 |
 |
 |
 |
 |
 |
 |
 |
 |
30-12-2004, 04:45 AM
|
|
||||
|
توه ساكن
|
غلطة الرواة والتراث الذي لم يسجل ....!!
السلام عليكم ورحمة الله وبركاته
يالله انا طالبك حمرا هو بالي = وان روّح القوم طفحن جنايبها وان برّك الجيش حداه اشهب اللالي = مهيب تورّد وسيعن صدر راكبها اللي على كورها واللي بالاحبالي = واللي على المردفة واللي بغاربها لا روحت مع سباريت الخلا الخالي = تسن الذيابه تنّهش من جنايبها مع بندق رميها ماضي لها فعالي = ومخضبن عذبها من من ضرب شاربها حديدها واذكر الله تسنه ريالي = تسن الحيايا تلوا في مقاضبها اليا لفونا من المقناص زعّالي = احدن مدح بندقه واحدن يعذربها بشرتهم بالعشا من عقب مقيالي = القايدة مع مرّق الكوع ضاربها الله يرحمك يا عود شراها لي = من واحد جابها للسوق جالبها كثير منا سمع هالنص يا سمعه على هيئة قصيدة ملقاة او مجرورة على الربابة او مغناة والنص هذا نسب لثلاثة شعراء مخلد الذيابي - فهد بن سكران - فراج بن قرقاح ولكن للاسف الكثير منا ما يعرف ان القصيدة هذي في الاصل قصيدتين القصيده الاولى لفهد بن سكران وهو من اهل الوشم من بني تميم واشتهر بجزالة شعره في مجال النظم والرد واحب اذكر مناسبة قصيدته الاولى انه كان ذو حضوة عند بن رشيد الله يرحمهم كلهم وصارت مشكلة بينه وبين بن رشيد كلام قيل وقال وعذال قاله بن رشيد منيب مسامحك في اللي صار الا اليا منك قلتا قصيده في ذا البارود اللي اهديتها لك وهي من البواريد الزينة عاد قاله فهد بن سكران ابشر :
قال المغني بدا في نايف الجالي = في راس عيطا عسيراتن مراقبها ابدا بثنّوى وادوّر قحم الاوعالي = وبقحم الاوعال تعجبني مضاربها خمسن ذبحنا شريق الشمس بظلالي = والسادسه دمها راحت مجانبها اليا لفونا من المقناص زعّالي = احدن مدح بندقه واحدن يعذربها قلت أبشرو بالعشا من عقب مقيالي = القايدة مع مرق الكوع ضاربها لي بندقن ما صنعها الصانع التالي = من صنعة البنت نحّال مقاضبها يا ما حلا حسها بالفنتق الخالي = يردها الحيد والحدبا ترد بها حديدها واذكر الله تسنه ريالي = تسن الحيايا تلوا في لوالبها اما قصيدة فراج بن قرقاح القحطاني كانت في وصف الرحول او الناقة :
يالله انا طالبك حمرا هوى بالي = وان روّح الجيش طفحن جنايبها لا روّحت مع سباريت الخلا الخالي = تسن الذيابة تنهش في جوانبها اللي على كورها واللي بالاحبالي = واللي على المردفة واللي بغاربها الله يرحمك يا عود شراها لي = من واحدن جابها للسوق جالبها من خلال القاء نظرة على القصيديتن نلاحظ انها على نفس الوزن والقافيه وكلها قصائد في الوصف وهذا اللي سهل على الناس خلطهن ببعضهن وتكوين قصيدة جديدة جمعت القصيدتين بصراحة ما انتبهت للملاحظة هذي الا يوم شفت واحد من العيال قبل كم يوم وقالي قصيدة بن قرقاح دخلت انا واياه في نقاش طويل انا اقول انها لمخلد ولا فهد بن سكران وهو يقول انها لبن قرقاح واخر شي لقينا اننا كلنا غلطانين وان القصيدة مخلوطة طبعاً قصيدة فهد انا حافظها من مبطي وكنت ازود عليها ابيات فراج القرقاح ولعل الله اسعفنا بشايب يحفظ القصيد من اهل السّر سالناه وعطانا العلم الوكاد اتمنى يفيدكم هالموضوع لو بالشيء القليل والي لقاء قريب ارجو ان يكون كلامي صحيح ان شاء الله واللي عنده اي ملاحظات تكفون لا يخلينا يعلمنا عشان نعرف وش انحن عليه وياليت تعلموني اذا كان هالموضوع يخالف سلوم الخيمة ولا لا لأني صرت في حيرة ما ادري هل انزل هالموضوع لانه من التراث ومن القديم ولا اني اخليه لاني خابركم تقولون ممنوع تجيب قصايد مهيب لك عنـــــاد
آخر تعديل عنـاد
في 04:50 AM.
|
||||
|
|
30-12-2004, 09:58 PM
|
|
|||||||||||||||||||
|
راوي الخيمة
|
اخوي العزيز جدا ........ عناااااااااااااااااااااااااااااااد
والله شكلك على اسمك عناد وعنيد ياخوي قلت لك انشر اللي تبي من تراثنا العزيز (( اللي ما له اول ما له تالي ))
شفت الاستاذ ابونجد وش قايل تراني مثلك باول مشاركاتي محتار ولولا توجيهات ابونجد ودعمه كان ما صرت راوي ولاهو يحزنون وعلى العموم ...... القصايد هذي قديمه وتوثيقها صعب لانه ما كانت بوقتها وسيله لحفظها غير العقول فكانت توخذ بالسواليف ....... اللي باوصله انه كل واحد تلقاه نسى بيت حط له بيت من عنده فصار التراث مشكوك بدرجه كبيرة ....... وهذا اللي صعب الجمع بالوقت الحالي اخيرا وليس اخرا .... اشكرك اخوي عناد على توضيحك الررررررررررررررائع جدا للقصيدتين وكذلك طرحهم اخوي عناد اتمنى اشوفك انت الراوي الكبير لحارتنا يا استاذ مجهود اشكرك عليه واتمنى اشوف اكثر واكثر من هالمواضيع الحلوة منك ومن غيرك اخوك اللي يتعلم منك ابو توووفي |
|||||||||||||||||||
|
|
|
02-01-2005, 06:29 AM
|
|
||||
|
من شيوخ الحارة
|
قبل كم يوم اقرا كتاب لشعراء من نجد عاشو قبل قرن تقريبا فوجئت بثلاث ابيات من احدى قصايد جد ابوي وهي لم تدون بس كانت مشهوره بين الناس ونسبها مؤكد وكتبت قبل قرنين تقريبا فوجئت بوجودها في احدى القصائد اللي من قرن من الزمن بس قهر  تسلم ياعناد 
|
||||
|
|
|
05-01-2005, 08:10 AM
|
|
||||
|
توه ساكن
|
نايف نجد : هلا وغلا مشرفنا الغالي واتمنى انك استفدتا لو شي قليل من هالموضوع ودامك عطيتنا على ما قالو القرين لايت ابشر باللي يبذك صباح ومساء بالقصيد والمراسلات ابوتووووفي : هلا براوينا الغالي يا عزيزي اسمي انا عنــاد ( الاسم النجدي القديم ) مهوب صفة العناد اما تعليقي على التوثيق صدقني الاشعار كلها موثقة في مخطوطات وانا قد شفت اكثر من مخطوطة مؤرخة بتواريخ تقارب وقت القصيد اللي فيهن بس اهل المخطوطات ليه ما يطلعونها للدارسين والمهتمين بالموضوع هذا ؟ وكثير من ابناء الشعراء او اقاربهم يعارض معارضة باتة جمع الدواوين انا قد سالت حفيد شاعر مشهور اشهر من نار على علم ليه ما تطلعون لجدكم ديوان قال انحن اللي رافضين والسبب يقول اكثر قصايده غزل قلت قصايده كلها في اذهان الرجال قال ولو قلت الناس مهيب ناسية ذا القصيد يعني بزعمك تبيهم ينسون ؟ قالي ايه هذا مثال على تضييع القصيد وتدوينه ومهوب من حقه ولا حق اي شخص مهما كان يمنع تدوين القصيد الحق للشاعر نفسه فاذا كان الشاعر قال القصيد هذا ومعترف به ليه نمنعه عن الباحثين والمهتمين ؟ عجبي وتحّر موضوع جديد مراسله بين فهد بن سكران و بن سبيل اعتقد ما قد سمعتها قبل وتراها رائعه جداً @@الرهيب@@ : مشكور لمرورك على الموضوع ماهمني : هلا بغاليتنا ما همني قد يكون ما ذكرتيه صحيح وقد تكونين انتي مخطية فكثير من الشعراء يستعير ابيات من قصيدة ثانيه او شطر او تشبيه او شي زي كذا وبعض الاحيان توارد خواطر مثل سالفة البيت هذا : السيف من يمنى عقاب خذيناه ..... والخيل بدلنا كدشها الاصايل هذا البيت قالوه شاعرين مشهورين في نفس الوقت في مكانين مختلفين والبيت له قصة طويلة اذا رغبتي بها عطيني خبر . ويمكن قد يكون المؤلف مخطي وناسب قصيدة لشاعر ثاني او يمكن صار دمج مثل ما نشوف اللحين في القصيدة هذي . شاكر لتس مرورتس عزيزتي بالمناسبة لقيت روايه ثانيه لقصيده بن قرقاح فيها زيادة بيت اللي هو البيت الثاني : وان برّك الجيش حداه اشهب اللالي ..... مهيب تورد وسيعن صدر راكبها كنت احسب هالبيت موجود في القصيده المدموجة ولكن قالي واحد انه موجود في قصيده بن قرقاح الصحيحة لذا جرى التنويه عقب البيت هذا تتبعه باقي الابيات زي ماهي في القصيدة تحياتي عنـــــاد |
||||
|
|
 |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
|
|
|
|
