 |
 |
 |
 |
 |
 |
 |
 |
 |
20-01-2012, 11:45 AM
|
|
||||
|
إذاعة الوفيات
|
ايام زمان
بسم الله الرحمن الرحيم السلام عليكم ورحمة الله وبركاته من زمااااااااان عنكم كيف الحال ياعيلان وعيلانات  المهم في موضوع من بقايا الاملس .. من ذكرياتي الاليمه من ايام الدعثه نخش في الموضوع وراي صلاة جمعه ... كنا اول ساكنين في صياح ((( عتيقه)) جنب سوق الخضره وكان اغلب الحاره جيرنا اقاربي واهلنا وعارفين كل واحد في الحاره من صغير الى كبير ودايم جمعتنا مع بعض العيال مع العيال الرجال مع ال رجال والحريم مع الحريم وفي يوم من الايام لا لي ولا على وجلس في امان الله كالعاده كنت جالس مع العيال في الحاره وكنت جالس العب مصاقيل والعب عكوس وجالس اشرب ببس (( بيبسي))واكل بسكوت مثلث بنصف ريال يوم اذن العشاء رجعت للبيت كالعاده كني غنمه اعرف وقت ماارجع (( مثبتين على الوقت)) معروف اول حدنا العشاء ونرجع للبيت لان لو نتاخر  معروف وش بيجينارجعت للبيت وانا تعبان لقيت أمي مولمه العشاء مرقة باميا وطحينيه ((ابو التناقض)) وخبز حقين الزيود (( سامي الجابر)) خخخخخخخ وشاهي مع حليب وادي فاطمه المهم كلت ورقيت للسطح حتى الغسيل ما نعرفه (( قذر)) كان ايام القيض(( الصيف)) وحر مرره والبعوض مالي السطح وامي صافه المراقد جنب بعض لي ولخواني (( كننا في مستشفى ميداني))) وغضارة المويه جنب رؤسنا والقيصريه تعريف القيصريه (( هي مثل السطل لاكن صفيره ومسطحه تستعمل بدل الحمام قريبه منك لاننا نخاف ننزل في الليل للحمام لخاف يجينا الجني او النمنم او عوافي الله او ام راشد (( مدري من امر راشد)) تقول امي انها تاكل البزران (( فلم مرعب))  المهم نمت من حطيت رأسي ونا نايم لاهم ولاتفكير ولا شي مرتاحين البال اول وانا نايم حلمت حلم غريب اول مره تمر على مثل ذالحلوم ما ادري وشذ الحلم  المهم قمت نزلت من السطح ((قطو)) لقيت امي قايمه تزين الفطور كالعاده الفطور مرقة بصل وطماط او مرقة قرع وطحينه وجبن كرفت قديم وخبز تميس وشاهي سلمت عليهاحبيت يدها وراسها صوتي متغير ومبحوح  التفتة امي علي مرتاعه  قلت عسى منتاب ماكل عسكريم البارح قلت لا والله واسئلي عيال الحاره وجلست تناظر فيني ومستغربه من شكلي  كنها اول مرره تناظرني المهم رحت للحمام اناظر نفسي في المرايه شكلي متغير مررره خشمي كبير ومليان حبوب وصوتي مبحوح كني بقره مزنزطه وكانت فنيلتي مشقوقه مع مكان الابط لقيت ثلاث شعرات في ابطي وريحتي صنان ودودي قاسيه أمي ضايق صدرها وتنكدت (( جعل والدينا بالجنه )) وع هذا تحاوشيني شكلك انت ودحيم ولد حصه جارتنا ماكلين عسكريم او ببس مثلج او طابين في البرتسه اللي حيالة ال درهالي قلت يمه والله مااطب ثمي جعلي اطرشه كاني كذاب قالت بسم الله عليك لبست عبايتها الطويله اللي تسحب في الارض اللي طرفها غبار وهي تمشي تكنس الحاره من طول عبايتها المهم وصلنا المستوسق ولقيت في طرف عبيتها اسيام وعودان وقواطي وقراطيس ناشبه فيها هههههه ولقطتني بيدي وراحت بي للصحيه (( المستوصف))  قلت يمه مافيني شي قالت يمكن فيك لوزاو ضربة شمس (( ابو التناقض ))او مسحور او فيك عين (( من زيني )) وتقول امي شاكه ان فيك عين لان كل بنات الحاره يتهولون من زينك  قلت يمكن هههههههههههههههههههههههه دخلنا على الدكتور المصري واقدم دكتورعندنا في الصحيه اسمه مصطفى حسين ابو العيون المهم بطحني على السرير هو والممرضه ياشين ريحة الممرضه ريحها فول وفلافل والدكتور ريحته بط وملوخيه بالارانب وكشري (( يسمع بالاكلات المصريه)) المهم قاسو حرارتي وحطو العود في فمي بغيت اطرش علمت الدكتور وش احس فيه وش جاني في الليل وانا نايم قال الدكتور لامي ابنك ناظج  والله لوني مندي المهم امي مبسوطه ولدها صار رجال (( اللي هو انا )) وصلنا للبيت جلست على زلفة الباب تحتري ابوي يجي تعلمه اني صرت رجال ودرو الحاره اني رجال وعلى طول تغطو عني البنات ولاعاد يلعبون معي واتصالات من عماتي وخالتي يباركون لامي وكلن حاجزيني لبنته (( والله منيب سهل )) وكلمت خالتي اللي في الكويت تبارك على رجولتي غير البرقيات والرسائل جاء ابوي بعد الظهر وتركض له توه ما وقف السياره تعلقت في السياره قالت ابشرك ولدك صار رجال  المهم دخل ابوي وجالس يناظرني نظرات غريبه (( شكله غار مني)) قال لامي الله يعينا عليه (( فاهم الوضح)) المهم اسمع أمي تقول خلنا نزوجه ما امداني انظج بيزوجوني وتوني ما تهنيت بللافلام وصور الممثلات والمغازل والسرمحه والدشاره وتغير فيني اشياء كثيره صرت احب البنات وصرت يهمني امرهم ههههههههههههههاول طول الوقت العب معهم ما يهموني ا الحين تغير الوضع  صرت اتميلح كثير واستخف دمي واجد  وادعي عندهم وصرت اهتم بنفسي صرت كل اسبوع الحلق شعري توليت وبعدها صرت اطول شعري صار لي خنافس وقذيله وفصلت ثوبين ابوغزالين والغتره الجديده والجزمه السودا ام كعب ام دندوشتين والشراب الابيض المخرق وكل يوم لازم اغسل الثوب واكويه صرت كني امير (((قروي)) وقبل ما اطلع ادق الزين والبس الغتره المنشيه وطاقية الزري واللمع الجزمه واحط في جيبي ثلاث اقلام اسود وازرق واحمر كني مراقب من وزارة المعارف  واحط الطيب (( كالونيا)) ابو عصفور وبعدها اطلع اسربت في الشوارع امسك اخر الحاره رايح جاي واحارش البنات واغمز لهم واصفر لهم ياما جاني سب وتتفيل ولعنة خير غير الشكاوي اللي تجي لامي وابوي غير الطق من اخوان البنات  المهم مليت من حارتنا بديت اصج ابوي ابغى سياره على فكره انا بكر ابوي  المهم صيحه انا وياه لين طلع لي سياره شبه جديده ماشيه 250000 الف كيلو ولا فيها الا ثلاث صدمات غير الطقوش طلع لي السياره  سياره مازدا سوبر حمراء اللون موديل 77م الدخلي بيج المهم صرت اهتم فيها غيرت الجنوط حطيت سلة فاكهه على المرايه حطيت جاعت على المرتب(( الجاعد هو صوف الخروف)) وعلى الطبلون حطيت فرشه كل اسبوع انضفها من الذباب الميت غير الكتابات على شنطة السياره كلها كتابات غزليه .... والمكتوب من كان لي في الحب مشاركآ ... تركت الهوا وعشت وحيدآ والعين تبكي والقلب يشكي وعاش فهد بن سعيد وبشير حمد شنان المهم خليت سيارتي كنها صبوره غير الصور اللي ملزقها جوه السياره سعاد عبدالله وهي صغيره عايشه المرطى حياة الفهد وطالت رجلي صرت اطلع برا الحاره وعندي صديق زكرتي ونظيف مثلي اسمه عبدالرزاق بن حمد (( اسم مطرب )) كنا كل عصريه نروح لشارع الوزير او الثميري نغازل الدوافير الله من الزين حتى وحده دافوره خذت رقمي اعجبت فيني (( ياشباب تراني مملوح))  ياعليها طول وعليها بياض وعليها خدود حمر لو تلمسها سالت دم كنها طماطهوالعيون الزرق (( قطو)) المهم انا وياها اتصالات اخر الليل لمدة شهرين بعدها معاد اتصلت  رحت اسئل عنها واتقصى الحقائق (( حلوه اتقصى)) لقيت إن ابوها انتهاء عقده وسافرو كان مدرس قواعد في مدارس بلاط الشهداء ملاحظه (( اكلمها شهرين حتى الان مااعرف اسمها )) الله من الفهاوه المهم رجعت للحاره وكان في حارتنا بنت حلوه بس فيها رجه شوي اسمها حصه ويدلعونها حصيصه البنت معجبه فيني(( ماقلت لكم اني مملوح ماصدقتو)) طول الوقت اسولف معها من وراء الدريشه واحاول اقابلها في مكان قلت في السطح او المخربه اللي قبالنا (( كلابه)) او في البراحهالمهم ما وافقت زعلت عليها (( بدا الثقل)) قالت لي ابعطيك صورتي المهم ارسلت صورتها مع اخوها الصغير ماتدرون وشلون مرستها لافتها بخرقه وحاطه شطرطون وحطتها بكرتون وربطة بحبل (( كنها معطتني مخدرات)) وارسلت اخوها الصغير بالكرتون ومحدد المكان والزمان وجاء اخوها الصغير قال انت الاملس قلت ايه قال وش كلمة السر قلت (( ام راشد)) قال هذا الغرض لك بغيت اسلمه شنطة الفلوس (( المافيا)) متاثر بالافلام هههههههههههههههههههههه المهم فتحت الكرتون وجلست ساعه وانا افك الشطرطون يوم شفت الصوره كانت الصوره الفوريه كوداك طلعت الصوره مصوره على جدار السطح (( حمامه)) وحاطه بودره ((( روج)) احمر فاقع اللون اول ما شفتها احسبها مأكله كبده نيه ولابسه رشرش وغوايش دقت الدركتر وحاطه مناكير فوشي بس البنت حلوه. لو تخلى عنها الرجه بس تكمل كل ليله اطلع الصوره واتفرج عليها ويجي في تفكيري امور كثيره  وعلى ذالحال العصر في شارع الوزير وبعد لمغرب في لحاره تصدقون يوميى اعبي بنزين من الفرفره في الشوارع الله يسلم امي هي اللي تدعمني وبدا يخط الشنب وبدات تطلع اللحيه كنها حثال شاهي المهم صرت رجل من صدق وفي يوم من الايام جاء اخو حصه الصغير وعطاني ورقه مكتوبه بالكحل قالت لازم اقابلك في البراحه الليله رحت في الموعد وكنت خايف وارتجف لا احد يشوفنا كني رايح اقابل بياع المهم جت والحزن على وجهها (( ياحلو كلامي)) والدمعه في عينها والاسي والحسره على شفتيها (( الله واكبر كلام كبير)) المهم قالت حبيبي  اغمى على من ذالكلمه واصفريت ورحت اركض وراء الجدار اطرش اول مره تنقال لي ذالكلمه حتى امي ماقد قالتها المهم قالت انا ابعرس قلت وشو قالت جاء ولد خالي رشيد وبيعرس علي واهلي وافقو قلت وانتي قالت وش اسوي ابوي وافق انصدمت ومرضت وجتني حاله نفسيه سيئه ولاعاد افارق البيت وكل ساعه اطلع الصوره احببها واصيح ولاعاد أكل وطول الوقت مشغل المسجل الكاترج اغنية سميره توفيق(( لاباكل ولا بشرب .. بس بطلع بعيوني))) بليل يعيني بليل انحل جسمي ونحفت وصار اكبر مافيني خشمي وبعت المازدا وشريت سيكل 24 جلاس انهبلتالمهم من شيخ لشيخ يقرون علي والعزايم والقريات والطب الشعبي حتى قشر الرمان كلته ((( لوني والد)) بعدها بسنه نسيتها لاني لقيت وحده ثانيه (( منيب سهل))بس سميت السنه اللي اعرست فيه حصه (( عام الحزن)) متأثر بالافلام الدينيه واللي حبيتها اسمها جواهر ويدلعونها جهير حلوه وزينه بس فيها قمل وصار نفس اللي صار لحصه ورجعت مثل اول ونسيتها وحبيت وحده ثالثه (( يلعن ذالقلب انقلب فندق)) كل اسبوع وحده تصدقون من كثر ما تعرفت وحبيت بغيت اتعرف على خالتي واحبها بس امي قالت انتبه ذي خالتك معاد اميز ادمنت غزل المهم في الاخير كبرت وعقلت معاد اعرف الا حول 22 بنت فقط لاغير |
||||
|
|
20-01-2012, 02:07 PM
|
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
ام ركب بيضاء
|
ههههههلبى موضوعك ياشيخ اقسم بالله بطل بطل وذكريات مليئه بالزحف والدشرة ياخي بديت اشك انك مزيون دامك مطيح كل ذا البنات اول او ان عيال حارتك مامنهم رجاء ومهوب رجاجيل ههههههههه وانك كنت تخاوي ... طيط 
يالبيييييييه يالبيسكوت مثلث ابو ورقة ذهبيه من برا  الي يعرف وين ينباع الحين يعلللللمني اشتهيته  والله ياكنت مُدمن عليه ادمان ماكبر خلفيتي الا هو بس كنت امشي واجد ولله الحمد ضبطت الاوضاع عندي خخخخلا جد يقولون بوه محل يبيع حلويات قديمه وكذا الي يعرف يعلمنا لايبخل علينا
ههههههههههههههههههه انا اهلي كانوا مهبليني ماروح للحمام اذا نمت ليه مادري ماغير امي من هنا تقول اذا قمت بتجيك " عوافي الله " وانا الي اتنافض لاسمعتها كان امي محلوفن عليها ماتخليني اقوم بالليل اروح افعلها بالحمام ماغير اتعافط انا وكلوتي من الوجع بالليل وصرت افعلها كل يوم قبل مانام حتى اني تعودت الى يومكم هذا الله لايعاقبنا بس مشكله العقده الي اذا جت الواحد وهو صغير والله ، وش ضارتس لو انتس مخليتي اقوم بالليل اروح للحمام لحاااااالي لحالي ماكنت اناديتس ولا جدتي الله يرحمها بتجيك المقرصه الحاميه واذا كانت زعلانه علي تقولي " بناااادي " المقرصه الحاميه وانا اقول بنفسي وش ذا المقرصه الحاميه وش واسطة جدتي ذي الي تتعامل مع وحوش ومره من المرات الصبح كنت افطر انا وياها وتسولف معي وناكل بيض وجيت اصارحها وقلت لها بكل براءة وش المقرصه الحاميه ؟ جابت قلاية البيض الي ناكل فيها وحطتها على يدي وقالت هذي المقرصه الحاميه وضحكت وحرقت يدي وقلت ذي تستهبل علي ماتبي تعلمني وش المقرصه الحاميه " الله يرحمك يانورة ادعوا لها "
ههههههههههههههه هههههههههههه والله مهوب من الفهاوة الا والله من الخقه للحين تتذكر شكلها من ذيك الايام مالومك يوم ماتعرف اسمها هههههههههه واضح انك كنت مغرم فيها لدرجة غير طبيعيه هههههههه
هههههههههههههههه ههههههههههههههههههه هههههههههههههههههههههه احمد ربك ان اخوها مهوب ملقوف وراح يفكفك الغرض قبل مايوصلك وشافه وعلم ابوه عليك وعليها ههههههههههههه
هههههههه ياعمي مابقي احد ماعرفته انت عتيقه كلها عرفتها شكلك من كبر الرياض اول احمد ربك اول ان البنات مامعهم جوالات ولا يتواصلون مع بعض زي الحين كان كعفشوك وكلن قامت تبربر على خويتها انا حبيت الاملس انا حبيت الاملس ههههههههه موضوعك جاء بوقته لبى قلب قلبك ياشيخ وسعت صدري من جد دحيّم احبك بس لاتحطني مع لستة البنات الي حبيتهم تكفى هههههه
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
|
|
20-01-2012, 02:31 PM
|
|
||||
|
توه ساكن
|
انا بنات عمي ماشاء الله كثاار ومن صغري وحنا نلعب سوى ماخلينا شي مالعبناه وهم بعد يحبوني ,كلما تغافلت عنهن يوصون احد يقولون ناد المرتبش يلعب معنا,حوشهم كبير ومليان سياكل,حلبة الريم مهب حوش,و كان فيه وحده والله حلوه بس خشمها هو الطامه والا البنت حليله تخليك تناظرها غصب وتسمع وش تقول حتى لو انك جنب حفريات, مدري هو عشانها تجذب والا مدري وش يسمونه,بلغت وصرت اتأملها اكثرر,اول كنت اناظر وجهها مدري خشمها بس,لكن يوم بلغت بدأ فكري يجي واطي وعيوني بعد جت واطيه وصارت تنزل على تحت وصرت انتبه لإشياء ماكنت انتبه لها قبل,ماخليت البنات ابد كان اخوي يتهزأ بي عند باقي العيال يقول ابو البنات,مشكلة اللي غاير من شعبيتك ووده يصير مثلك,والا الصدق والله احب سواليفهن هههه ,تدري ليه؟ عشان كلها عن المملوحه ام خشم , شفتي هنوف وشي مزينه شفتي هنوف وشلون كاده شعرها,يغارون من هنوف!!!,نسيت اقول ان هنوف ذي كلما سويت شي تضحك هههه اقولها بيب تضحك, اهبل نفسي والا اعطس تضحك , تضحك البنت على كل شي,والظاهر عشان اهلي لامدحوني قالو 0ياخنسك يامرتبش0 استنكرت انها تضحك على حركاتي المخيسه السامجه والظاهر انها اول شخص يضحك علي في حياتي كلها,مره قلت لها تعالي ابيك شوي,وجت قالت نعم؟؟كنت واقف انا وولد عمي (مهب اخوها واحد تغطى عنه لااكبرت) ومعنا ولد عمتي, قلت من احلى واحد فينا يالثلاثه ,سكتت وقامت تناظر شوي هم قالت هذا (ولد عمتي ابراهيم) مدري ليه اعجبها دب وقصير وازين مافيه ان ابيض وغمازات بس ياخي حرام عليها شييين ,للمعلوميه تراه ازين مني بألف مره,ياخي انا غبي مره اعرف الواحد لاجاء يقارن يجيب ناس متأكد انه ازين منهم مهب جايب ناس مايجي شمع اذان الواحد منهم, المهم مافقدت الأمل قلت لها طيب همن؟قال ذا,اللي هو ولد عمي سعود؟!!! اختارت ذا العبد ابو عيون ضواق!! انا تحطمت خلاااص ماعاد اقدر,وخربتها قلت لها افااااا وانا طيب وش فيني؟؟!!توقع يالأملس وش قالت؟ قالت لا انت خشمك كبير هههههههههههههههههههههههههههههههههههههههه,اذا انا خشمي كبير يالدعله انتي وش خشمك؟ مارديت عليها ورحنا والعيال ينطلون كلام على خشمي وسموني ابو خشم؟ يلعن ام القهر بس ,بعد فتره رحت لها وقلت انا احبك,مايمديك على الزبده؟,بعذري ماقويت اتحمل ازود من تعذيبها لي هي وخشمها,انا توقعت انها بتضحك مثل دايم هههه لكن خاني التوقع ومسكتني بغالوقتي وهزتني شوي وراحتليووومك انا مدري ليه سوت كذا,عاد لاهي اعرست ولا انا اعرست لكن مالي نيه يارجال اخطبها,,اذا في صغرها مسكت قلاب الثوب,الحين وش بتسوي بي؟ اخاف تجلدني اول ليله يعطيك العافيه يالأملس هههههههههه سجلني متابع ومعجب وتراك على الراس دامك نصراوي 
|
||||
|
|
|
20-01-2012, 05:34 PM
|
|
||||
|
مسـيّر
|
ماشاء الله عليك أنت اللي جالس في اليسار ... كأنك ولد عمتي قبل 7 سنوات وانت على قولتك من نضجت ... أهلك شوي لايسوون حفلة تقول حاطينك وزير المالية  سالفتك كانت هادية جداً ومليئة بالبراءة ولكن من وصلت مرحلة الخشم اللي عليه حبوب بدأ الأنحراف ... وبعدين وش هالقلب اللي يتعرف على كل هالبنات ولا جاه ملل شكل تشجيعك للنصر له علاقة فسيولوجية < اقول أقعد يَ البروفسيور  أما سالفة البنت اللي تبي تقابلها بالبرحة !! ... ناوي تلعب معها كورة مثلاً بس يوم قالت لك حبيبي رحت طرشت ... شكل العواطف مهكره عندك هههههههـ سالفتك ممتعة يارجل ... قسم أضحكتني من أمعائي الدقيقة مو من قلبي دمت بخير يَ صاح |
||||
|
|
|
22-01-2012, 07:29 AM
|
|
||||
|
تغرد عن ألف بألحان الزحف
|
اسلوبك ساخر حلوو كان ودي اقتبس او ادرج تعليقات مطوله لكن من شفت بتوقيعك قلب نصراوي ينبض غسلت يدي بفلاش .. واختصر بكلمه ع السريع (لاتتقبل مروري) <هلآليهه |
||||
|
|
|
02-02-2012, 11:04 AM
|
|
||||||||||||||||||||||||||||||||||||||
|
مسـيّر
|
7 7   ههههههههههههههههههههههههههههه الله يرجك يالأملس أجل مسحور وبنات الحاره صاكينك بعين ماهقيت وهذا وجهك ماصدقت الا بشي واحد خشمك اللي كابر
ههههههههههههههههههههههههه هذولي بناتنا اذا جاو يصورون تلقا الوحده منخشه بالسطح ولا ورا الدولاب عشان لحد يشوفها من اهلها تسنها قطو ,,بعكس السوريه تلقاها مصوره وهي ضامه أبوها وتقول لك هاد البابا يئبرني الله يوسع صدرك يالأملس على الموضوع ,, صح ان فكرته استهلكتها بكل مواضيعك بس بطله وعلى لسانك وسردك تجيب العافيه
|
||||||||||||||||||||||||||||||||||||||
|
|
|
07-02-2012, 04:49 PM
|
|
||||
|
إدارة الشلة
|
8 خخخخخخخخخخخخخخخخ وين حرثت لين طلعت صوره يالخبل الأملس يعطيك العافية حبيبي على مواضيعك المصرقعه اللي توسع الصدر لكن ياليتك ترجع وترد على ذا الخلق اللي ماسكين سرا...ياخي أنت ماتحمس الواحد يرد هههههه صاير مثل الجيزانية اللي تفك عيالها بالحواري ولاتنشد عنهم يالفقرواي عموماً لاتقطعنا من هالزين وخلنا نشوفك بالشلة دايم
|
||||
|
|
|
08-02-2012, 04:54 PM
|
|
|||||||||||||||||||||||
|
إذاعة الوفيات
|
بشر ابرد قريبا بس والله مافضيت مع العالمي دايم
|
|||||||||||||||||||||||
|
|
 |
| الذين يشاهدون محتوى الموضوع الآن : 2 ( الأعضاء 0 والزوار 2) | |
| أدوات الموضوع | |
|
|
|
|
