الشفق ويقول له : مآجور = وأمسي أجرّ الليل بخيوط السهر وآقول : يا شرقا