روحي في بليس الله لايوفقتس وين ماتروحين ! - الصفحة 3

01-07-2009, 02:40 AM

طاسه ..

اقتباس:

مثلا .. قلت لها اليوم بغيب ترد على طول .. يامغيبتس الداب
مثلا .. نادتني وقلت لحظه قاعده اكلم ترد على طول .. يامكلمن عليتس الداب

ههههههههههههههههههههههههههههههههههههههههههههههههه وش قصه هالداب مع امتس شكل له سالفه معها والا تسان ما قالته في كل دعوه .. شكله قد قرصها ..

اقتباس:

واذكر مره بالثانوي سمعت وحده تدعي على صديقتها تقول جعلك التريله اللي تفرم راسك فرم

الله يفرم راس العدو ..
وش ذي الدعووووووووووووووه قوية ..

01-07-2009, 02:41 AM

القوة العاشره ..
نحتري رجعتس ..

01-07-2009, 02:46 AM

m!sS w3h
ولتسمووو ..

اقتباس:

حتى يومنا ندرس اخوي يقول الناس تدعي لعيالها وامي ماغير الله لا يوفقكم

لسانها تعود خلاص بس تحاول بقد ماتقدر تمسك لسانها لين دعت بالشين ..

اقتباس:

بس من تالي صارت ماتدعي الا ع العيال وخفت علي لاني صرت سطحيه ماصرت اجلس معهم كثير ولا صار لي مزاج اسمع شي يكدرني

بالعكس المفروض تقعدين معها ولين جيتو تقهوون فاتحيها بالموضوع وقولي لها يمه لاعاد تدعين علينا ترى الدعوه مستجابه .. لو استجابت وصارات انهبلتي علينا وترى محد مبازينا الا انت ومحدن فاقدنا لو متنا الا انتي ..

01-07-2009, 02:48 AM

الدين عز ..
الله لايوفقكم دعوه شامله لكلش الله لايوفق لا في دراسه ولا في دوام ولا في عرس ولا في شين ابد ..

01-07-2009, 02:51 AM

ههههههه الله يخليلك ياصق صق ..
أمي الله يخليها لنا ماتدعي إلا بالصلاح فديتها والله .. ولأنها ولله الحمد من زماااااان ماعصبت عليّ ماشاء الله ماأذكر هي تدعي علينا والا لأ ؟؟!!

بس والله ماأظن في أم تدعي وهي تتمنى استجابة دعوتها ..
قلوبهم حنيّنه خاااالص ...صديقتي بنت عمها وحيدة ماما وبابا ماعندها اخوان إذا زعلت تدعي على نفسها وتقول الله ياخذني ,,, أمها تبكي على طول وتترجاها تستغفر ... ياحياااااتي انتي مجرمه هالبنت وربي .

جيااااااالك ياماما بكره بإزن الله ,,

01-07-2009, 03:48 AM

والله موب قاهرني في الموضوع إلا اللي حاجزين في البداية ولا جو ليتهم معطيني مكانهم..

صقيع موضوعك حساس على قولة اهل الحساس..
امي الحمدلله ماتدعي دايما نادرا ماتدعي علينا..قلبها مره طيب ..
اكثر دعاها لي الله يطيب حظك..
المشكلة في باباتي لا..لالالالا.. عنده دعوات مركزه قويه اخاف اقولها تنهارون
والسبب انه عصبي ..عصبي مرررررره..<<< يااااي..
لا صدق ابوي من النوع الحار عشان كذا لاعصب على طول اروح من قدامه مستحيل اجلس عنده
يعطينا دعاوي الله يستر يارب منها.. بس انه رحووووووووم ..: <<< كيف تجي ذي..

عبودي يعطيتس العافيه على الموضوع..

01-07-2009, 04:28 AM

ترى هالدعاوي موب من قلب يعني بس حره
امي والله مهيب هينه بالدعاء تدعي بس اذا جتها ام العبيد وعصبنابها دعاويها بسيطه
ابد بس جعلس الجني اللي يطيربس ,جعلس السكني اللي يخفت بس ,جعل اهدى عيلانس يدربيس من الدرج وهكذا .....
مير صارت حتى سوالفنا دعاوي من غير مانحس اذكر مره اقول لصديقتي من باب الحماس في سالفتها جعلس الموت كملي وهي تقول بسم الله علي استغفري
بعد اخبر وحده من اقاربنا تهون اميمتي عندها ع الاقل احنا نستاهل بس هي مشاءالله عليها لو تمدحينها يمكن تدعي عليس ,وعاد ياشين الطنزه من تطنزت عليها وانا صايرتن مثلها كني عجوز كل ماعصبت ابحل هالعالم بالدعاوي المشكله اني اتحسف بعدها بس وش عقبه
بنيت خالتي لسانها طويل وتقلد امها بالدعاوي ذا البزر كنها شابكه اشتراك بلسان عحوز عاد صارت خالتي اذا عصبت تدعي لهم بالصلاح
وتلقائيا بنتها صارت تدعي بالصلاح ==>تحسبها دعوه ميب زينه تدعم موقفها وهي معصبه
ودس نعود السنا بالدعاوي الصاحيه وندعي لهم بدل ماندعي عليهم بس سبحان الله ماتبرد الحره الا لين تدعين عليهم

مااقول الا الله يهدينا وياكم ويرطب السنتا بكل ماهو صالح

دويتو دعاوي جميل الشكر موصول لوالدتس ولس

01-07-2009, 05:01 AM

ياربي منتس ياصقيع
ذكرتيني الله لايواخذني يارب وتغفر لي
والله ياكان لساني مهنا باشين منه وتفنن بالدعاوي بعد
على كل كلمة دعووة طايرة مليون
صارو خواتي مايحارشونني يخافون من شينها يقولون لعنّي اهون
بعض المرات احس تبرد تسبدي لادعيت
اخذت الدعاوي عن اهلي كلهم مافيه احد يدعي او يحب يدعي
حتى امي الله يرحمها _وموتى المسلمين
ماتدعي وان سمعت احد يقول لو _وجع يوجعتس_ عصبت ماتحب ابد تقول وش يضر لو تقولين الله يهديتس يمكن تلقى باب مفتوح وتنقبل دعوتس ويهديه الله
بس الحين الحمدلله صرت كل ماتذكر وش كنت اقول اتحسف قسم بالله
اذكر وحدة من قريباتي تقول كنت منظفة بيتي وتعبانة فيه وعندي عزيمة يعني مافيه وقت ارجع انظف مرة ثانية تقول مادريت الاولدي ابو خمس سنين جاي يمشي من الحوش وكلللله تراب المدخل والصالة انحاسو بدقيقة
تقول احترررت تسبدي عليه ولاادري وش اسوي ان ضربته البيت مهب ناظف وان دعيت عليه بعد انا اللي برجع انظف تقول الحمدلله مسكت لساني مادعيت عليه وقلت له الله يسخرك لي ومايصير عمرك12 سنة الاانت حافظ القران
تقول الحمدلله والله ماخلص الابتدائي الاهو حافظة وهاديه الله
بس بعض المرات نفقد عقولنا من العصبية
ومرة بعد << مطولة اتذكر كنا واقفين عند محطة بطريق سريع ونزلنا لدورات المياه وكانت تمشي قدامي حرمة ومعها بزر بيده علبة موية يلعب فيها فتحها وكب اللي فيها اصلا ماكان فيها الا نقطة شافته امه قالت كبيتها الله يكب دمك انا قلتها الله يكب دمتس انتي بزر مايفهم الله من زين النصح بس.. استغفر الله واتوب اليه
واختي هههههههههههه قالت لو انكب دمه محد منظفة الا انتي
الله لايواخذنا
مصقوعة حنيت للماضي الظاهر ابدعي عليتس ضيقتي صدري
الله يوسع صدرتس بالعافية ويخلي لتس امتس

01-07-2009, 05:37 AM

طلع الشعب كله يعاني على بالي بس انا الي اعاني

انا امي ماتعلمت منها الا الدعاوي عالفاضي والمليان على اتفه شي دعاوي

اصلاً دعت علي ولا مادعت ادري انها ماتحبني ولاتطيقني صرت اقلل جلسه معهم عشان ماسمع كلام يضيق خاطري الله يهديها ويسامحها

مصقوعه امك مثل امي ماتحب احد يدعي على الاولاد بس البنات عادي

خنقتني العبره انتي مع موضوعك الي يجيب الهم

نكدتي علي الحين شسوي ترى شكلي بجلس اصيح
الله يهدينا ويهدي امهاتنا ويتركونا هالدعاوي الشينه يارب

01-07-2009, 08:53 AM

غندآ ..
هلا بتس زود يابئدي ..

اقتباس:

وحده من ربعنا اذا اذاها ولدها قالت ربي يصلحك ولا ياخذك أو ياجعل ابوك لنار مدري وش تحس فيه يوم تدعي على ابوه معه

ههههههههههههههههههه استغفر الله ..
مادعت على ولدها وابوه الا انهم الثنين مفورين تسبدها ..
حريم الله يكفينا شرهم ..

اقتباس:

اذكر واحد من جماعتنا الله يرحمه ماله بالدنيا الا ولد واحد واذا جاء يدعي عليه قال الله لايرزقك بالعيال اللي ينفعونك وفعلا تزوج ولده وعاش دنياه ومات وماله ذكر ابد لا ولد ولا طاري..

ضعييييييييييف ..
حرمه من ولد صالح يدعو له ..
آمين ..

01-07-2009, 08:59 AM

المستقعده ..

اقتباس:

يكفي منها اعتياد الأبناء على هذه الألفاظ وتداولها بين الأصدقاء وغيرهم .. وظنهم بأنها بسيطه لأن القدوه تلفظ بها .. فهذه النقطه مهمه بشأن التربيه والأخلاق .. كما ان الكلمات عموماً لها عائد على الشخص ..

من جد انا الاحظ الام اللي دايم الدعاوي في لسانها عيالها الصغار يقلدونها ويدعون ياعليها والا على غيرها نفس الدعاوي بالضبط يقولونها ولا يدرون وشي اصلا ماينلامون اذا الراس الكبير تقوله بيحسبونه صح ..

اقتباس:

هل استبدلتي المُسارعه في التفوه بالدعاء .. بالاسترخاء والمُحاوره والناقش الهادف البناء ..

صدقتي ..
يعطيتس العافيه المستقعده على هالمرور اللي جاز لي تسثير ولا تهون ردود الباقين ..

01-07-2009, 09:03 AM

هدوووء ..

اقتباس:

والله اني احيانا اعذرها عيالها صغار وعلى بعض ويغثّونها واذا عصبّت دعّت عليهم .. نقولها طيب وش بتستفيدين تقول مدري بس احس اني برّدت الحرة اللي بصدري..

تبي تبرد الحره تجلده بس لاتدعي عليه ..
اذكر وحده تسذا دايم تدعي على عيالها مفورين دمها يوم جا يوم دعت على ولدها بالمرض وصدز الولد جاه شي غريب كنه موب صاحي .. ومن بيبازيه الا امه ..
عقبها ماعاد صارت تدعي اتستادبت بس وشو عقبه ..
آمين وياتس وكل مسلم ..

01-07-2009, 09:09 AM

كلها طيبه ..
ياحبي لس مير .. --> لاينتفخ راستس ياعبده قريح ..

اقتباس:

حرمة عمي دعت على ولدها الصغير كان شقي انه يروح ومايرجع والمشكلة برمضان وبالفعل مات الله يرحمه وماتتصورين كيف كانت حسره امه

ياكثرررر الناس اللي يدعون ذا الدعوه ياتصير والا برحمه ربي ماتصير ..

01-07-2009, 09:13 AM

أنديرا غاندي ..

اقتباس:

كان يوم جمعه ووقت عصر , تقول مامداني ساعة أكثر أقل إلا يقولون لي صار له حادث ومات فيه على طول!

يووووووووه .. الله يرحمه ويغفر له ..
عاد يوم الجمعه وعصر ..

اقتباس:

صقوعه مع أن اسلوبك بسيط ولذيذ وموضوعك يخلي الواحد يبتسم غصب إلا انه أوجعني ((

جعلنا مانتوجع من شر .. --> محد يتوجع الا من شر ياتنح ..
حياتس ..

01-07-2009, 09:16 AM

حرم العمده ..

اقتباس:

أمها تبكي على طول وتترجاها تستغفر

ياحبي لها ذا الام هههههههههههههههه هي اللي ترجى بنتها تستغفر شوفوا ياامهات الدعاوي ..
الله يخليها لتس ..

الذين يشاهدون محتوى الموضوع الآن : 1 ( الأعضاء 0 والزوار 1)

أدوات الموضوع
مشاهدة صفحة طباعة الموضوع أرسل هذا الموضوع إلى صديق