الموضوع جميل جداً .. وفكرته من أفضل مايكون .. سردك بطل ويحمس الواحد إنه يواصل بالقرائه .
الشباب اللي ردو قبلي ماقصرو وماخلو لنا شئ نقوله بالنسبه لنقاطك اللي ذكرتيها .. لكن لإن الفكره جايزتن لي بتكلم عن نقطة " إن الكوره والرياضه بشكل عام موب مجرد لعبه "

كثير من الأخوان أتوقع مرّة عليه هالمعلومه : أوّل مره أقيم الأولمبياد كان بالقرن الثامن قبل الميلاد ؟! .. طبعاً بغض النظر عن الطريقه والكيفيه
لكن أنتم مستوعبين هالمعلومه ؟ .. يعني قبل ينولد جدي وجدك هههههههههههههههههه!
الصينيين والأغريق والرومان كانو أول يشوفون الرياضه نوع من الأنواع اللي يساعد على بناء الشخصيه .. وش أنت ؟ وش تبي ؟ وش ودك تصير؟ .. وأذكر تصريح قريته لباجيو يقول لو إني ماصرت لاعب كوره كان ماصرت نفس الشخص الحالي .. الكوره خلتني " شخص آخر "
فيلسوف من الفلاسفه يقول : أقل المواقف في حياتنا اللي نستخدم فيها لغة التعبير الشفوي تعتبر نوع من أنواع الأدب .. يعني أنت لما تمسك واحد مخّه مجيّم وتسأله ليه عبداللطيف جميل قاعد يطقطق على الضعوف اللي مثلنا ؟ فأنت هنا إخترت كم جمله وركبتها مع بعض وإخترت طريقه تعبر فيها ، هذا يعتبر شكل من أشكال الأدب ..
نفس الشئ مع الرياضه بشكل عام .. لما تركض علشان تلحق على راعي البوفيه قبل يصك ، هذي تعتبر شكل من أشكال الرياضه .. لما تمشي بالشارع وتشوت الحصاة اللي قدامك وتحاول تدخلها بين القوطي اللي طايح والزباله هذي رياضه .. لما يستنشب لك واحد وتتهاوش معه وتحاول تستخدم حركات المضاربه اللي تعرفها هذي رياضه ..
المقصد من كل هالأمثله إن الرياضه موجوده بكل جزء من أجزاء حياتنا .. مثلها مثل الفن
والرياضه شكل من أشكال الفن .. لكن فن جسدي بدال ماهو بصري .. علشان كذا حنا نتفاعل معها داخل الملعب ، لإن معدل الإبداع فيها مهم جداً .. ويعطيك فكره عن النشاط العقلي والخلاق سواء للاعب أو للمدرب .. واللي يأثرون بشكل مفصلي على مزاج المتابع .. وهنا نستنتج ونقول اللاعب هذا ذكي ، واللاعب هذا كمخه .. المدرب هذا داهيه ، والمدرب هذا سالكه معه ، والمدرب هذا دبشه ..
يعني لو نرجع لتاريخ التدريب بكرة القدم والمدربين اللي إخترعو أساليب جديده .. زي اللي سواه هيريرا بطريقة الكاتيناتشو .. ثم نشوف ميتشلز مع الكوره الشامله ، هذا نسميه " فن " .. لإن فيه إبداع يخليك تنطرب وقت تنفيذ هالخطه .. بعدها نشوف تأثير أشخاص معينيين أضافو معايير ثانيه للكوره .. زي ساكي مع الميلان .. وكرويف مع البرشا .. وآرسن مع الأرسنال (هذولاء اللي أتذكرهم) برضو اللي سوّوه هالأسخاص يخليك تعرف قيمة العنصر الفني بكرة القدم .. كيف تحولة الحركه الجسديه إلى تفاعل فكري مدروس ! (زي اللي قاعدين نشوفه من البرشا الحين) .. وكيف الثقافه تكون جزء أساسي منها .. علشان كذا نقول فينغر مدرب عظيم ، موب لإنه جاب دوري بدون هزيمه .. لكن لإنه غير مفاهيم كثييير في الكوره والبريمير عموماً والأرسنال تحديداً .. معايير مختلفه هو اللي إخترعها ، بعقليته وفكره المختلف
نفس الكلام مع اللاعبين .. لما تشوف لاعب يستغل مواهبته الجسديه مع فكر أوتوماتيكي داخل اللعبه بأسلوبه وبطريقه تخليك تفق خشتك وتسعبل من الطرب اللي قاعد تشوفه ! .. وشلون قطعها ؟ وشلون تحرّك ؟ وشلون يعدي ؟ وشلون مرر ؟ كيف فتح الزاويه ؟ وشلون شات ؟ .. فن ياجماعه فن ، أشياء بسطيه تخليك تستانس ويستاسع صدرك منها
" الفنون الجسديه " إذا قدرنا نسميها بهالشكل .. هي أكثر الأشياء شيوعاً عند الناس .. موب لإنها أبسط من غيرها .. لكن علشانها أكثر " مباشره " وأكثر " حقيقه " .. أنت لما تقعد عند التلفزيون وتشوف مباراة ، تتابع كل شئ بشكل مباشر وواضح بدون أشياء ثانيه وأدوات وسيطه .. هذي النقطه الأولى .. النقطه الثانيه أنت تتابع ناس صدقيين ، تقدم أشياء صدقيّه بنتائج ومعطيات صدقيّه .. وهالشئ يخليك تندمج وتتفاعل معهم بشكل مباشر ، وتحس إنك تمثل جزء منهم وهم يمثلون جزء منك
علشان كذا يوم كنا صغار .. من أول مباراة نشاهدها نندمج بشكل مباشر مع الهلال والنصر والرائد والتعاون " عززو لي يالقصمان خخخخخ " .. نحب الثنيان وماجد أكثر من أي شئ ثاني مع إننا ماندري وش وضعهم برّا الملعب ؟ .. لإنك وانت متخلف فكرياً قادر إنك تتفاعل معهم مباشره ، وتندمج معهم ومع الكيان اللي يمثلونه أكثر من إندماجك بأشياء ثانيه .. هنا وهنا بالذاات ، تعرف ليش الكوره كيان عظيم جداً ، وأكثر من إنها مجرد لعبه .
علشان كذا بإيطاليا وإنجلترا والبرزايل وحتى السعوديه ومصر الكوره تمثل ثقافه شعبيه .. أنت ميلاني ، سيتاوي (دزيكو) ، ساوباولي ، هلالي ، زملكاوي .. أشياء مهمه ، مهيب مؤثره لدرجة إننا نعيد صياغة شخصيتك بناء عليها .. بس مهمه لإنها ممكن تخلينا نتقبلك أسرع بمجرد ما نعرف إننا نشترك معك بنفس الشغف والحب .. ما أتوقع إن هالشئ سهل ؟!
من هالأساس نقدر نقول إن الكوره ظاهره شعبيه ، ظاهره تخليك تسوي وتفعل وتغامر ... إلخ ، الجماهير اللي تتقاتل وتتضارب وترتكب جرائم هي ماتسوي هالشئ علشان الكوره بحد ذاتها ، أو علشان فوز وخساره .. هي تسوي هالأشياء لإنها مؤمنه ومقتنعه " بالإنتماء " .. والأنتماء شعور كبير وموب سهل
ومن هنا الكوره والرياضه بشكل عام تخليك تسوي المستحيل .. لإن الإنتماء لها يكون عبر كيان " نادي " وموب عبر أشخاص .. ودايم نسمع عبارات مثل " الفريق مايوقف على فلان " و " الشعار أكبر من علان " .. دايم نسمع هالجمل وخصوصاً بالأوقات العصيبه للنادي .. لإنه هو الشئ الرئيسي اللي يخلي الرياضه عنصر رئيسي بحياة الإنسان .. شئ يملئ الفراغ اللي داخل الإنسان تجاه كيان ينضم إليه .. كيان يحقق له الإثاره والحماس والنصر ووين ممكن يكون مصيرك ؟ وكثير من الناس ياخذها بجديه بكثير من الأوقات ، لإنه حصل أشياء تجذبه يمكن مايحصلها في غير الرياضه بنفس المستوى والفاعليه .. علشان كذا قلت إن الكوره ظاهره شعبيه ونقدر نجزم بهالشئ