تحقق اول أحلامي وسجلت في مدرسه ليلي وكلهم شيبان سالت الوكيل قلت هذي مدرسه ليليه ولا محو اميه ولا دار العجزه ولا وش السالفه قالي لا ليلي .
دخلت الفصل وادور اصغر واحد واجلس جنبه وتعرفت عليه ومن حسن حظي صار كاااش اسمه عبدالحكيم ومعه كرسيدا نظيفه ماشيه 600 الف ومليانه جاعد اذا ركبتها كنك جالس في خيمه والقزازه اللي ورى كاتب عليها قراندي وعنده ملحق خاص فيه .
يوميا نطلع من المدرسه بعد العشاء ناخذ عشاء ونروح لبيتهم نجلس نضبط الشيش والشاهي التلقيمه و يا نشوف افلام ولا نلعب كيرم ولا مانابولي ولا اونو. لين يشق النور واروح لبيتنا و على هالوضع لين جت الاختبارات واستمرينا على انشطتنا بس نذاكر شوي وبعد الفجر ندور على المدارس ونلاحق مواكب التفحيط .
مرينا من مدرسه بنات وفيه بنت تمشي لحالها فتحنا الدرايش وطولنا على اغنيه خالد عبدالرحمن تقوى الهجر على ايام عزه وهدينا وابتسمنا , حسيت البنت متقبله الوضع ديورنا وقلت لعبدالحكيم بسجل رقم الملحق ومديت لها الرقم وصارت المعجزه لااا اخذت الرقم وحطت الرقم في الشنطه (مستحيل يارباااه وش فيني قلبت فارس عوض) غلطت غلطلت عمري انا توقعت انها ماراح تاخذ الرقم ولا تاخذه وتشقه كالعاده وصارت كل حساباتي غلط بعدها راح كل واحد لبيتهم .
رحت البيت ولا جاني النوم من ضيقت الصدر ولا ذاكرت ولا عرفت احل في الأختبار وبعد ماخلص الأختبار صرفني عبدالحكيم قالي مصدع نتقابل بكره وانا عارف ان النذل بيروح يرابط في البيت بينتظر اتصالها .

الأشغال الشاقة
الزبده انها دقت وصارت خويته خلصت الأختبارات ونشبتله قلتله بكلمها عيا قلتله بسمع صوتها ماقد سمعت صوت بنت تغازل قالي اخاف تدري وتزعل قلتله ماعندها صديقه قالي لا قلتله بنت خالتها ولا بنت عمتها قال عندها بس مو في الرياض قلتله عندها اخوات قالي عندها بس متزوجات قلتله خلها تعرفني على وحده منهم قالي تبيها تطلق علشانك عاد هو يوم شافني ناشبله صرفني وقالي بكلمها في الوقت المناسب ولما اتعرف عليها اكثر .
بدى عبدالحكيم الوصخ يزلبني من اول ما اجي عنده لين اروح وهو يكلمها ويضحك ويقصر صوته علشان ما اسمع ,وكل شوي يئشر على شي مره يئشر على بيالته وانا ذيب افهمها وهي طايره ادري ان بيالته خلصت ويبيني اصبله ومره يئشر على الشيشه اجيب الجمر وانفخ الراس واحطله جمر ويئشر على المكيف ادري انه بردان واقوم ارفع المكيف واجيب بطانيه واغطيه علشان يدفى خلاني صبي عنده وانا اقول لجل عين تكرم مدينه حتي مستواي في الكيرم نزل صرت اطبب الخمسين ولا اقدر اطبب الطباقه ماعاد نلعب .

راح عشر دقايق انا ماقدرت استحمل قلت لازم اروح اكحل وانزل من بيت الشعر سيارته وارجف الباب وادخل بسرعه ابي اشوفهم متلبسين ( بوليس ادآب ) , واحصلهم في السيب يا قلبي يا خويته تشبه منى شداد لابسه تنوره سودا وبلوزه مشجره ومزلطه وفاله شعرها وحاطه في شعرها خمسميه توكه ومتكحله ومتحنيه وكانت متينه .. يعني بالعربي سمينه بالحضري دبا بالبدوي .
انا الصراحة خقيت معها وانبهرت من جمالها ودريت انها من لابه طيبه ماقالو في شاعر المليون قالي عبدالحكيم في شي قلت له انت تاخرت وخفت عليك وجيت اشوف الوضع رجعت السيارة وركبنا وحنا في الطريق قلتله كلمتها تعرفني على وحدة قالي انها كرهتك وسبتك لانك دخلت وروعتها وانها قالت اسمحلي .

من الزعل مشيت 6 كيلو ماحسيت فيها و انا امشي اكلم نفسي بصوت عالي انهبلت لين وصلت البيت وادخل غرفتي اللي كنها توقيف الناصريه مافيها لا سرير ولا دولاب اعلق ثيابي على مسمار في الباب (باكستاني) مافيه الا مطرحه وتلفزيون 12 بوصه من صغره لو ابعد مترين ما اشوف شي يصير كنه رادو وفديو sanyo اصلي 8 روؤس يشغل الافلام المضغوطه والافلام اول اغلبها توشوش ومهب صافيه من كثر النسخ.
واجلس في الغرفه منغث اداوي جروحي وانا نايم احلم في مني شداد واذا قمت من النوم القى نفسي مسعبل على المخده ومره متدربي ونايم عند الباب ومره حاضن الجدار ( ظاطور ) ومره متوسد الفديو الاصلي وبدا الجاثوم يلعب فيني وانا صاحي ما تفارق خيالي .

يامرحبا والله ببرطم النملة لي اسبوع اشطف موضوعك ولاادخل فيه اقول اكيد ان مافيه شئ يحمس بما ان هذا نكه لكن يوم دخلت اليوم شوفت الموضوع والصرقعه اللي فيه والزحف تحسفت على ايام الاسبوع اللي راحت ولارديت عليه لدرجة اني ارسلت لمنتدى اسلام ويب واقول لهم اللي اعجبه موضوع وهو من اسبوع شاطفه ولامهوب معبره ويحس انه ولاشئ هل عليه كفارة ارسلو لي رسالة وقالو المواضيع اللي زي كذا لازم تقابلنا فيس تو فيس عشان نعلمك كيف الكفارة ويوم راجعت نفسي دريت اني غلطان وموضوعك فيه الكثير من انظباط النمل تشوف النملة صغيرة ويوم تهدهم حجرها وتويق عليه تلاقي من الاكل مالذ وطاب مخزنينه مثل موضوعك هذا اللي فيه من الصرقعه وسعة الصدر لدرجة انه يخلي حقين الايمو اللي يحبون الحزن يضحكون من بعد موضوعك وتعال ياقلب العنا ناخذ كم قبسة من موضوعك

هههههههههههههههههههههههههههههههههههه
ههههههههههههههه

قسم بالله جالس بالدوام اضحك لحالي تقل خبل . ذكرتن بأمور بخاطري قديمة جار عليها الزمن
على طاري اول تتخرج وتصير ضابط اسهل من انك تشبك بنت .. كلامك صحيح
أيام التسعينات الميلادية رح للسوق ورقم ويمكن تلقى واحد بالهيئة نشيط كأنه افغاني ويتودس ببطنك ويمسح بك البلاط وياخذك لفرع الهيئة ويحلقون راسك صفر ويدرون كل جماعتك انك رايح لاسواق حجاب تغازل . والمسكين ابوك ينفضح اذا بوجهه دم واذا كل اخوانك مثل تلقى ابوك متعود على الصدمات مثل جمهور النصر
وسالفة السفر ثم السفر ثم الزواج . نصيحة الزواج اولا .. يعني تقدر تتزوج وانت طالب تزوج قبل يروح عليك العمر اقل شي تحفظ نفسك عن الحرام ويجيك ولد وانت صغير بالسن
وبالنسبة للسفر اللي بيسافر اول مرة مع سكرجية انصحه لايسافر لانهم بيضيعونة ويطيحونه في امور تسود الوجه
اول مره سافر مع صوفيه لانهم مايشربون الخمر وبتتعود على عدم الشرب . وبتكون عندك مناعه
موضوع عسل ياعسل