السلام عليكم ورحمة الله وبركاته ؛


قابلت بالنت مقاطع افلام اقل ما يقال عنها ابداع فحبيت اشارككم بها بهالقسم واتمنى ان الموضوع يحوز على رضاكم ويصير متجدد بافضل الافلام من هالنوع

حقيقه ماني عارف وش اكتب لكن بابدأ من ناحية الاختلاف بين الافلام القصيرة والافلام الطويلة , معروف لدى الكل ان الافلام الطويلة تخصص لها ميزانيات هائلة لانجاح العمل غالباً وتحتاج لعدد كبير من الاشخاص لاتمام عمليات التصوير والانتاج وحتى في ظل وجود نخبة من الاشخاص قائمين على فلم طويل ماراح يكون له صدى قوي في ظل وجود نص وقصة ردئية " احد جاب طاري افاتار ؟ " فبعض الاحيان يكون عندك فكرة معينة من المستحيل انك تستوعبها في ساعه ونصف او ساعتين ونصف لجودتها وقوتها , وبعض الاحيان يكون عندك فكرة ممتازه لكن مستحيل تخليها بفلم مدته 45 دقيقه فما بالكم ب ساعه ونص ! وغالباً تشوف فلم تخلصه تقول الفكرة حلوه بس الفلم ممل والسبب تلاقيه حشو كلام واضافات تفقد الفلم قيمته , ومن هنا بدأ فكرة الافلام القصيرة .

في ظل وجود مخرج مبدع وكم شخص مسؤولين عن الاضاءة وممثل بامكانك تصنع فلم لا يتجاوز ربع ساعه لكنه يكون بدلالات وافكار دسمه , وبعض الاحيان تضطر تتابع الفلم مره مرتين عشان تستخلص فوائد وافكار اكثر كل مره , وهذا يعتمد على الفكرة والمخرج بشكل عام حتى لو كان الممثل ردئي . من مميزات الافلام القصيرة انها في احيان كثيرة ما تحتاج اي حوار ممكن تشوف فلم 10 دقائق كله صامت معدا بعض المؤثرات الصوتيه وممكن تشوف فلم مايكون فيه بشر , ومن مميزات هالنوع انه مافي وقت متعارف عليه كل فلم ووقته الخاص عكس الافلام الطويلة اللي نلاحظ انها من ساعه ونص لين ساعتين ونص اقل شيء وهذا بسبب انه ممكن تحكمه عوامل تجارية او تسويقيه خاصة .

افلام الانميشين القصيرة تحمل نفس المفهوم لكن اختلافها كبير عن الافلام الحقيقيه القصيرة , والاختلاف بين الاثنين يكون واضح وجلي وهو المتعة البصرية حدود الانميشين واسعه ممكن رسم بسيط يخلي القصة افضل وممكن يجيك رسم دقيق يخليك تندمج مع ادق التفاصيل بالفلم وتعيده اكثر من مره أغلب افلام الانميشن القصيرة مافيها حوار واغلبها تعتمد عال3D في افلام كثير 2D او رسم كوميكس امريكي او رسم مانجا يابانية او على شكل كارتون مثل اسلوب نقار الخشب وبس ابو ذيل ايام زمان


بدأت اول فلم انميشين شركة PIXAR الشهيرة بفلم عبيط شوي لكنه بذاك الوقت كان ثورة تقنية "هائلة" تحت عنوان The Adventures of André and Wally B عام 1984 . طبعاً موجود بمموقعهم بجودة ممتازه لكن ما ابي اتعب الاعضاء فجبته من اليوتيوب بجودة سيئة



بعدها بدأت الشركة بشكل رسمي وبدأت تنتج افلام من ذاك الوقت وطبعاً مايحتاج اتكلم عن افلامها بداية بتوي ستوري 1 ومروراً بـ Up وتوي ستوري 3 والتطور الشاسع اللي نلاحظه بكل فلم جديد للشركة .

ومع تطور التقنيات الحديثه صار في شركات تسوق لبرامجها للتصميم بانتاج افلام قصيرة بدون قصة فقط انتاج من باب " الفشخرة " بقدرات برامجها وبدأت بعدها يظهر تقنيات جديدة تحت محركات ثلاثية الابعاد تستخدم غالباً لانتاج الالعاب بشكل مقارب للواقع تطورت هذي المحركات حتى تحولت نوعاً ما لبرامج انتاج مقاطع 3D ولانها تعتمد على قوانين فيزيائية لحركة الاشياء بداخل المشهد مما يعطي واقعية اكبر من التحريك اليديو ويعطي قدرات اكبر للمصمم لانتاج اعمال وصلت لدرجة ما يقدر الشخص في لقطات يفرق بين الواقع والتصميم اللي قدامه وبالتالي كل ما طلع محرك او اصدار جديد ممكن تلاقي الشركة منزله فلم قصير كدعايه لمحركها

ادري اني شطحت بالموضوع شوي لكن ما حبيت انزل مقاطع الافلام بدون ما اكتب شيء وارتجلت الكلام اللي فوق اللي اتوقع ان كله اخطاء بما انه كلام من راسي الحين خلونا مع المقاطع


الشركة نزلت العديد من الافلام القصيرة باعرضها لكم على حسب تاريخ صدورها حسب موقع ويكيبيديا ويفضل انكم تشاهدون المقاطع HD لمتعة اكبر

بعدها نجي للافلام الحائزة عالاوسكار في Best Animated Short Film غير اللي حصلت عليها pixar والموجوده فوق طبعاً باختار لكم عينة من اللي تعتبر ممتازه وبامكانكم تشوفون الباقي من ويكيبيديا :

الحين نجي لاساس هالموضوع 4 افلام قصيرة من افضل ما تابعت باحط روابطها حسب الاسوء هالمقاطع ما ينفع لها غير HD اعلى جودة متوفرة لكل مقطع وفل سكرين عشان الواحد يدخل جو صح يعني الافضل تتابعونها من نفس اليوتيوب



هذا تقريباً كل اللي عندي اتمنى من اللي عنده مقطع مشابه ينزله هنا في مقاطع فوق ولا شفتها اذا في شيء مخالف ياليت تراسلون المشرفين دايكرت يتصرفون لان كثير مقاطع صادفتها فيها لقطات مخله اعتذر عن الموضوع غير منظم لكن جمع الروابط استغرق مني وقت وماعندي وقت انسقه بالشكل المناسب فالعذر والسموحه وان شاء الله تكونوا استمتعتم بالمقاطع وبانتظار مشاركاتكم