الفصل الأول


حركت نسمات الهواء شعيرات مقدمة رأسه الناعمة وهو يتأمل الأفق, كان مظهره يوحي بالرفاهية, ومن جلسته تستطيع القول بإنه شاب مميز مختلف عن البقية, لكنّه كان ممتلئ بالأسى, من ينظر إليه يحسبه يعيش كارثة و أن حياته مهددة بالانهيار إن لم تنهار منذ مدة, كانت الدمعة تلحقها أختها بسرعة قبل أن تغتال أصابعه لهوهم البريء هذا.

كان الهم يحيط به من كل جانب كالجبال تحبسه بين صخورها العالية عن الحياة, آه .. خرجت من قلبه كاعتراف باستسلامه و انكساره.. وفي وسط هذه الكآبة, وعندما بدأت عينه تسقي الطاولة بدموعها اقتحم اعتكافه الخاص شخص مندفع, ونظرته تثير الرعب, كانت عيناه متسعتين وشفتيه تتمتمان بكلمات صامتة؛ شعر الشاب برعب من هذا الموقف وسأله بخوف: مين أنت وش تبي ؟

بدا على المقتحم الغباء المطلق وهو ينظر إليه وكأنه لايفهم العربية, قبل أن يقرر الإجابة بأسلوب غريب: هاه ؟ أيه .. آ .. شسمه .. يا أخي .. مدري .. بس ... آ
ثم صمت عن إطلاق الكلمات المبعثرة وظل يتأمل وجهه بانبهار, وكأنه أمام تحفه فنية بديعة, قبل أن يعود ليتكلم بأغرب جملة يمكن أن تقال في هذا الموقف: يا أخي تصدق إني مخربط مدري مين فيكم الوردة .. أنت أو الوردة ذي؟ <

هنا حس بشي مثل الدوخة إلا هي الدوخة نفسها.. من جده ذا؟!! فتح عينه إلى آخرها وما قدر يتكلّم ولا كلمة, وهو مو مستوعب وش اللي جالس يشوفه أو يسمعه, و كمّل المقتحم بصوت حزين والدمعات تقوطر مع عيونه: ... يا أخي طول عمري و أنا وحيد.. لما طلعت من بطن أمي طلعت لحالي.. وحتى إخوان ماعندي.. لمّا دخلت المدرسة كان عندي صديق واحد وكان خبل من حبه للأسكريم رمى نفسه قدام سيّارة الإسكريم وهي تمشي ومات .. وسموة شهيد البوظة

تحولت الدوخة إلى تيار كهربائي, حس كأنه حط أصبعه في فيش الكهرب وصارت الكهرباء تمشي بجسمه بلا رحمة, وش هالماضي الأليم, وهو المسكين كان يحسب نفسه أكثر أهل الأرض بؤساً و أنها كلها أيام ويتوسد قبره ميتاً؛ تفجرت الدموع من عيونه, وحس أن ودّه يشم الوردة اللي قدامه, ويقول بيت شعر في شجاعة هذا البطل اللي يواجه الحياة بصبر وقلللللللللب ممتلئ بالقوة والثبات والإصرار على الإستمرار بالمشي إلى القدام برغم كللللل شيء يوجع القلب ويقطع جدرانه بوحشية.. وكمان كان وده يصيح, لكنه تماسك ورد عليه: طيب أنت شايفني مجلة أريد حلاً عشان تقول لي هالكلام ؟
شهق المقتحم فجأة لدرجة إنه انتفض بعنف, وقال المقتحم بألم قوي: لااا .. أرجوك؛ مافيني طاقة لأقابل أوجاع أكثر.

بصراحة هو عنده وجهة نظـر لما يبدأ الواحد يتكلّم بالفصحى فجأة وبدون مقدمات اعرف أن هذا الإنسان بدأ يتكلم متحرراً من القيود, يعني أنه بدأ يتكلّم بصدق, إيه بس .. وش اللي جابه لي؟ لاتقول إنه يحبني لأنه أعجب بخشمي مثلاً : طيّب.. وليش جاي عندي وأنت ماتعرفني؟
بدا الارتباك على المقتحم, وكأنه يبي يقول شي بس متردد, قام يهرش رأسه, قبل مايقول معترفاً بصوت واطي: أنا أعرفك من فترة بس أنت ماتعرفني.
هو بس سمع هالجملة إلا و الغضب يتفجر من عروقه, قام من محلّة وهو شايل المزهرية وهو ناوي يكسرها على راسه, شف الحقير وش يقول .. كان يراقبني: فهمت عليك يا حشرة.. أكيد مصورني وتبي تبتزني يكون بعلمك يا حقير إني ما أقدر بثمن

توقع أن تقوم معركة بعد انكشاف الأقنعة, وأن يبدأ المجرم لعبة الابتزاز, لكن المقتحم لم يفعل شيء سوى أن حط يده على راسه خائفاً من الضربة وجسمه يرتعش من الخوف, وش هالمجرم البقرة: مسوي فيها أخلاق ؟
قال المقتحم بنفس الصوت المرتعش وبذات الجلسه الخائفة السابقة وبعينين مليانة دموع تقل مسبح: على طاري الأخلاق أنت أحسن واحد بالحياة كلها

ياعمري شكله مريض نفسي طاب علي فجأة يبتزني ثم طايح فيني مدح؟, حس بالشفقة تجاهه وبدأ يهرش في جيبه عشان يعطيه خمس ريالات كنوع من الإحسان إلى هذا المخلوق المسكين, شال المقتحم يده من على راسه, وقال له بوجه ممتلئ بالدموع: إن ماخليتني أتكلم راح أنتحر.. برمي نفسي من سطح بيت خالتي..
ياللكارثة.. وش هالآدمي اللي مدري من فين طلعني, وش هالمخلوق اللي يتشكل بين الإجرام و المرض النفسي .. و الحب ؟!

كانت عيون المقتحم تبي تنفجر من كثر الدموع فيها, وكان واضح إنه كاتم الصيحة, وإنه شوي وينشق لنصين من قو الحالة النفسية السيئة اللي يعيشها, المشهد كان خرافي, ومؤثر تقل مسرحية لفنانين محترفين, وبدون شعور بدأت الدموع تنساب معه, جلسوا سبع دقايق كاملة يتبادلون النظرات الممتلئة بالدموع, قبل ما يسأل المقتحم بلهجة أبوية: طيّب وش المشكلة الحين؟
بصوته المرتجف: قلت لك مشكلتي

بصبر يشوبه شيء من الارتباك بسبب المأساة اللي يشوفه بوجه اللي قدامه: اعتبرني حمار و عيد كلامك مرة ثانية
قال له بانكسار وضعف شديدين: يا أخي لاتقول على نفسك حمار ..
حاول يتماسك بصعوبة, يابثري .. علشان واحد ما أعرفه مدحني أحس أن ودي أرقص استغفر الله بس: طيّب .. ممكن تقول لي وش السالفة
حس بالشفقة تجاه المقتحم لأنه من جد كانت عيونه حُمُرْ من قو الصياح, وكانت إيده ترتجف وهي تمسح راسه علامة التوتر, أما وجهه فهو نقطة الانفجار .. كان وجهه صفحة تؤلم كل من خلا قلبه من العاطفة, قصة أوجع من الوجع نفسه كانت محفورة على وجهه, مسح المقتحم الدموع وهو يقول وهو على حافة الانهيار: خلاص.. أنا استهلكت طاقتي.. أحس أن قلبي مقسم نص عندي ونص عندك

مو كأنه يغازل ؟ يلا يلا معليه خل نشوف آخرتها, لكن –والحق ينقال - كان الكلام مؤثر, وكان يمثل التماسك, أصلاً كل كلمة قالها كانت تؤثر عليه بس هو كان يمثل الصلابة و الغضب عشان لايحسبه خبل ماصدق أحد يمدحه, كمّل المقتحم المأساة بعد شهقتين: ماعرفت الحنان إلا لما شفتك.. شفت لمّا تاكل اسكريم و أنت مشتاق له في آخر الليل بعدين تروح تنام و أنت مروق, أنا أحس زي كذا.. أنا محتاج إلى صديق مثلك.. لأ .. أنا محتاجك لأن تكون صديقي
هذه الجملة كانت الدمار الشامل و النقطة التي أسقطت جدار الجمود الكذّاب, سقط على الأرض فجأة وانفجر باكياً, رباه.. كم هو ممتلئ بالعاطفة الصادقة, كنت أظن أن محد بيأثر فيني بعد مسلسل "ستائر الدانتيلا" المكسيكي

جلسوا يصيحون في الشارع تقل بزارين مضيعين أمهم, قبل ما يقوم المقتحم ويمسك يده قائلاً بحزم رقيق: هذي مناسبة سعيدة و المفروض نضحك مو نصيح.. بالمناسبة أنت وش اسمك؟
مسح الدموع من عينيه بصعوبة لأن دموعة كانت كثيرة مرّة, وقال بصوت مبحوح : اسمي (مارتن)
جلس المقتحم يسبل عينه, الظاهر إنه يستطعم الاسم وشكله عجبه, قبل ما يقول: وأنا (عباس) ماكنت أدري إنك حساس كذا ..
هرش مارتن رأسه شوي قبل مايقول بحزن: لأن كلامك لَمَسَ أشياء في قلبي .. أنا أصلاً ماعندي أصدقاء.. ما توقعت إني أشوف إنسان وفيّ قبل لاأموت
قال عباس بصدق: بصراحة أحس إني في مسؤولية عظيمة.. لأنك تحفه نادرة ينبغي رعايتها بالحب والحنان والرقة والدلع والدفء والمودة والرحمة <

وخروا عن مارتن شكله بيغمى عليه مسكه عباس بقوة وهو يقول له بلهفة: خليني أنقذك لا تطيح أرضاً
ياسلام ما أجمل الصداقة الحقة, تماسك مارتن بصعوبة قبل ما يقول: خلاص يا عبسي أنا أحس أنك إنسان عظيم و قررت إنك تصير الأنتيم بتاعي
عادت الدموح تطفح من عيني عباس وهو يتمتم برهبة: شرف وربي لا أستحقه, ياليتني أعطيك حقك ولا أظن
رباه أرحمني من لسانه, قام مارتن يصرّف يعنني جالس أحك راسي مين قال أني مستانس أن فيه أحد يمدحني.. جلس مارتن يعنني ما سمعت وترا عادي يعني.. ثم قال له عباس: بهذه المناسبة السعيدة أنا بعزمك على سنكرس وببسي

ومسك مارتن يد عباس وقاموا وصاروا يمشون بحركة بطيئة باتجاه غروب الشمس, والناس يطالعون فيهم بنظرات حالمة
وهم يمشـون سال مارتن عباس باهتمام: الحين وش اللي عجبك فيني يا عبّوسة
ابتسم عباس ابتسامة هبلا حبتين وقال: لفت انتباهي خشمك.. ومنه عرفت إنك المخلوق الكيوت الذي احبه ..
... وامتلأت الدنيا بالحب

نهاية الفصـل الأوّل

كنت ودي أقول كلام وهونت وبإختصر كلامي برد بسيط
لكن القصة مافيهاش شي من توقعات الحرافيش ولا هي بحولها أبد
علاقة مارتن بعباس علاقة صديق بصديقه لكنهم خبول شوي
وتراني أكتب لأوضح أهداف وبذكرها في نهاية القصة بعدين أحكموا بعلاقتهم
لاحظوا أني كتبت في العنوان قصة ساخرة

الله يسامحك يا أخي خربت حماسي للإكمال < مدري وش كاتب عاد

بعد شوي إن شاء الله بينزل الجزء الثاني من هالتحفة
بس ودي أكرر تراها قصة ساخرة و لا تتحمسون واجد قبل لاتشوفون النهاية < كاد المريب ... الخ
لا بس من جد ودي أنبه أن بعض الأحداث لها معنى و إن شاء الله بندردش فيها بآخر الرواية
وبعدها قطعوني مثل ماتبون بس خلوا شوي مني وعطوه للجمعية عشان الأجر وكذا
< يا مصلك

الرفاق اللي كتبوا ردود هنا والتقييم.. قرأت كلامهم بس معليش ماراح أرد لأن ما عندي شي ينقال الحين < بالله فيه أحد يرد زي كذا
وش نسوي عاد الدنيا كذا

الفصـل الثـاني

من يوم وهو صغير تكونت لديه قناعة بأنه لن يذوق طعم الصداقة ولن يجد توأم روحه, كان مارتن يقدر الصداقة بشكل كبير وكانت تستوقفه المشاهد الجميلة التي تكون بين الأصدقاء مثل الموقف اللي عاصره شخصيا في أحد المخابز.. كان فيه واحد أشترى خبز ب ثلاث ريالات و علبة ببسي وعلك و أصبعين توكس ولما جا وقت الحساب أكتشف أن مامعاه إلا ريالين بس بدأ الرجل يلم حاجاته بأسف قبل أن يقتحم المكان شخص جاء من الخارج: وينك يبو تأخرت كل ذا تشتري؟
الرجل بحزن: طلعت الفلوس ماتكفي تذكرت أن ماعندي فلوس.. وباقي على مكافئة الجامعة أسبوعين
الصديق بشهامة قاتلة: شدعوة يبو حميد أجل وش معنى وجودي أجل!! خلاص كم تبي وأنا أعطيك وإلا تدري.. خذ ذي ثلاث آلاف ريال ما تغلى عليك يا صديقي..

مارتن لما شاف هالمشهد الأسطوري شهق بقوة وطاح الخبز من أيده وحط يده على فمه وقامت الدموع تقوطر بقوة.. حس بالحسد لهذا الشخص لأنه يذوق الأمان و الامتلاء العاطفي.. يا أخي واحد مثل هذا المفروض يحس بالفخر لأن وراه صديق استثنائي مثل هذا راح مارتن إلى هذا الإنسان المعجزة وسلّم عليه بإجلال, وقال له بصوت مرتجف: هي جملة واحدة.. أنت كنز وصدقني أن أمثالك تصف له الجيوش وتهدم لأجله الجبال

وترك المكان عشان لايدنسه بوجوده لأنه يشوف نفسه مخلوق أدنى مرتبه من هؤلاء الشوامخ لأنه ماعنده صديق ولا يعرف الصداقة.. ظل هذا الشعور يلاحق مارتن طول عمره.. لأنه ماقابل أشخاص يستاهلون الصداقة.. ماكان يشوف إلا ناس مليانين بالمصلحة.. ماكانوا يعرفونه إلا وقت الحاجة و إن أخذوا حاجتهم نسوا اسمه.. بكى على حاله ونصيبه لسنوات قبل أن يقرر أنه يظل منتظر لصديق عمره إلى أن يموت
صار مارتن يقضي وقته مع نفسه و بالتأمل فيما حوله وما حس بيوم بالندم على هذا القرار لأنه من جد كان مقتنع بصحة اختياره وبأن اللي حواليه مجرد أكاذيب ونفاق يمشي على قدمين

ثم جاء عباس وحاس أبو السالفة بجيته لحياته مايدري مارتن وشو ذاك الشي المميز في عباس عشان يلفت انتباهه.. هل هي نظرات عينيه؟ أم تسريحة شعره؟ أم التي شيرت العجيب اللي هو خليط من الأصفر على الأخضر على العنابي.. بالمناسبة عباس ماعنده ذوق بالملابس وكان شوي يفشل
لكن كلمة الحق لازم تنقال.. عباس كان مخلوق مختلف عن البقية كان يعتبر مارتن أثمن شي في حياته لدرجة أنه كان يحرسه بنظراته طول الوقت كان عباس مايشيل عينه من على مارتن تقل جالس يراقبه لكن عباس كان يقول إنه يخاف عليه من أنه يطيح في حفرة وما يدري عنه عشان كذا كان يطالع فيه

كان عباس مثل النعمة اللي الله أعطاه لمارتن.. وبدأت الحياة تتلون مع مارتن مع عباس.. ولأول مرة صار مارتن يملك حياة اجتماعية وطالعات ومغامرات خارج البيت مع أحد وماصار يستحي لما يدخل المطعم عشان يتعشى لأنه موب الوحيد اللي جالس لحالة وعنده أحد يسولف عليه ويضحك مثله مثل غيره.. وصار يزورون بعض في البيت وأحيان يتهورون ويكشتون في البرّان وياكلون أسكريم فوق أحد الكثبان الرملية
وفي أحد هالأيّام وعلى أحد هالكثبان الذهبية يقول عباس بتلذذ وهو يرمي نفسه على الأرض الرملية: ياأخي أحب البر لدرجة أني شاك أني راضع مع ضب
مارتن بحماس: حتتتتتتتتتتى أنا أمووووووت على البر لدرجة أني شاك أني راضع مع حصاة
عباس: لا لا بس أنا حبّي غير.. من جد أحس أني راضع مع ضب
مارتن: كيف يعني؟
عباس: يا أخي مدري.. يا أخي ترا الحب عذاب المهم وششششش تبي تسوي بالويك أند الجاي؟

مارتن: ولا شي.. بصراحة ودي أعتكف.. هع قصدي عندي إختبارات الفآآآآآينل زي ماتدري
بدا الاشمئزاز على وجه عباس: وعووووووه لاتقول تبي تذاكر.. يا أخي أنت خبل و إلا بس يوم الخميس على وشو كل هالمذاكرة ترا النسبة مهيب مهمة للي زيي وزيك.. أهممم شي إنجح والسلام
أنخرع مارتن من كلام عباس لأنه ماتوقع إنه يسمع مثل هالكلام من شخص بينه وبينه متر واحد ويكون صديقه كمان هو كان يسمع مثل هالكلام بس كان من ناس ماتربطه أي علاقة!! رد عليه بإرتباك: أيوه لكن.. مدري.. أنا لازم أجيب درجات كويسه.. يا أخي أستحي من أمي.. دايم تقول أني ذكي وتمسح على راسي
هز عباس رأسه علامة الأسف على صديق حياته اللي عايش في أوهام وخيالات وقرر إنه ينقذه: يا أخي الحين أنت تجيب إمتياز كل سنة وتنجح و أنا أجيب مقبول و أنجح برضو ونتقابل السنة الثانية وكلنا مثل بعض.. مشكلتك أنك مسكين يا مارتن عقلك ملعوب عليه وممتلئ بالظلالات والأكاذيب من هؤلاء صناع الكوابيس يخلوك تقلق من الإختبارات و الدرجات العالية مع إن السالفة كلها تمرير أفكارهم لعقلك الباطن وتصير أسير أفكارهم البالية

أيش؟ أيش؟ أيش؟ كان مارتن يسمع هالكلام وفمّة مفتوح على الآخر و لسانه يتأرجح.. يا الله وش أحس فيه؟ أحس كأن صار لي زلزال خربط كل جسمي وصرت مجموعة عظام مركبة في أماكن موب مكانها.. يارب وش هالكلام لحظة لحظة يا عباس أنت وش قلت أصلاً مافهمت عليك.. يعني أنا كنت مخدوع وكنت عايش كذبة وكنت أسير لأهل العقولة المصدية وأنا المسكين كنت مقتنع باللي أسويه وأحس إني في طريقي إلى السعادة و أنا ما أدري لوين رايح أصلاً ؟!! معقوله ؟
بدأت الدموع تنزل من عيونه ( السالفة صارت حلا كل شوي يصيح ) ويحس إنه ينسحب من الواقع.. هو ينسحب من الواقع و إلا بيصحى من الحلم اللي كان فيه؟ معقوله؟ وليش لأ؟ مو أنت قضيت سنوات عمرك وحيد ليش مايكون السبب هو الانغلاق اللي كنت فيه.. لين حرمت نفسك من الحياة والجمال و ظللت حبيس الكتب.. رفع مارتن عيونه ل عباس وهو يحس إنه ضايع وقال بإنكسار : أحس أني ضايع و أني مخدوع

هنا عباس فز كما يفز الصديق الشهم المغوار الصادق النبيل التحفة النادرة في هذا الواقع المخادع وقال له وهو يطبطب على كتفه: وش دعوة.. أجل وش معنى وجودي أجل!!
أهتز مارتن من هذي الجملة.. هذي الجملة اللي كانت محفورة في أعماقة منذ سنوات و ياما تمنى تنقال له لما سمع مارتن هذي الجملة تصلب لثوان قبل ما ينط إلى عباس اللي خاف وصرخ بلا شعور وصار يحب رأسه باحترام كبير وهو يقول بين كل بوسة وبوسة: أنت أعظظظظظظظظظظم شيء صار لي بحياتي يا عبسييييييييي لو كان عندي أخت كان أزوجها لك لأنك عظيم
ثم جلس على الأرض يتمقل وجهه بإعجاب ماله حد, ثم قال بإصرار: ماراح أذاكر إلا ليلة الإختبار..
***
طبعاً نفذ مارتن الكلام بحذافيره و صار مايذاكر إلا ليلة الإختبار ويمر على الكتب مرور الكرام, وحله صار خرابيط وتأليف معلومات مالها طاري بأي منهج على الكرة الأرضية و بالغش و بالصياح عند المدرسين كان ينجح مقبول مع مرتبة ( يخب عليك وأحمد ربك ولا يكثر ) وكان هالمعدل صدمة لأبويه لأن ولدهم كان دايم يجيب درجات عالية وهو مغمض أجل كيف لو فتح عيونه.. طبعاً الأم جلست تصيح و الأبو جلس مع الولد جلسة أبويه عشان يتدارسون سبب السقوط المريع في المعدل : الحين ياولدي الجلسة الأبوية ذي شلون يعني عادي لو نجلس على الأرض في المقلط ؟

رد عليه مارتن بسوقية: أحلا يبه.. أجل السقوط المريع؟ من وين جبتها ذي
بالمناسبة الأب اسمه (ميشو) : المهم وش سبب هالدرجات يا ولدي الحبيب
مارتن بصراحة: والله بصراحة يافضيلة الوالد الحنون, أنا مريت بمنعطف قوي خلاني أنتبه إلى الحقيقة المرّة هي أني كنت مخدوع و جالس ألعب على نفسي و أنا أحسب نفسي عايش بسعادة وجزى الله العلامة عباس اللي خلاني أستيقظ و أنتبه لزهرة شبابي لأستمتع بعبيرها قبل أن أموت
حس مارتن بالفخر لأن حتى ألفاظة صارت قوية ومؤثرة ولها معاني عمقية, لأنه مقتنع بأفكارة الجديدة, لكن الأب أصر على الأخذ والعطاء بالكلام: يانظر عيني أجل من ممتاز إلى مقبول وتقول زهرة شبابك طيّب ليش أخلاقك صارت كذا.. الله يرحم أيام الشهاق إذا خلص المسلسل
أحمر وجه مارتن لأنه حس بالإهانة, لكنه بلعها وقال: يا حياتي أنت.. أنا كنت شيء وصرت شي ثاني.. أنا أكشتفت أني أسير أفكار بالية أكل عليها الزمن وشرب سفن أب.. بصراحة أنا أعتبر ماضيي أيام سوداء لازم أنساها وأبدأ حاضر مشرق
و أصر مارتن على أفكاره الجديدة.. لا ومن حلاة الوجه قام يهدد إن ضغطوا عليه أنه يترك البيت و يهاجر.. هو في البداية كان وده يقول إنه يبي ينتحر لكن عباس قال له إنه يبي يسافرون يشوفون السينما وياكلون فشار, وبصراحة مايقدر يخاطر

استمر مارتن بحياته العابثة مع عباس, إلى أن جلسوا في يوم ما في أحد الكوفيات.. وكان عباس يمدح في مارتن بإعجاب: والله أنننننننننك مخلوق استثنائي.. نفففففففففسي أشوف مثلك.. لكن ما ألقى يااااااااا أخي أنا بديت أعتبرك قدوتي و أني تلميذ عندك ..
مارتن كان حاط وجهه بالأرض من قو الحياء.. أحححح وششششششش ذا الإحراج يا أخي: أصلنننن أنا التلميذ في أكاديميتك العظظظظظظيمة.. يكفي إنقاذك لي دليل على صحة كلامي
رد عليه عباس بحكمة: كل الأساتذة كانوا تلامذة في يوم ما..
هنا مارتن قرر ارتداء الحجاب عشان يغطي احمرار وجهه ياربي وشششششش هالعباس اللي مدري من أي حديقة أزهار جاء لعندي من جد ودي يصير عندي أخت عشان أزوجها له.. وليتها تجي قدره.. ليته يتنازل ويرضى يتزوجها
قال مارتن بصوت يرتجف من الحياء والامتنان: عباس أنت المخلوق رقم 1 عندي.. لو تقوم حرب نووية تعال عندي راح أحميك وأحرسك وأنقذك و أدافع عنك بروحيييييي.. إهي
هو كان يتكلم مع عباس وهو حاط يده على وجهه عشانه مستحي, فجأة سمع عباس يشهق وهو يقول: وش هالخششششششششم !!!
شال مارتن أيده من على وجهه عشان يشوف تحقق أبشع كوابيسه شاف عباس يطالع بأحد غيره.. لا عبسي اللي جلست استناه لسنوات يروح لواحد ثانييييي... لااااا لن أعود للوحدة أبدن
قام عباس من مكانه وراح لهذاك الشخص ومارتن يصرخ وراه: وين رايح؟
ألتفت له عباس وقال له بجفاء يمزق القلب: وششششش تبي أنت ما تقول تبي تجيب إمتياز يلا رح ذاكر وفكني من شرك
ماصدق مارتن اللي سمعه, وحس بالبداية إنه مقلب لكن لهجة عباس كانت تخوف, وحتى لو كان مقلب ماراح يقبل بالنكتة السخيفة وراح يصيح لو يقولون له أيش <
جلس مارتن يراقب المشهد البشع بعيون مليانة دموع ع الآخر.. راح عباس لهذا الشخص وقال له: السلام عليكم
رد عليه صاحب الخشم بريبة قبل مايرد السلام: عليكم السلام.. شتبي؟
فجأة أنقلب وجه عباس لوجه حزين بشكل فضيع لدرجة أن كل من في الكوفي تعاطفوا معاه وهو يقول: أنا ماعندي أصدقاء من ولدت وأنا وحيد.. تصدق أمي ولدتني بلحالي.. ماكان عندي إلا صديق واحد وكان خبل يحب الفصفص ومن حبه له طاح من الدرج وسموه " البطل كعبول " سمع مارتن هالكلام وهو يحس إنه مألوف.. إلا سالفة كعبول ذي ؟
ثم انتبه إلى الحقيقة.. وللأسف الحقيقة كانت صادمة.. صادمة.. صادمة... حس مارتن أن قلبه يتقطع لسبع مية قطعة وقطعة وبدون مايدري بدأ ياكل المناديل اللي في أيده من القهر ودموعه تغرق المكان ولسانه ميت مايطلع له صوت.. ثم بدأ يحس بأعراض الشهقات على جسمه عندها عرف أن حالته لاتسمح بمزيد من الأوجاع.. قام وطلع من المكان بخطوات سريعة وهو يرتجف من خليط المشاعر اللي يحس فيه..
( )


- الأحداث بدأت تتعقد
- وش سالفة الخشوم مع عباس لاحظوا أن سبب صداقة مارتن مع عباس هي خشمه

يتبع