 |
 |
 |
 |
 |
 |
 |
 |
 |
|
||||||
| سوالف حريم كل مايختص بالمرأة (تمنع المشاركات الرجاليّة) |
 |
|
|
أدوات الموضوع |
24-10-2011, 01:42 AM
|
|
||||
|
مشرفة سوالف حريم
|
الدرس الأول : إتيكيت التعامل مع الآخرين ~
بسم الله الرحمن الرحيم الدرس الأول بإذن الله مثل ما انتم شايفين وهو عن إتيكيت التعامل مع الآخرين وراح ندمج معه إتيكيت العلاقات الإجتماعيه والمقابلات والتصافح لأننا ما نبي نطول بمدة الدروس وإذا جاء التطبيق إلا أنتم ناسين .. أول شي عندنا : قواعد عامه بالإتيكيت ضروري نلتزم فيها في حال تواجدنا بمكان أول مره نروح له أو مقابلة ناس لأول مره وهالقواعد هي اللي راح تساعد في تكوين نظرة الناس لك لأن الناس يحكمون عالواحد غالباً من اللقاء الأول ويكونون في بالهم إنطباع عن شخصيتك يافلانه .. نجي للقواعد وهي : 1/ نبرة الصوت خلال الحوار لازم تكون لطيفه معتدله مافيها قسوه أو عصبيه , يعني ياحبي أنتِ لا تتكلمين مع اللي قدامتس كأنتس تكلمين أحد أخوانتس والا أصغر بزرانتس مهما كان الشخص اللي تتكلمين معه ومهما كانت حالتس النفسيه حاولي قد ما تقدرين يكون صوتس هادي ولطيف مالهم ذنب الناس إن كنتي ذاك اليوم متكرنه وتراهم مهوب عيال ابوتس تنفخين عليهم  2/التنازل عن الكلام لمن أهم اكبر سناً , هالنقطه مهمه جداً لازم أنتٍ بدون ما تعذبين امتس وهي تغمّز لتس سنه ياعمري صبت عينها وهي تبيتس تنتبهين أنتِ من نفستس خلتس ذربه ومهب كل شوي تحكين وتنبرشين على أحد من الحريم وكله كوم واللي تبدى تغلطهم كوم ثاني .. أدباً وذوقاً وخلقاً وكل شي أن الوحده ما تغّلط احد قدام الناس وشلون عاد لو كان شخص اكبر منها ..! 3/أسرار الغير , لا تحاولين تعرفين أسرار الغير أو تنشرين غسيل احد أعطاتس سر , عزيزتي <-- خشه تخز القصمنجيات خصوصاً  مهما كانت بلاغة شفتس ولقافتس وحقرصتس علشان تعرفين اقضبي لسانتس ولا تسألين وتعرضين نفستس لمواقف محرجه حتى لو كانت اللي قدامتس مؤدبه وما احرجتس ترى بنفسها بتنفر منتس ويمكن بقفاتس تقول عنتس حقنه وبثره لذلك احترمي نفستس من الاول وكبي عنتس هاللقافه .4/ الإبتعاد عن الكلام المصطنع , خخخخخخ هذي النقطه محذوفه نهائياً من قواميس اغلب البنات أصلاً ألحين مافيه الا قوة تصنع الله يجيرنا .. لذلك يا عزيزتي بطلي تصنع خلاص صارت حركاتس مكشوفه خلتس على طبيعتس وصدقيني بتخشين قلوب الناس ويحبونتس  5/ ابتعدي عن الأحاديث السياسيه والخلافيه لتجنب الإصطدام مع من تتحدثين معهم .. لا تسوين فيها ام المفهوميه يعني انتِ بمكان وعند ناس اول مره تشوفينهم مالله حادتس على المجالد والنقاشات اللي فيها تضارب آراء ويصير مشاحنات وتقلبين المكان الإتجاه المعاكس  احتفظي يرايتس لنفستس ولا تحاولين تبينين انتس تطقين اصبع لسعود الفيصل حبيبتي ..6/ تجنبي الحديث عن نفسك وعن مآثرك وعن صحتك ومرضك .. لا تزعجين خلق الله بأمراضتس وبلاويتس لو فيتس شي تسان ما نطيتي ورحتي للناس المريض مهب يسير ..! ولا تشغلين الخلق بإجازاتس يا ظلال صلاح الدين الايوبي وكل كلامتس انا وانا وسويت ورحت 7/ كوني متواضعه في حديثك واستأذني لتأخذي الكلام .. شوفة النفس وانتس احسن وحده بالعالم هالحركات خليها عنتس حتى لو تتكلمين مع ناس اقل منتس شأن ترى ربتس وربهم واحد وقبل لا تنبرشين على أحد بسالفه إذا كان قدامتس مجموعه يتناقشون من الإتيكيت طبعاً انتس تستأذنين مثلاً تقولين لو سمحتوا لي أنا أشوف الموضوع من ناحيه ثانيه او تقولين عفوا بس ... ألخ يعني لا تجين خبط لزق وتقطين خلتس ذربه واستأذني .. 8/ لا تهمسين بأذن أحد وأنتِ بمجموعه .. حركات التنغيز والحش والتعليقات الجانبيه بينتس وبين اختس او اي وحده جنبتس مالها داعي لو مره مزنوقه وما تبين يفوتكم المنظر اغمزي لها ارجفيها على الاقل <-- برى  9/ لا تتبادلين مع الحاضرين نظرات فيها غمز عالآخرين لا احد يقول انتي قايله فوق اغمزي تراي امزح 10/ لاتتكلمين مع صديقتس او اختس او اي وحده بلغة اجنبيه وأنتم بمجموعه ما يعرفون هرجكم عيب حطي نفستس بمكانهم مالتس داعي ترى 11/ لا تهزأين بأحد وامتنعي عن المزاح .. يعني انتس مسويه دمتس شربات واقوى وحده تذب هالحركات خليها هنا بالمساطيل والا مع اخوانتس بس عند الناس اقضبي لسانتس مير عند حريمنا لو تذبين وتستهبلين قسم ما يطهرتس من ألسنتهم ماء زمزم أصلاً عيب تتطنزين وتمزحين مع ناس علاقتس فيهم رسميه أو مع ناس تمونين عليهم بس بمكان عام او فيه غرب 12/ استمعي للشخص اللي جالس يكلمك وركزي معه وحسسيه انتس ماشيه معه عالخط بنفس السالفه مهب شغل تسليك وتهزين بهالراس على غير سنع ترى الناس يحبون الشخص المستمع خصوصاً الحريم لأن هوايتهم بالدنيا الهذره حتى لو ما جازت لتس سالفتهم ما عليه سلكي لها بهالكم دقيقه وخلها تأخذ عنتس فكره حلوه أنتس لبقه وعارفه كيف تتعاملين مع الناس 13/ الإبتعاد عن الكذب والحلف, يعني شي معروف وما يحتاج له شرح أصلاً الكذب حبله قصير وأنتِ منتب محدوده تكذبين علشان الناس يتقبلونتس او ينعجبون فيتس برضو الحلف وكثرة الإيمان أول شي فيه نهي عن جعل الله عرضه للأيمان ثاني شي كثرة الحلف تدل على أنتس وحده فاقده الثقه بنفستس وبكلامتس وما عندتس طريقه تخلين الناس يصدقونتس فيها الا بالحلوف وحتى لو كنتِ صادقه بالسالفه اللي تقولينها أهم شي أنتِ واثقه من كلامك وش له كثرة الأيمان ؟! 14/ لا تتملقين ولا تستغيبين ولا تشهّرين , يعني حركات التلزق مفضوحه فيه ناس الحمدلله والشكر من يشوفون وحده كاش او منصب او لها مكانه هات يتلزق ومسح جوخ اسأل الله لهم العافيه يعني هي بتعطيك شي من حلالها ؟ او حتى لو بس تبين تكبرين بعينها ترى موب زين تكبرين بعين وحده وتصغرين بعيون الناس حتى هي لو سلكت تراها فاهمه الكفت وعاجبها الوضع ( من اللي ما عنده نظر وطاوعتس وخلاتس تدرسين إتيكيت !!) بعد الغيبه والتشهّير من الأمور السيئه الناس يأخذون عنتس فكره إنتس وحده لسانها بسبع شطلات على قول الاشوام حتى لو كان الهدف من سالفة التشهّير انتس تبين تبينين للناس أنك فاهمه سالفة ما أو حادثه معينه تقدرين تذكرين الواقعه بدون تشهّير 15/ قدمي الثناء والشكر بكثير من الأدب واللياقه , خلي لسانك حلو عزيزتي حواء كثيييييير بنات يفتقدون لهالنقطه وهي الشكر ما أدري هل هم يعتبرونه تقليل من شأنهم او مدري وش مقصدهم بالضبط أساساً الواحد المفروض يشكر على أقل الأشياء وبكل أدب وإبتسامه الحاصل بهالوقت كل من خلص شغلته سحب على اللي قدامه مع ان كلمة شكراً مع إبتسامه ما تضر أبد بقدر ما هي تكبرك بعيون الناس ولا ننسى أن من لا يشكر الناس لا يشكر الله .. مثال بسيط لو كنتِ بحفله وقدموا لتس عصير أو شوكولاته وما تبين المفروض أنتس تقولين شكراً وتبتسمين قبل لا ترفضين مهب لا مابي مايضر والله ولا ينقص شي من قدرتس يا سعادة السفيره عزيزه الشكر ممكن يكون لكلمه حلو إنقالت بحقك أو بخدمه بسيطه موب لازم يكون الشي كبير وعظيم علشان تتنزلين من عليائتس يا حبيبتي وتقدمين آيات الشكر والعرفان16/ أنك تتفاعلين مع سالفه إنقالت قدامك هذا شي حلو بس أنتس تكررين علامات التعجب والإستغراب كل شوي هالشي مرفوض ثم مرفوض وأبداً مو من الإتيكيت تكرار هالحركات 17/ مو من المستحب أنتس تتطوعين وتتحفين الناس بآرائتس ونصايحتس وهم ما طلبوا منتس همن تأكلين فشيله كبر راستس مثل مره كنت بمشغل وكانت الخدمه سيئه جداً وشغلهم موب ذاك الزود جت بنت بالثانويه شعرها حلو تبيهم يقصونه تطوعت بكل لقافه قدام الحريم وقلت نصيحه لا تخلينهم يلمسونه ترى بيخربونه ما انصحتس فيهم شوي ناظرتني بطرف عين وهي تقول هذي المره الرابعه اللي اجي اقص عندهم وعند نفس الكوافير وكل شغلهم بشعري بطل  لذلك احتفظي برايتس لنفستس دام محد طلبه منتس احسن من التلقيط وإبتسامات العالم الغبيه بوجهتس 18/ لا تكونين ثرثاره وتتوقعين ان العالم مستمتعين بالسالفه اللي قاعده تقولينها مثل إستمتاعتس فيها 19/ التفاصيل التفاصيل خصوصاً المواضيع العابره والتافهه ابتعدي عن ذكر تفاصيلها لأن الناس يملون منها 20/ لا تقولين هي عن وحده موجوده بينكم ترى الضعيفه لها اسم اذكريها بأسمها أليق وأحسن .. الحين خلصنا الجزء الأول من الدرس وهي قواعد عامه وأساسيه نجي الحين نتكلم عن جانب آخر واللي هو : إتيكيت التعامل مع الآخرين: حالياً بالوقت اللي احنا فيه غالباً ما نشوف العلاقات الإنسانيه اللي تربط الناس ببعض تفتقد للكثير من القيم , لكل إنسان منا جانبين جانب يستحق المدح والثناء وجانب آخر مغاير يستحق النقد وبما أن الشخص الطبيعي دائماً يبحث عن الكمال والشعور بالسعاده خصوصاً في تعامله وعلاقاته بالمحيطين لازم يكون عنده توازن ومحد غيره يقدر يضبط ميزان السعاده والرخاء لذلك من الواجب أنه يتحلى بـ : 1/ الموضوعيه : لازم الشخص يكون موضوعي وواضح وصادق مع نفسه ينقد نفسه قبل ينقده الآخرين + انه يتقبل نقد الآخرين له .. نجي نوضح النقطه اللي فوق ,اللي نشوفه الحين والغالب بين الناس أن كل شخص قاعد يشوف نفسه فوق مستوى النقد واعلى من أن شخص يجي ينتقده مع انه المفروض أن الواحد ينقد نفسه قبل لا ينتقده الغير , بمنتدى مجاور قريت موضوع عن وحده جايه تتكلم عن الناس اللي شايفين حالهم وحديثين النعمه وتنقدهم بأسلوب وقح وذكرت بكلامها أنها مره قالت لوحده يا كلبه وزعلت عليها, وخويتنا في الله شايشه ليش تزعل , لا وصنفت هالبنت اللي زعلت انها حديثة نعمه و تغيرت يوم صار معهم قرشين وصارت ما تتقبل احد يقول لها كلبه !! مع أن كاتبة الموضوع نفسها لو أحد جاء وقال لها كلبه متأكده ميه بالميه انها راح تقوم الدنيا ولا تقعدها.. 2/ المرونه : المرونه وعدم الإنحياز والحياد كلها مترادفات من الضروري اننا نطبقها بتعاملنا مع الغير بس الشائع حالياً العكس الكل يبحث عن تحقيق مصلحته وغاياته نسينا شي أسمه حياد خصوصاً إن كانت المسأله تتعلق بالمصالح الشخصيه بالإضافه واسمحوا لي بهاللفظ ( التعزيز ) عندنا شعب يحبون يعززون لبعض ويرفعون في بعض حتى لو على خطأ تشوفين ثنتين بمجلس خوات أو جيران وحده قالت رأيها بسالفه والإمعه اللي جنبها عارفه انها مهيب يم جاده ومع ذلك مشتغله وراها بكل كلمه تردد وهي صادقه وهي صادقه !! والهدف صراحه غما تكسب رضا هاللي جنبها أو هدفها مجهول ( أدري الشرح غبي ) بس احسني بنت كليه ما عمري شرحت لأحد 3/ التواضع - التواضع - التواضع : وأنا أشوف انه أهم نقطه لو الكل عندهم هالخصله كان نص الدنيا بخير .. يا عالم صرنا نستغرب إذا شفنا أحد طبيعي ومتواضع ويتصرف بتلقائيه وعفويه وأخلاق الحين كل الناس رافعين خشومهم على سنع وعلى غير سنع والله صرت إذا شفت وحده رافعه خشمها وهي عندها مميزات اقول مير هذي ما عليها شرهه فيه شي يشفع لها ..! شوفوا وين وصلنا للأسف .. أنا أبغى أفهم شغله وحده بس اللي شايفه حالها على وشو هل هي مولوده بالشهر الرابع مثلا ؟! تملك قدرات خارقه , او هي عندها عقلين ؟! ما نبي نفكر بأشياء مستحيله خلنا نفكر بحدود المعقول ونسأل سؤال واحد بس وش تتميز عن غيرها فيه ؟! ضروري كل وحده تسأل نفسها أنا مين ووش أصير ووش إمكانياتي وقدراتي وليه أتعامل مع الناس بالفوقيه وهل بأتقبلهم لو أحد عاملني بهالأسلوب ولا ننسى شي مهم أن من تواضع لله رفعه الكلمه الطيبه والإبتسامه فيها شي عظيم تخلي الشخص يدخل القلب بدون مقدمات أو حاجه للتملق والنفاق 4/ سعة الآفق : النقطه هذي مرتبطه بالنقطه الأولى وهي الموضوعيه سعة الآفق انك ما تتعصب لرأيك وحركات ما تنكسر كلمتي ترى بطلوها يا حبيبتي لازم تكونين منفتحه عقلياً تتقلبين رأي غيرك تسمعين وجه نظره كامله وفيك تتقبلينها وفيك ترفضينها وأكيد لك كل الحق أنك تناقشينها بشرط أنك تكونين عارفه متى تعارضين ومتى تكونين مع ومتى تحجرين لهم نجي للجزء الأخير من الدرس وهو إتيكيت المحادثه والكلام : (فن المحادثه ) -الإستماع : المحادثه فن إجتماعي على وجه التحديد ,وممكن الشخص الخجول يكون شخص ماهر في إدارة نقاش في أي وسط جماعي مو مع فرد واحد فقط ومن القواعد الأوليه أن يكون الشخص لطيفاً ويبدي إهتمام بكلام الآخرين , والشخص الإجتماعي لو تلاحظون دايم تتوافر فيه صفة هامه وهي الإنصات للغير بإهتمام وترك الفرصه لهم بالتحدث مو بس كذا لا زياده على الإستماع يحسسهم بأهميتهم وهالنقطه مهمه جداً لتس يا بعد قلبي .. - بدء المحادثه : كيف نبدأ الحوار مع شخص ؟! نبدى الحوار إما بالتحدث عن المكان اللي متواجدين فيه أو عن سبب تواجدك فيه إذا كان الشخص بينتس وبينه معرفه تبدين الحديث معه بالسؤال عن اخباره وإن قضت الأخبار وسكتوا وتبين تفتحين موضوع تكلمي عن الذكريات او عن شخص تعرفونه أنتم الأثنين , أما إذا كنتي بحفله ممكن تكون راعية الحفله هي البدايه في الكلام وتخلينها محور للحوار الاول , بعد مهب شرط ان كثرة الكلام دليل على لطفك .. نقاط مهمه تتبعينها بالحوار اهمها النظر للمتحدث بالإضافه لتوجيه بعض الأسئله عن الموضوع اللي تناقشونه علشان تطلين الحديث لأكثر فتره ممكنه وموب شرط متابعة الحوار يكون بالكلام مرات تعابير الوجه والعيون أفضل من الكلام أحياناً - الثرثره والقصص الطويله : إذا أنتِ اللي كنتِ تتكلمين أفضل لتس وللموجودين ما تحكين قصه طويله لأن الناس بتمل وهي تسمع أما إن انجبرتي انتس انتي اللي تسمعين وكان فيه شخص يقص قصه أو حادثه صارت له تقدرين تكسرين هالسكون والملل بأنتس تطرحين أسئله عالموجودين إن حصل لهم بيوم من الأيام نفس هالموقف - المقاطعه أثناء الحديث : المقاطعه شيء سيء وانتِ تتكلمين حاولي ما تقطعين كلامتس وإن حصل وانضم لكم شخص للمجموعه عيدي السالفه بإختصار علشان ما يوقف مثل الاطرش بالزفه وبرضو علشان ما يملون اللي كانوا يسمعون السالفه وهم ينتظرون التكمله . - المعرفة: من أسرار فن الحديث معرفتك بالشخص اللي قدامك واللي جالس تسولف معه ومعرفتك بالمواضيع اللي تناسبه وتناسب إهتماماته وهالشي يمكن لأي واحد يعرفه أما بالنظر للسن أو معرفة عمله أو من شكله الخارجي ممكن الواحد يخمن إهتمامات ومعرفة الشخص اللي قدامه , بالإضافه لمعرفة الأخبار اليوميه وخاصه إن كانت الوحده خجوله لأنها إذا بتبدى حوار راح تستخدم الأخبار علشان ما يكون شكلها غبي وهي قاعده تختلق موضوع تسولف فيه .. فيه كم نقطه راح امر عليها سريع سريع وهي عن إتيكيت التصافح والمقابلات : 1/ التصافح بالأيدي : المصافحه لازم تكون بحراره لكن بنفس الوقت مهب تتحمسين وتعصرين يد الحرمه + النظر بعيون الشخص اللي تصافحينه وهالنقطه مهمه بالإتيكيت لنها تحسس الشخص بالإهتمام موب تسليمه عابره 2/ الإتصال العيني ( لغة العيون) : إذا جيتي تتكلمين مع شخص سواء تعرفينه او ما تعرفينه ضروري تناظرينه بس مهب عاد بحلقه اهم شي تناظرينه وقت الحكي لأنتس إذا ما ناظرتيه هالشي بقاموس أهل الاتيكيت يدل على أنتس إما خجوله أو غير مهتمه بكلامه وعدم الإهتمام يصنف من قلة الأحترام علشان كذا انتبهوا انتبهوا 3/ الإبتسامه : إذا بديتي معرفتك بالشخص عن طريق الإبتسامه بيسهل طريق التعارف بينكم فيه ناس يعصبون إذا احد ابتسم بوجيههم ويفسرونها من باب السخريه لذلك انتبهي لإبتسامتك وخلتس ودوده وأنتي مبتسمه مهب تفتحين شدوقتس ويفكرونتس تتمسخرين ..! .................................. هذا الدرس الأول وأتوقع أنه معروف عند الغالبيه بس حبيت استفتح فيه الدروس لأنه عن العلاقات الإجتماعيه والإنطباع الأول .. أعتذر منكم عالتأخير لأني توني افتح عيني اليوم الله يبعد عنا وعنكم الامراض والأنفلونزا اللي شابه بالعالم الأسلوب يا جماعه ابي تقييمكم عالأسلوب وترى بلشت وأنا اكتب ومسحت وكتبت كم مره , كل مره اصير جديه احس الدرس ممل وإن جبته بأسلوبي حسيت انه مهب درس إتيكيت تسنه جلسة ضحى وتراني أول مره انزل درس لذلك محتاجه آرائكم واللي بتنقد تجي تنقد بالتقييم مهب قدام الناس تطيح هيبة الأبله ويارب يكون الدرس مفيد وذاكروا زين ترى بالإمتحان ما نرحم لحبيباتي التلميذات  ترررررررررن صفرت الفسحه أنطلقن .
آخر تعديل اخت اخو اخته
في 01:51 AM.
|
||||
|
|
24-10-2011, 03:36 AM
|
|
||||
|
مشرفة الصندقة
|
 بعدين تعالي انتي جايه تعلمينا الاتيكيت والا تهاوشين ههههههههههههه الله يررررجك يختي اسلوبك شيء ضحكت اكثر من اني تعلمت ههههههههههههههههه طيب كل اللي قلتيه معروف ما فيه شيء جديد يعني<- - ابشري بالرسوب هههههههه لالا جد كل اللي قلتيه تمام و شرح وافي و ما يحتاج تستاهلين عشره من عشره عليه |
||||
|
|
|
24-10-2011, 04:22 AM
|
|
||||||||||||||||||||||||||||||||||||||
|
بلاد العرب اوطاني
|
بالنسبة للقواعد العامة يعني نجلس صم بكم أمزح ههههه
الحركة ذي غبية حتى الرسول صلى الله عليه وسلم نهى عنها ويوم تجيك من حريم كبار تصير أغبى من جد .
أكثر فن أُجيد إستخدامه هههههه أكثر من الكلام بالنسبة للإبتسامة هي الاساس فكل شي يعني حركة بسيطة بس تألف قلوب اللي حولك لك ويعطيهم إنطباع حسن عنك بدون ماتقولين كلمة في السابق أنا كنت من النوع اللي مايسولف كثير كلمة أو كلمتين خصوصا في الاجتماعات الكبيرة أجلس متفرجة فقط كل من يشوفني يقول شايفة نفسها مفسرين السكوت إني ماحبأسولف معهم بعدين صرت إذا ماسولفت أبتسم تغيرت النظرة لي يعني الابتسامة تغير كثير . الدرس نحفظه وتسمعينه أبلة هيلة ولا ؟
آخر تعديل ألوان ملونة
في 05:23 AM.
|
||||||||||||||||||||||||||||||||||||||
|
|
|
24-10-2011, 07:34 AM
|
|
|||||||||||||||||||
|
الدونه بنفو كورليون
|
اول شي الاسلوب بطططل و خفيف ع القلب و ينحب
ان شاء الله ابله هيله .. مَ أعيدهآ  لا والله الجد .. اعترف اني دايم اسوي هالحركه بس خلاص توبه شُكراً على الدرس الاول وان شاء الله لي رجعه له بعد الفسحه يَ ابله |
|||||||||||||||||||
|
|
|
24-10-2011, 10:13 AM
|
|
|||||||||||||||||||
|
صاحبة سمو الحارة
|
 ابله فهمت الدرس ,,,وكل اللي قلتيه مطبقينه بحياتناا...ابله ...انااكره بعض البناات اللي كيذا وش اسوي بهن
ابله اكره,,,لاشفته تصاارخ. .واني اناا فااهمه ...وضحك وكل شوي تقول ياربي لك الحمد مو كيذا...وتغصبني اقتنع باللي تقوله,,,,,مااغير اهز راسي بالموافقه عشان تسكت فضحتنااابله..طريقتي صح ولالا...اسكت بالأخير واهز راسي..ولا خطأ؟ التقيم مايفتح معي ....ليه
آخر تعديل ذكرى 1428
في 10:15 AM.
|
|||||||||||||||||||
|
|
|
24-10-2011, 12:04 PM
|
|
|||||||||||||||||||||||||||||||||||||||||||||||||||||||||
|
مسطول يمون
|
درس جميل أغلب اللي طرحتيه مرينا فيه ..الوكاد أنا تعلمنا
هذا الدرس أطبقه على نفسي ..لكن اكره اللي اكلمها وتلف يمين وشمال ودي أعطيها طراق ع راسها
هذا بسمعه لأختي راعية ادق التفاصيل يآآنها غاثتني 
هذي الصراحه كنت أسويها بس تبت .. بس أشوف ناس تسويها يعطيكي الف عافيه ,, لكِ |
|||||||||||||||||||||||||||||||||||||||||||||||||||||||||
|
|
|
24-10-2011, 02:48 PM
|
|
||||
|
كاميرا ساهر
|
ليه ماافيه وااجب . معليش انا مسويه اضراب لين تنزلين لنا واجب < يقالتس من الدفره الحين ههههه وبعدين ياابله هيلا خلي زميلتنا هناء محمد تنزل جمجمتها يختي جالسه قدام وانا يالقزمه ورى يالله اشوف . ولاتهون شاطحه هي ونظارتها اللي قاصتها لـ خمس سنين قدام , خليهم يرجعون ورى ترى مانشوف انا وداعسسه , هههههههههههههههههههههههههههههههههههههه هنا + شاطحه = احوبكم لاتزعلون تعرفون حركات البنات الشقيات بالصف المهم نجي للدرس الاول . بالنسبه لنقاط الدرس جميعها معروفه ومٌطبقه على الغالب .. وان شاء الله نلتزم بها ككل .. اما بالنسبه لـ اسلوبتس فهنا الصراحه مدري وش اقول الصدز لولا اسلوبتس ماكملت قرايته . لانه من جد ممتع ويدخلتس جو حماسي ويخليتس تتصورين بجاحة المواقف السلبيه .. ويقنعتس فعلا انه خطاء ولايمت للذوق العام بصله .. لذلك اشكرك يابله على هالاسلوب الممتع وان شاء الله نذاكر كويس . بس اهم شي لاتنسين جمجمة هنا ونظارات شاطحه لازم يرجعون ورى , هههههه هيله دووتس
|
||||
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
|
|
|
|
< امحححق طالبات 
يحمسسسس للمتابعه 
